(ສປນວ) ໃນໄລຍະ 1 ປີຜ່ານມາ, ສະພາປະຊາຊົນ ນະຄອນຫຼວງວຽງຈັນ ໄດ້ເອົາໃຈໃສ່ເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ດ້ວຍຄວາມຮັບຜິດຊອບສູງ, ເຊິ່ງໄດ້ສະແດງອອກໃນບົດລາຍງານການຈັດ ຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງສະພາປະຊາຊົນ ນະຄອນຫຼວງວຽງຈັນ ທີ່ ທ່ານ ນະຄະເສນ ສີຫາລາດ, ຄະນະປະຈຳ, ເລຂາທິການ ສະພາປະຊາຊົນ ນະຄອນຫຼວງວຽງຈັນ ໄດ້ຂຶ້ນລາຍງານຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນະຄອນຫຼວງວຽງຈັນ ໃນຕອນເຊົ້າຂອງ ວັນທີ 18 ມັງກອນ 2023, ເຊິ່ງໄດ້ຍົກໃຫ້ເຫັນການຈັດຕັ້ງປະຕິບັດວຽກງານຕາມ 3 ພາລະບົດບາດຫຼັກ ຂອງສະພາປະຊາ ຊົນ ນະຄອນຫຼວງ ຄື:

• ດ້ານນິຕິກຳ: ໄດ້ຍົກສູງວຽກງານການສ້າງນິຕິກໍາ ຂອງນະຄອນຫຼວງ ໂດຍມີການປະສານສົມທົບ, ຊຸກຍູ້ອົງ ການປົກຄອງ ແລະ ພາກສ່ວນກ່ຽວຂ້ອງກະກຽມຮ່າງນິຕິກໍາ ຈໍານວນ 4 ສະບັບ ແລະ ດຳເນີນການປະເມີນຄືນການຈັດຕັ້ງປະຕິບັດນິຕິກຳຂອງນະຄອນຫຼວງ ຈຳນວນ 2 ສະບັບ ເພື່ອນຳເຂົ້າລາຍງານ ແລະ ພິຈາລະນາຮັບຮອງເອົາໃນກອງປະຊຸມສະ ໄໝສາມັນ ເທື່ອທີ 4 ຄັ້ງນີ້; ສົມທົບກັບສະພາແຫ່ງຊາດ ປະເມີນຄືນການຈັດຕັ້ງປະຕິບັດກົດໝາຍ ຢູ່ນະຄອນຫຼວງວຽງຈັນ ຈຳນວນ 8 ສະບັບ, ຈັດຕັ້ງທາບທາມ ແລະ ເຂົ້າຮ່ວມຄົ້ນຄວ້າປະກອບຄໍາເຫັນໃສ່ຮ່າງກົດໝາຍ ຈຳນວນ 23 ສະບັບ, ໄດ້ຄົ້ນ ຄວ້າອອກນິຕິກໍາ, ຂໍ້ຕົກລົງ, ມະຕິ, ແຈ້ງການ ແລະ ຄໍາແນະນໍາຕ່າງໆ ຂອງຄະນະປະຈໍາ ສະພາປະຊາຊົນ ຈໍານວນ 28 ສະບັບ ເພື່ອເປັນບ່ອນອີງໃຫ້ແກ່ກົງຈັກການຈັດຕັ້ງຂອງສະພາປະຊາຊົນ ແລະ ພາກສ່ວນກ່ຽວຂ້ອງໃນການຈັດຕັ້ງປະຕິບັດເຄື່ອນໄຫວວຽກງານ. ແຜນການໃນຕໍ່ໜ້າ ຈະສຸມໃສ່ສົມທົບກັບອົງການປົກຄອງ ນະຄອນຫຼວງ ແລະ ພາກສ່ວນກ່ຽວຂ້ອງແຕ່ຫົວ ທີໃນການຄົ້ນຄວ້າສ້າງຮ່າງນິຕິກຳໃຫ້ເປັນໄປຕາມຂັ້ນຕອນ ເພື່ອນຳເຂົ້າພິຈາລະນາໃນກອງປະຊຸມ ສະໄໝສາມັນ ເທືີ່ອທີ 5 ຂອງສະພາປະຊາຊົນ ນະຄອນຫຼວງ ແລະ ຈັດຕັ້ງດຳເນີນການປະເມີນຜົນຄືນການຈັດຕັ້ງປະຕິບັດບັນດານິຕິກຳໃຕ້ກົດໝາຍ ທີ່ສະພາປະຊາຊົນ ນະຄອນຫຼວງ ໄດ້ຮັບຮອງເອົາ ຢ່າງໜ້ອຍ 03 ສະບັບ.
