(ສປນວ) ວັນທີ 14 ມິຖຸນາ 2023, ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະ ນະກຳ-ສັງຄົມ ແລະ ບັນດາເຜົ່າ ພ້ອມດ້ວຍຄະນະ ໄດ້ລົງຢ້ຽມຢາມສູນສອບເສັງ ປະຈຳສົກຮຽນ 2022-2023 ໂດຍແບ່ງອອກເປັນ 2 ຈຸດ ຄື: ພາກເຊົ້າ, ຈຸດທີ່ 1 ທີ່ສູນສອບເສັງ ມສ ຈອມຄໍາ ເມືອງຈັນທະບູລີ, ໃຫ້ການຕ້ອນ ຮັບໂດຍ ທ່ານ ບຸນທັນ ແສງມະນີ, ຮອງຫົວໜ້າພະແນກສຶກສາທິການ ແລະ ກິລາ ນວ; ພາກບ່າຍ, ຈຸດທີ 2 ທີ່ສູນສອບເສັງ ມປ ໂນນສະຫວ່າງ ເມືອງໄຊເສດຖາ, ໃຫ້ການຕ້ອນຮັບໂດຍ ທ່ານ ສີທົນ ດາວພະສິດ, ຮອງຫົວໜ້າພະແນກສຶກສາທິການ ແລະ ກິລາ ນວ ໃນສອງຈຸດດັ່ງກ່າວ, ມີບັນດາທ່ານ ຫົວໜ້າຫ້ອງການສຶກສາທິການ ແລະ ກິລາ ເມືອງ, ຫົວໜ້າສູນໂຮງຮຽນ, ບັນດາທ່ານຄະນະຮັບຜິດຊອບສູນສອບເສັງ ພ້ອມດ້ວຍຄູອາຈານ ຈຳນວນໜຶ່ງ ເຂົ້າຮ່ວມ.

ໃນການລົງຢ້ຽມຢາມຄັ້ງນີ້, ໄດ້ຮັບຟັງການລາຍງານ ການຈັດຕັ້ງປະຕິບັດກະກຽມໃນໄລຍະການສອບເສັງຈົບຊັ້ນ ມ.4 ແມ່ນໄດ້ອີງໃສ່ຂໍ້ຕົກລົງຂອງລັດຖະມົນຕີ ກະຊວງສຶກສາທິການ ແລະ ກິລາວ່າດ້ວຍການສອບເສັງຈົບຊັ້ນມັດທະຍົມສຶກສາ ສະບັບເລກທີ 1821/ສສກ.ມຍ, ລົງວັນທີ 19 ພຶດສະພາ 2016 ເຊິ່ງໃນສົກຮຽນ 2022-2023 ແມ່ນເລີ່ມແຕ່ວັນທີ 14-16 ມິຖຸນາ 2023 ມີຈໍານວນວິຊາສອບເສັງທັງໝົດ 6 ວິຊາ ຄື: ພາສາລາວ-ວັນນະ ຄະດີ, ວິທະຍາສາດສັງຄົມ, ວິທະຍາສາດທຳມະຊາດ, ສຶກສາພົນລະເມືອງ, ຄະນິດສາດ ແລະ ພາສາອັງກິດ. ໃນນັ້ນ, ສູນສອບເສັງ ມສ ຈອມຄຳ ເມືອງຈັນທະບູລີ ປະກອບ 16 ຫ້ອງສອບເສັງ, ມີ 6 ໂຮງຮຽນ (ພາກລັດ 1 ແຫ່ງ) ຄື: ມສ ລຽວໂຕວ໌, ມສ ຫງວຽນຢູ, ມສ ສຸກສະຫວັດ, ມສ ບໍ່ນາງົວ ແລະ ມຕ ປະຖັມມະວົງ, ມີນັກສອບເສັງທັງໝົດ 389 ຄົນ, ຍິງ 199 ຄົນ; ສູນສອບເສັງ ມປ ໂນນສະຫວ່າງ ເມືອງໄຊເສດຖາ ປະກອບມີ 19 ຫ້ອງສອບເສັງ, ມີ 6 ໂຮງຮຽນ ຄື: ມຕ ໜອງໜ່ຽງ, ມສ ປາດຖະໜາ, ມສ ສາຍຝົນ, ມຕ ເສກກະສັດ2, ມຕ ສີຫາວົງວິທະຍາ, ມີນັກສອບເສັງທັງໝົດ 340 ຄົນ, ຍິງ 161 ຄົນ. ນອກຈາກນັ້ນ, ໃນການຢ້ຽມຢາມດັ່ງກ່າວ, ຄະນະລົງຢ້ຽມຢາມຍັງໄດ້ຮັບຟັງຂໍ້ສະດວກ, ຂໍ້ຫຍຸ້ງຍາກ ໃນການປະຕິບັດວຽກງານການສອບເສັງ, ພ້ອມທັງໄດ້ມີຄຳເຫັນແລກປ່ຽນ ແລະ ໄດ້ຮັບເອົາຄຳສະເໜີຂອງທັງສອງສູນສອບເສັງ ເພື່ອນຳເອົາໄປສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ເປັນຕົ້ນ: ການສະເໜີໃຫ້ມີນິຕິກຳ ດ້ານງົບປະມານກ່ຽວກັບການສອບເສັງໂດຍສະເພາະ ສອບເສັງຈົບຊັ້ນ ມ4, ມ7 ແລະ ສະ ເໜີໃຫ້ພິຈາລະນາ ພາຫະນະ ແລະ ອຸປະກອນຮັບໃຊ້ໃນວຽກງານດັ່ງກ່າວ.