(ສປ ນວ) ໃນຕອນບ່າຍ ວັນທີ 02 ມິຖຸນາ 2023, ສະພາປະຊາຊົນ ນະຄອນຫຼວງວຽງຈັນ ໄດ້ເຂົ້າຮ່ວມກອງປະຊຸມປຶກສາຫາລືການແກ້ໄຂບັນຫາຄຳສະເໜີຂອງປະຊາຊົນ ພາຍໃຕ້ການເປັນປະທານຮ່ວມ ລະຫວ່າງ ທ່ານ ນາງ ພິດສະໄໝ ຕົ້ນສະຫວັນ ຮອງປະທານຄະນະກຳມະການເສດຖະກິດ, ແຜນການ ແລະ ການເງີນ ສະພາປະຊາຊົນ ນວ ແລະ ທ່ານ ນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ຜູ້ອຳນວຍການກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ ທີ່ກະຊວງອຸດສາຫະກຳ ແລະ ການຄ້າ, ໂດຍມີບັນດາທ່ານຫົວໜ້າຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງໄຊເສດຖາ, ເມືອງປາກງື່ມ, ທ່ານຮອງເລຂາທິການ ສະພາປະຊາຊົນ ນວ; ບັນດາທ່ານຮອງຜູ້ອຳນວຍການກອງທຶນ, ຫົວໜ້າພະແນກ, ຂະແໜງການທີ່ກ່ຽວຂ້ອງ, ຕົວແທນບັນດາທະນາ ຄານ, ສະຖາບັນການເງີນທີ່ຮັບເງີນຝາກປະຕູຄຳ, ນາຍບ້ານ ແລະ ຕາງໜ້າກຸ່ມຜະລິດບ້ານທ່າຊ້າງ ເມືອງປາກງື່ມ ແລະ ປະຊາຊົນບ້ານໂນນຄໍ້ໃຕ້ ເມືອງໄຊເສດຖາ ໄດ້ໃຫ້ການເຂົ້າຮ່ວມ.

ໃນກອງປະຊຸມດັ່ງກ່າວ, ໄດ້ປຶກສາຫາລື ແລະ ແລກປ່ຽນຄຳເຫັນ ກ່ຽວກັບຄຳສະເໜີຂອງປະຊາຊົນທີ່ສະເໜີຜ່ານບັນດາທ່ານສະມາຊິກສະພາ ໃນບັ້ນລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນ ນວ ໃນໄລຍະຜ່ານມາ ເຊິ່ງກອງປະຊຸມໄດ້ຮັບຟັງການລາຍງານຂອງນາຍບ້ານທ່າຊ້າງ ແລະ ບ້ານໂນນຄໍ້ ດ້ານສະພາບຄວາມຫຍຸ້ງຍາກໃນການເຂົ້າເຖີງແຫຼ່ງທຶນຂອງຫົວໜ່ວຍທຸລະກິດທີ່ ເປັນຕົ້ນ: ການກຳນົດເງື່ອນໄຂຕ່າງໆ ໃນການເຂົ້າເຖີງແຫຼ່ງທຶນດອກເບ້ຍຕໍ່າເຫັນວ່າມີຄວາມຫຍຸ້ງຍາກສັບຊ້ອນ ເຮັດໃຫ້ຊາວກະສິກອນເຂົ້າເຖີງຍາກ. ນອກຈາກນັ້ນ, ໃນໂອກາດດັ່ງກ່າວ ກອງປະຊຸມຍັງໄດ້ຮັບຟັງການຊີ້ແຈງຂອງບັນດາທະນາຄານທຸລະກິດ ແລະ ສະຖາບັນການເງີນທີ່ເປັນຄູ້ຮ່ວມສັນຍາຂອງກອງທຶນ ກ່ຽວກັບບັນຫາດັ່ງກ່າວ.

ໃນຕອນທ້າຍກອງປະຊຸມ, ຄະນະປະທານ ກອງປະຊຸມ ກໍໄດ້ມີຄຳເຫັນແລກປ່ຽນຕໍ່າບັນດາທະນາຄານ, ສະຖາບັນກ່ຽວຂ້ອງ ໃຫ້ນຳເອົາບັນຫາດັ່ງກ່າວໄປພິຈາລະນາຄົ້ນຄວ້າຕື່ມ ເພື່ອສ້າງເງື່ອນໄຂທີ່ເໝາະສົມ ແລະ ສາມາດສະໜອງໃຫ້ຊາວກະສິກອນໄດ້, ພ້ອມກັນນັ້ນ ກໍໄດ້ແນະນຳໃຫ້ບັນດາທະນາຄານ, ສະຖາບັນທີ່ກ່ຽວຂ້ອງ ໃຫ້ມີການເຜີຍແຜ່ ແລະ ແນະນຳອະທິບາຍກ່ຽວກັບເງື່ອນໄຂ, ຂັ້ນຕອນ ໃນການເຂົ້າເຖີງແຫຼ່ງທຶນທີ່ຖືກຕ້ອງໃຫ້ປະຊາຊົນຢູ່ຂັ້ນມືອງ ແລະ ບັນດາກຸ່ມບ້ານ ເພື່ອສ້າງຄວາມເຂົ້າໃຈເພິ່ມຕື່ມ.