• ດ້ານການຕົກລົງບັນຫາສຳຄັນພື້ນຖານ ຂອງນະຄອນຫຼວງ: ໄດ້ຄົ້ນຄວ້າພິຈາລະນາບັນຫາສໍາຄັນພື້ນຖານ ຂອງນະຄອນຫຼວງ, ວຽກງານຂົງເຂດຕຸລາການ ແລະ ວຽກງານພາຍໃນສະພາປະຊາຊົນ ທັງໝົດ 52 ເນື້ອໃນ ແລະ ໄດ້ອອກເປັນມະຕິ ຈຳນວນ 17 ສະບັບ. ໃນນີ້, ເປັນມະຕິກອງປະຊຸມສະພາປະຊາຊົນ ນະຄອນຫຼວງ ຈຳນວນ 06 ສະບັບ ແລະ ມະຕິກອງປະຊຸມ ຄະນະປະຈຳ ສະພາປະຊາຊົນ ຈຳນວນ 11 ສະບັບ.
• ດ້ານການຕິດຕາມກວດກາ: ໄດ້ລົງເຄື່ອນໄຫວຕິດຕາມກວດກາຂົງເຂດວຽກາງນຕ່າງໆ ໄດ້ທັງໝົດ 63 ຈຸດ, ໃນນີ້, ຂົງເຂດເສດຖະກິດ 22 ຈຸດ, ຂົງເຂດວັດທະນະທຳ-ສັງຄົມ ແລະ ບັນດາເຜົ່າ 24 ຈຸດ, ຂົງເຂດຍຸຕິທຳ 17 ຈຸດ ໂດຍສະເພາະ ໄດ້ລົງເຄື່ອນໄຫວຕິດຕາມກວດກາບັນຫາພົ້ນເດັ່ນທີ່ເກີດຂຶ້ນໃນສັງຄົມ ຈາກການສະເໜີຂອງປະຊາຊົນ ກ່ຽວກັບການຊົດເຊີຍຊັກຊ້າ, ບໍ່ເໝາະສົມ ແລະ ຜົນກະທົບອື່ນໆ ພາຍຫຼັງການຈັດຕັ້ງປະຕິບັດບັນດາໂຄງການພັດທະນາຕ່າງໆ ຢູ່ນະຄອນຫຼວງ ເປັນຕົ້ນ: ໂຄງການລົດໄຟ ລາວ-ຈີນ ແລະ ໂຄງການທ່າບົກ-ທ່ານາແລ້ງ ເຂດເມືອງຫາດຊາຍຟອງ, ໂຄງການກໍ່ສ້າງສາຍສົ່ງໄຟຟ້າແຮງສູງ 230 ກວ ຢູ່ເມືອງປາກງື່ມ ຫາ ເມືອງຫາດຊາຍຟອງ, ໂຄງການປັບປຸງສ້ອມແປງເສັ້ນທາງຫຼວງແຫ່ງຊາດ ເລກທີ 13 ເໜືອ ແລະ ໂຄງການອື່ນໆ ເພື່ອຊຸກຍູ້ພາກສ່ວນກ່ຽວຂ້ອງແກ້ໄຂ. ນອກຈາກນັ້ນ, ໃນໄລຍະປີ 2022 ສະພາປະຊາຊົນ ນະຄອນຫຼວງ ສາມາດຄົ້ນຄວ້າພິຈາລະນາແກ້ໄຂ ແລະ ນຳສົ່ງພາກສ່ວນກ່ຽວຂ້ອງແກ້ໄຂ ທັງໝົດ 140 ເລື່ອງ, ຄະດີແພ່ງ 26 ເລື່ອງ, ຄະດີອາຍາ 17 ເລື່ອງ, ຄຳສະເໜີ 97 ເລື່ອງ ໃນຈຳນວນທັງໝົດ 198 ເລື່ອງ, ກວມເອົາ 70%.

