ວັນທີ 24 ສິງຫາ ນີ້ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ (ສສຊ) ແລະ ສະມາຊິກສະພາປະຊາຊົນນະຄອນຫຼວງວຽງຈັນ (ສສ ນວ), ນຳໂດຍ ທ່ານ ປອ. ໄຊສົມພອນ ປະທານ ສະພາແຫ່ງຊາດ ຊຸດທີ IX, ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ ແລະ ມີ ທ່ານ ທະນົງສິດ ເມືອງຈັນ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ, ຮອງຫົວໜ້າພະແນກໄປສະນີ, ໂທລະຄົມມະນາຄົມ ແລະ ການສື່ສານ ນວ, ທ່ານ ຄຳສວຍ ອຸ່ນດາລາ ສະມາຊິກສະພາປະຊາຊົນ ນະຄອນຫຼວງ ຊຸດທີ II, ຫົວໜ້າ ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ, ຮອງເລຂາພັກເມືອງ, ປະທານກວດກາພັກ-ລັດ ເມືອງສັງທອງ, ທ່ານ ບຸນຮອງ ດວງມາລາ, ສະມາຊິກສະພາປະຊາຊົນ ນະຄອນ ຫຼວງ ຊຸດທີ II, ຫົວໜ້າ ຫ້ອງການສາທາລະນະສຸກ ເມືອງສັງທອງ ນວ.

ທ່ານ ປອ ໄຊສົມພອນ ພົມວິຫານ ປະທານ ສພຊ, ສສຊ ເຂດ1 ພ້ອມດ້ວຍຄະນະ ໄດ້ໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ II ໃຫ້ພະນັກງານຫຼັກແຫ່ງ ແລະ ປະຊາຊົນ ໄດ້ຮັບຮູ້ເຊື່ອມຊຶມຢ່າງກ້ວາງຂວາງ ກ່ຽວກັບບັນດາເນື້ອໃນ, ວຽກງານທີ່ສຳຄັນ ໂດຍສະເພາະບັນຫາໄພເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ບັນຫາຢາເສບຕິດ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງພະນັກງານ-ລັດຖະກອນ, ທະຫານ-ຕໍາຫລວດ ແລະ ພໍ່ແມ່ປະຊາຊົນບັນດາເຜົ່າ, ເຊິ່ງລັດຖະບານໄດ້ເລັ່ງສຸມໃສ່ຄົ້ນຄວ້າແກ້ໄຂ. ນອກຈາກນັ້ນ, ໃນໂອກາດດັ່ງກ່າວ ບັນດາທ່ານ ສສຊ ແລະ ສສນວ ກໍໄດ້ສ້າງໂອກາດໃຫ້ປະຊາຊົນປະກອບຄຳຄິດເຫັນ ແລະ ຄຳສະເໜີບັນຫາຕ່າງໆ ເພື່ອສົນທະນາປຶກສາຫາລືຮ່ວມກັນ ໂດຍສະເພາະແມ່ນ ໃຫ້ແກ້ໄຂສ້າງເສັ້ນທາງ ແຕ່ບ້ານເພຍລາດຫາ ບ້ານເຕົາໄຫ ແລະ ເສັ້ນທາງແຕ່ບ້ານນາປໍ ຫາ ບ້ານວັງມ້າ ແລະ ບັນຫາທີ່ຕິດພັນກັບການແກ້ໄຂຄາຄອງຊີບສູງໃນປະຈຸບັນ ເປັນຕົ້ນ: ອັດຕາເງິນເຟີ້, ລາຄາສິນຄ້າແພງ, ໃຫ້ມີການວາງລາຄາສິນຄ້າເປັນລາຄາກາງ ແລະ ໃຫ້ພາກສ່ວນການຄ້າລົງຕິດຕາມສະພາບຕົວຈິງ, ໃຫ້ມີການສະຫງວນອາຊີບໄວ້ໃຫ້ປະຊາຊົນລາວ ຊຶ່ງທັງໝົດນີ້ ສສຊ ປະຈຳເຂດເລືອກຕັ້ງ ແລະ ສສນວ ກໍໄດ້ອະທິບາຍຊີ້ແຈງຕໍ່ຄໍາສະເໜີດັ່ງກ່າວ, ພ້ອມງທັງເກັບກຳ, ບັນທຶກເອົາຄຳສະເໜີຕ່າງໆ ຂອງປະຊາ ຊົນ ເພື່ອສັງລວມ ແລ້ວນຳສະເໜີຕໍ່ພາກສ່ວນກ່ຽວຂ້ອງກໍຄືລັດຖະບານພິຈາລະນາແກ້ໄຂ.