ໃນຕອນເຊົ້າຂອງວັນທີ 14 ກຸມພາ 2023 ຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ຊຸດທີ II ໄດ້ດຳເນີນກອງປະຊຸມ ປະຈຳປີຂອງຕົນ ພາຍໃຕ້ການເປັນປະທານຂອງ ທ່ານ ອານຸພາບ ຕຸນາລົມ, ປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ໃຫ້ກຽດເຂົ້າຮ່ວມໂດຍ ທ່ານ ອາດສະພັງທອງ, ເຈົ້າຄອງ ນະຄອນຫຼວງວຽງຈັນ, ບັນດາທ່ານຮອງລັດຖະມົນຕີ, ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ບັນດາທ່ານການນຳ ນະຄອນຫຼວງ, ບັນດາທ່ານສະມາຊິກສະພາປະຊາຊົນ ນະຄອນຫຼວງ ພ້ອມດ້ວຍແຂກທີ່ຖືກເຊີນ ແລະ ພະນັກງານ ພາຍໃນສະພາປະຊາຊົນ ນະຄອນຫຼວງວຽງຈັນ ໄດ້ໃຫ້ການເຂົ້າຮ່ວມ.

          ກອງປະຊຸມ ໄດ້ຮັບຟັງການລາຍງານສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງຄະນະສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ, ເຊິ່ງໄລຍະ 1 ປີ ຜ່ານມາ ໄດ້ເອົາໃຈໃສ່ປະກອບຄຳເຫັນໃນການສ້າງ ແລະ ປັບປຸບບັນດາກົດໝາຍ ຂອງສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 3 ແລະ ເທື່ອທີ 4 ທັງໝົດ 16 ສະບັບ; ໃນນັ້ນ ກົດໝາຍສ້າງໃໝ່ 07 ສະບັບ. ໄດ້ສົມທົບກັບສະພາປະຊາຊົນ ນະຄອນຫຼວງວຽງຈັນ ຊຸກຍູ້ອົງການປົກຄອງ ນະຄອນຫຼວງ ແລະ ພາກສ່ວນກ່ຽວຂ້ອງກະກຽມຮ່າງນິຕິກໍາ ຈໍານວນ 04 ສະບັບ ນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນະຄອນຫຼວງ ແລະ ໄດ້ດໍາເນີນການປະເມີນການຈັດຕັ້ງປະຕິບັດນິຕິກໍາຂອງນະຄອນຫຼວງ ຈໍານວນ 02 ສະບັບ. ນອກຈາກນັ້ນ, ໄລຍະຜ່ານມາ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງ ຍັງໄດ້ນໍາເອົາຜົນສໍາເລັດກອງປະຊຸມສະໄໝສາມັນ ເທື່ອທີ 2 ແລະ ເທື່ອທີ 3 ຂອງສະພາແຫ່ງຊາດ ແລະ ສະພາປະຊາຊົນ ນະຄອນຫຼວງວຽງຈັນ ໄປເຜີຍແຜ່ໃຫ້ຜູ້ມີສິດເລືອກຕັ້ງຮັບຊາບ ໄດ້ທັງໝົດ 310 ຈຸດ. ໃນນັ້ນຂັ້ນບ້ານມີ 261 ຈຸດ, ຂັ້ນເມືອງມີ 09 ຈຸດ, ຂັ້ນພະແນກການ, ຂັ້ນສູນກາງ, ກົມກອງ ແລະ ພາກສ່ວນເອກະຊົນ 31 ຈຸດ. ມີຜູ້ເຂົ້າຮ່ວມຮັບຟັງທັງໝົດ 27,695 ຄົນ, ຍິງ 11,883 ຄົນ ແລະ ສາມາດເກັບກໍາຄໍາສະເໜີຂອງປະຊາຊົນ ທັງໝົດ 512 ຂໍ້. ໃນນີ້, ຂັ້ນນະຄອນຫຼວງ 372 ຂໍ້ ແລະ ຂັ້ນສູນກາງ 140 ຂໍ້, ເຊິ່ງຄໍາສະເໜີທັງໝົດໄດ້ນໍາສົ່ງໃຫ້ພາກສ່ວນກ່ຽວຂ້ອງພິຈາລະນາແກ້ໄຂ. ມາເຖິງປັດຈຸບັນ ໄດ້ຮັບການຊີ້ແຈງເປັນລາຍລັກອັກສອນຈາກພາກກ່ຽວຂ້ອງ ທັງໝົດ 22 ພາກສ່ວນ, ມີ 233 ຂໍ້; ຊຶ່ງຄໍາຊີ້ແຈງດັ່ງກ່າວຈະໄດ້ນໍາສົ່ງໃຫ້ຄະ ນະສະມາຊິກສະພາ ສະພາປະຊາຊົນ ນະຄອນຫຼວງ ປະຈໍາເຂດເລືອກຕັ້ງເມືອງ ເພື່ອນໍາໄປເຜີຍແຜ່ໃຫ້ປະຊາຊົນທີ່ຢູ່ພາຍໃນເມືອງຂອງຕົນຮັບຊາບ ພ້ອມທັງມີແຜນເຜີຍແຜ່ຄໍາຊີ້ແຈງດັ່ງກ່າວຜ່ານສື່ມວນຊົນ.

          ກອງປະຊຸມເປັນກຽດເຊີນ ບັນດາກະຊວງທີ່ກ່ຽວຂ້ອງ ມາລາຍງານຕໍ່ບາງວຽກງານທີ່ຂຶ້ນກັບການຄຸ້ມຄອງຂອງຂັ້ນສູນກາງ ມາຈັດຕັ້ງປະຕິບັດຢູ່ນະຄອນຫຼວງວຽງຈັນ ເປັນຕົ້ນ: ການຄຸ້ມຄອງ ແລະ ມາດຕະການແກ້ໄຂການລັກລອບຂຸດຄົ້ນແຮ່ທາດ  ຢູ່ລະຫວ່າງຊາຍແດນ ເມືອງສັງທອງ ນະຄອນຫຼວງວຽງຈັນ ແລະ ເມືອງເຟືອງ ແຂວງວຽງຈັນ ເພື່ອເປັນການຮັບຊາບຂໍ້ມູນ ແລະ ຕິດຕາມກວດກາ, ບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ໄດ້ເຈາະຈິ້ມ ແລະ ສະເໜີແນະກ່ຽວກັບວິທີການ ແລະ ມາດຕະການແກ້ໄຂໃນຕໍ່ໜ້າ. (ນາງ ໂຮງທ່າວ ຊົງເຢີ)