ນອກຈາກວຽກງານທີ່ໄດ້ກ່າວມາຂ້າງເທິງນັ້ນ, ໄລຍະຜ່ານມາ ສະມາຊິກສະພາແຫ່ງຊາດ ແລະ ສະມາຊິກສະພາປະ ຊາຊົນ ນະຄອນຫຼວງ ຍັງໄດ້ນໍາເອົາຜົນສໍາເລັດກອງປະຊຸມສະໄໝສາມັນ ເທື່ອທີ 2 ແລະ ເທື່ອທີ 3 ຂອງສະພາແຫ່ງຊາດ ແລະ ສະພາປະຊາຊົນ ນະຄອນຫຼວງວຽງຈັນ ໄປເຜີຍແຜ່ໃຫ້ຜູ້ມີສິດເລືອກຕັ້ງຮັບຊາບ ໄດ້ທັງໝົດ 310 ຈຸດ. ໃນນັ້ນຂັ້ນບ້ານມີ 261 ຈຸດ, ຂັ້ນເມືອງມີ 09 ຈຸດ, ຂັ້ນພະແນກການ, ຂັ້ນສູນກາງ, ກົມກອງ ແລະ ພາກສ່ວນເອກະຊົນ 31 ຈຸດ. ມີຜູ້ເຂົ້າຮ່ວມຮັບຟັງທັງໝົດ 27,695 ຄົນ, ຍິງ 11,883 ຄົນ ແລະ ສາມາດເກັບກໍາຄໍາສະເໜີຂອງປະຊາຊົນ ທັງໝົດ 512 ຂໍ້. ໃນນີ້, ຂັ້ນນະຄອນຫຼວງ 372 ຂໍ້ ແລະ ຂັ້ນສູນກາງ 140 ຂໍ້, ເຊິ່ງຄໍາສະເໜີທັງໝົດໄດ້ນໍາສົ່ງໃຫ້ພາກສ່ວນກ່ຽວຂ້ອງພິຈາລະນາແກ້ໄຂ. ມາເຖິງປັດຈຸບັນ ໄດ້ຮັບການຊີ້ແຈງທີ່ເປັນລາຍລັກອັກສອນຈາກພາກກ່ຽວຂ້ອງ ທັງໝົດ 22 ພາກ ສ່ວນ, ມີ 233 ຂໍ້;  ເຊິ່ງຄຳຊີ້ແຈງດັ່ງກ່າວຈະໄດ້ນໍາສົ່ງໃຫ້ຄະນະສະມາຊິກສະພາ ສະພາປະຊາຊົນ ນະຄອນຫຼວງ ປະຈໍາເຂດເລືອກຕັ້ງເມືອງ ເພື່ອນໍາໄປເຜີຍແຜ່ໃຫ້ປະຊາຊົນທີ່ຢູ່ພາຍໃນເມືອງຂອງຕົນຮັບຊາບ ພ້ອມທັງມີແຜນເຜີຍແຜ່ຄໍາຊີ້ແຈງດັ່ງ ກ່າວຜ່ານສື່ມວນຊົນ. (ນາງ ໂຮງທ່າວ ຊົງເຢີ)