ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ສະມາຊິກ ສະພາປະຊາຊົນ ນະຄອນຫຼວງວຽງຈັນ ທີ່ສັງກັດຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ພະນັກງານສະພາປະຊາຊົນ ນະຄອນຫຼວງວຽງຈັນ ແລະ ຄະນະຊ່ວຍວຽກ ຂອງຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງ ໄດ້ດຳເນີນຂຶ້ນໃນລະຫວ່າງ ວັນທີ 20 – 21 ກັນຍາ 2023 ໂດຍການເປັນປະທານກອງປະຊຸມຂອງ ທ່ານ ນາງ ລໍາພອຍ ສີອັກຄະຈັນ, ຮອງປະທານ ສະພາປະຊາຊົນ ນະຄອນຫຼວງວຽງຈັນ, ມີບັນດາທ່ານ ສະມາຊິກສະພາປະຊາຊົນ ທີ່ສັງກັດຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ; ປະທານ, ຮອງປະທານຄະນະກຳມະການ, ຄະນະເລຂາທິການ, ພະນັກງານ ຈຳນວນໜຶ່ງເຂົ້າຮ່ວມ.
ກອງປະຊຸມໄດ້ຝຶກອົບຮົມຄັ້ງນີ້, ໄດ້ສຸມໃສ່ເນື້ອໃນບົດຮຽນສຳຄັນ ຈຳນວນ 03 ຫົວຂໍ້ ເປັນຕົ້ນ: ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ພາລະບົດບາດ, ສິດ ແລະ ໜ້າທີ່ຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ; ບົດຮຽນໃນການຕິດຕາມກວດກາແຜນພັດທະນາເສດຖະກິດ-ສັງຄົມ ຂົງເຂດວັດທະນະທຳ-ສັງຄົມ ແລະ ການຕິດຕາມກວດກາຊຸກຍູ້ການແກ້ໄຂບັນຫາຄຳຮ້ອງ, ຄຳສະເໜີຂອງປະຊາຊົນ. ໃນໂອກາດດັ່ງກ່າວ, ບັນດາທ່ານຜູ້ເຂົ້າຮ່ວມ ໄດ້ມີການແລກປ່ຽນຄຳຄິດ-ຄຳເຫັນຕໍ່ບັນດາຫົວຂໍ້ທີ່ໄດ້ນຳສະເໜີ ແລະ ໄດ້ນໍາເອົາບົດຮຽນດັ່ງກ່າວ ໄປຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈິງໃນຕໍ່ໜ້າ ໃຫ້ມີປະສິຕິພາບ ແລະ ໄດ້ຮັບປະສິດທິຜົນສູງຂຶ້ນ.
