ໃນລະຫວ່າງ ວັນທີ 19-22 ຕຸລາ 2023, ຄະນະຜູ້ແທນສະພາປະຊາຊົນ ນະຄອນຫຼວງວຽງຈັນ ສປປ ລາວ ໄດ້ເດີນທາງໄປຢ້ຽມຢາມ ແລະ ແລກປ່ຽນບົດຮຽນຮ່ວມກັບ ສະພາປະຊາຊົນ ແຂວງເຫງະອ່ານ, ສສ. ຫວຽດນາມ ນໍາພາໂດຍ ສະຫາຍ ນາງ ລຳພອຍ ສີອັກຄະຈັນ, ກຳມະການປະຈຳພັກ ນະຄອນຫຼວງ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະຜູ້ແທນ ຈຳນວນ 25 ທ່ານ.

ໃນການພົບປະຄັ້ງນີ້, ຄະນະຜູ້ແທນ ໄດ້ເດີນທາງໄປວາງພວງມາລາທີ່ຫໍຈາລຶກບ້ານເກີດ ລຸງໂຮ່ຈິມິນ ໂດຍໄດ້ຮັບການຕ້ອນຮັບຈາກ ສະຫາຍ ຫງວຽນ ຍຶ່ ໂຂ່ຍ, ກຳມະການຄະນະບໍລິຫານງານພັກແຂວງ, ຮອງປະທານ ສະພາປະຊາຊົນແຂວງເຫງະອ່ານ ພ້ອມດ້ວຍຄະນະ ແລະ ເດີນທາງໄປຢ້ຽມຂໍ່ານັບ ສະຫາຍ ທາຍ ແທ່ງ ກີ່ວ, ເລຂາພັກແຂວງ, ປະທານ ສະພາປະຊາຊົນ ແຂວງເຫງະອ່ານ ເຊິ່ງຕາງໜ້າຄະນະຜູ້ແທນ ສະພາປະຊາຊົນ ນະຄອນຫຼວງວຽງຈັນ ກໍໄດ້ສະແດງຄວາມຂອບໃຈຕໍ່ ສະຫາຍ ເລຂາພັກແຂວງ ພ້ອມຄະນະ ທີ່ໄດ້ໃຫ້ການຮັບຕ້ອນ ຄະນະຜູ້ແທນສະພາປະຊາຊົນ ນະຄອນຫຼວງວຽງຈັນ ດ້ວຍຄວາມອົບອຸ່ນ ແລະ ເຕັມໄປດ້ວຍໄມຕີຈິດມິດຕະພາບ ພ້ອມທັງລາຍງານຈຸດປະສົງການເຄື່ອນໄຫວໃນຄັ້ງນີ້ ແລະ ບົດຮຽນທີ່ຄະນະຜູ້ແທນໄດ້ຮັບຈາກການແລກປ່ຽນບົດຮຽນ ໂດຍສະເພາະ ການພົບປະສອງຝ່າຍ ລະຫວ່າງ ຄະນະຜູ້ແທນສະພາປະຊາຊົນ ນະຄອນຫຼວງວຽງຈັນ ແລະ ຄະນະຜູ້ແທນ ສະພາປະຊາຊົນ ແຂວງເຫງະອ່ານ. ໃນຕອນທ້າຍການເຂົ້າຢ້ຽມຂໍ່ານັບ ຕາງໜ້າຄະນະຜູ້ແທນ ສະພາປະຊາຊົນ ນະຄອນຫຼວງວຽງຈັນ ຍັງໄດ້ກ່າວຄຳເຫັນ ເພື່ອຂໍເສີມຂະຫຍາຍສາຍພົວພັນຮ່ວມມື, ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ກໍຄື ສະພາປະຊາຊົນ ສອງຊາດລາວ-ຫວຽດນາມ ເວົ້າລວມ, ເວົ້າສະເພາະກໍຄື ນະຄອນຫຼວງວຽງຈັນ ແລະ ແຂວງເຫງະອ່ານ ໃຫ້ໝັ້ນຄົງຂະນົງແກ່ນ ແລະ ສວຍສົດງົດງາມໃນຕໍ່ໜ້າ. ໃນໂອກາດດັ່ງກ່າວ, ຄະນະຜູ້ແທນ ສະພາປະຊາຊົນ ນະຄອນຫຼວງວຽງຈັນ ຍັງໄດ້ຢ້ຽມຊົມຟາມຜະລິດນົມງົວ TRUEMILK, ບັນດາໂຮງຮຽນຜະລິດຂອງບໍລິສັດ TH TRUE Comapy ແລະ ສະຖານທີ່ສຳຄັນຕ່າງໆຂອງ ແຂວງເຫງະອ່ານ.