ເພື່ອຈັດຕັ້ງຜັນຂະຫຍາຍຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ແລະ ສະພາປະຊາຊົນ ນວ ໃຫ້ສຳເລັດຕາມຄາດໝາຍທີ່ວາງໄວ້, ໃນຕອນເຊົ້າວັນທີ 23 ມັງກອນ 2024 ບັນດາທ່ານສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນວ ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງ ສະພາແຫ່ງຊາດ ແລະ ສະພາປະຊາຊົນ ນວ ຢູ່ພະແນກໂຍທາທິການ ແລະ ຂົນສົ່ງ ນວ ນຳໂດຍ ທ່ານ ບຸນທາມ ພຸດທະວົງສາ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ກຳມະການປະຈຳພັກ ນວ, ຄະນະປະຈຳສະພາປະຊາຊົນ ນວ, ຮອງປະທານສະພາປະຊາຊົນ ນວ, ມີ ທ່ານ ພັທ. ຈັນທະລາ ອຸດົມສຸກ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ກຳມະການປະຈຳ ກຳມາທິການຍຸຕິທຳ ສະພາແຫ່ງຊາດ ແລະ ທ່ານ ສົມບັດ ຈັນທະມາດ, ສະມາຊິກສະພາປະຊາຊົນ ນວ, ຄະນະປະຈຳ ສະພາປະຊາຊົນ ນວ, ປະທານ ຄະນະກຳມະການເສດຖະກິດ, ແຜນການ ແລະ ການເງິນ ນວ. ໃຫ້ການຕ້ອນຮັບໂດຍ ທ່ານ ສີວອນ ຊັບທະວີ, ຮອງເລຂາຄະນະພັກຮາກຖານ, ປະທານກວດກາພັກ, ຮອງຫົວໜ້າພະແນກໂຍທາທິການ ແລະ ຂົນສົ່ງ ນວ ພ້ອມດ້ວຍບັນດາທ່ານຫົວໜ້າ-ຮອງຫົວໜ້າຂະແໜງ ແລະ ວິຊາການຈຳນວນໜຶ່ງເຂົ້າຮ່ວມ.

ໃນການລົງເຄື່ອນໄຫວຄັ້ງນີ້, ຄະນະຜູ້ແທນໄດ້ຮັບຟັງການລາຍງານ ກ່ຽວກັບການເຄື່ອນໄຫວວຽກງານໄລຍະໜຶ່ງປີຜ່ານ ມາຂອງພະແນກ ຍທຂ ນວ ໂດຍສະເພາະຂົງເຂດວຽກງານຂົວທາງໄດ້ຈັດຕັ້ງປະຕິບັດໂຄງການ​ສ້ອມ​ແປງເສັ້ນທາງ ທີ່ນໍາໃຊ້ງົບປະ ມານບ້ວງເງິນກອງທຶນທາງທີ່ກະຊວງ ຍທຂ ມອບໃຫ້ ປີ 2022 ຈັດຕັ້ງປະຕິບັດປີ 2023 ມີຈໍານວນ 13 ສັນຍາ ມູນຄ່າ 6,8 ຕື້ ໂດຍຈັດຕັ້ງປະຕິບັດຕາມກົດໝາຍວ່າດ້ວຍການລົງທຶນຂອງລັດ ສະບັບເລກທີ 30/ສພຊ, ລົງວັນທີ 02 ພະຈິກ 2017 ແລະ ຄຳແນະນຳກ່ຽວກັບກົດໝາຍວ່າດ້ວຍ ການຈັດຊື້-ຈັດຈ້າງ ດ້ວຍທຶນຂອງລັດ ສະບັບເລກທີ 0477/ກງ, ລົງວັນທີ 13 ກຸມພາ 2019 ປະຈຸບັນແມ່ນສຳເລັດ 100%; ບູລະນະຮັກສາ ແລະ ສ້ອມແປງຂົວທາງ ທີ່ນໍາໃຊ້ງົບປະມານບ້ວງເງິນກອງທຶນທາງທີ່ກະຊວງ ຍທຂ ມອບໃຫ້ນະຄອນຫຼວງວຽງຈັນປີ 2023 ມີຈໍານວນ 24 ໂຄງການ, ລວມມູນຄ່າ 15 ຕື້ກີບ ຈັດຕັ້ງປະຕິບັດຕາມກົດໝາຍວ່າດ້ວຍການລົງທຶນຂອງລັດ ປະຈຸບັນ ສຳເລັດ 85 %; ບູລະນະຮັກສາ ແລະ ສ້ອມແປງຂົວທາງ ທີ່ນໍາໃຊ້ງົບປະມານບ້ວງເງິນເກີນແຜນຂອງນະຄອນຫຼວງວຽງຈັນ ປີ 2022 ປະຕິບັດປີ 2023 ຈໍານວນ 11 ໂຄງ​ການ ມູນຄ່າທັງໝົດ 10 ຕື້ກີບ ປະຈຸບັນ ສຳເລັດ 100%. ນອກນັ້ນ, ຍັງໄດ້ສົມທົບຕິດຕາມ ເພື່ອຊຸກຍູ້ໂຄງການສ້ອມແປງທາງຫຼວງແຫ່ງຊາດ ເຂດ ນວ ຈຳນວນ 5 ເສັ້ນທາງເພື່ອອໍານວຍຄວາມສະດວກໃຫ້ການສັນຈອນເຂົ້າອອກ ນວ ຄື:  ທາງເລກທີ 13 ເໜືອ, ເລກທີ 13ໃຕ້, ທາງເລກ 10, ທາງເລກ 11 ເໜືອ ແລະ ທາງ 450 ປີ (ໄຟແດງດົງໂດກ-ທ່ານາແລ້ງ) ມີລວງຍາວທັງໝົດ 185,7 ກິໂລແມັດ, ມູນຄ່າ 33,50 ຕື້ກີບ ປະຈຸບັນສໍາເລັດ 66,35% ແລະ ຂົງເຂດວຽກງານອື່ນໆອີກຈຳນວນໜຶ່ງ.

ພາຍຫຼັງທີ່ໄດ້ຮັບຟັງການລາຍງານການເຄື່ອນໄຫວວຽກງານໄລຍະຜ່ານມາຂອງພະແນກການ, ບັນດາທ່ານ ສສຊ, ສສນວ ກໍໄດ້ຖັດປ່ຽນກັນໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ແລະ ສະພາປະຊາຊົນ ນວ ພ້ອມທັງນຳເອົາຄຳສະເໜີຂອງປະຊາຊົນຢູ່ຂັ້ນເມືອງ, ບ້ານ ທີ່ຕິດພັນກັບຂົງເຂດວຽກງານຂອງພະແນກ ຍທຂ ນຳໄປແລກປ່ຽນກັບບັນດາຂະແໜງການ ແລະ ໄດ້ຮັບເອົາການສະເໜີຂອງພະນັກງານຫຼັກແຫຼ່ງພາຍໃນພະແນກ ຈຳນວນໜຶ່ງ ເພື່ອນຳສະເໜີຕໍ່ພາກສ່ວນກ່ຽວຂ້ອງໄດ້ການຄົ້ນຄວ້າ ແລະ ຊອກຫາວິທີການແກ້ໄຂຮ່ວມກັນໃນຕໍ່ໜ້າ.