(ສພຊ) – ເພື່ອສະຫຼຸບຕີລາຄາການຈັດຕັ້ງປະຕິບັດລັດຖະທຳມະນູນໃນໄລຍະ 9 ປີຜ່ານມາ ໃນຂອບເຂດທົ່ວປະເທດ ໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດ ຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາທີ່ຕັ້ງຂຶ້ນ ເພື່ອເປັນຂໍ້ມູນໃຫ້ແກ່ການຄົ້ນຄວ້າ, ປັບປຸງເນື້ອໃນຂອງລັດ ຖະທຳມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດໃຫ້ປາ ກົດຜົນເປັນຈິງ. ວັນທີ 29 ກໍລະກົດຜ່ານມາ ທີ່ຫ້ອງປະຊຸມສູນກາງແນວລາວສ້າງຊາດ (ສນຊ) ຈຶ່ງໄດ້ຈັດກອງປະ ຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ໂດຍການເປັນປະທານຮ່ວມຂອງທ່ານ ປອ. ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະ ທ່ານ ສຈ. ປອ. ຈະເລີນ ເຍຍປາວເຮີ ກໍາມະການສູນກາງພັກ, ຮອງປະທານ, ຜູ້ປະຈຳການຄະນະກຳມະການລະດັບຊາດປັບປຸງລັດຖະທຳມະນູນ (ຄລຊ) ທັງເປັນຫົວໜ້າກອງເລຂາຂອງ ຄລຊ; ມີບັນດາທ່ານຮອງປະທານ, ກຳມະການ, ທີ່ປຶກສາ ແລະ ຄູ່ຮ່ວມງານ ສນຊ, ຜູ້ຕາງໜ້າອົງການພາຄີ ແລະ ພະນັກງານ ສນຊ ພ້ອມດ້ວຍແນວລາວສ້າງຊາດນະຄອນຫຼວງວຽງຈັນ, ແນວລາວສ້າງຊາດເມືອງ 9 ເມືອງທົ່ວນະຄອນຫຼວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຫຼາຍກວ່າ 100 ທ່ານ.

ທ່ານ ປອ. ສິນລະວົງ ຄຸດໄພທູນ ໄດ້ກ່າວວ່າ: ເພື່ອເຮັດໃຫ້ການປະເມີນຜົນການຈັດຕັ້ງປະຕິບັດລັດຖະທຳມະນູນຢູ່ສູນກາງແນວລາວສ້າງຊາດ ໄດ້ຮັບໝາກຮັບຜົນ ແລະ ແທດເໝາະກັບສະພາບການຕົວຈິງ, ຂໍໃຫ້ບັນດາທ່ານຈົ່ງລົງເລິກຕີລາຄາການຈັດຕັ້ງປະຕິບັດລັດຖະທຳມະນູນ ຕິດພັນກັບການປະຕິບັດກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງກັບອົງການແນວໂຮມ ເປັນຕົ້ນການສ້າງຄວາມຮັບຮູ້, ເຂົ້າໃຈ ທີ່ຖືກຕ້ອງຕໍ່ລັດຖະທໍາມະນູນ ແລະ ກົດໝາຍ, ການສ້າງສະຕິເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ໃນຖັນແຖວພະນັກງານ-ລັດຖະກອນ, ສະມາຊິກພັກ, ຜູ້ຊົງຄຸນວຸດທິປັນຍາຊົນ, ນັກທຸລະກິດ ແລະ ປະຊາຊົນບັນດາເຜົ່າຢູ່ຂົງເຂດແນວລາວສ້າງຊາດ. ພ້ອມກັນນີ້, ກໍໃຫ້ມີຄໍາຄິດຄໍາເຫັນຕໍ່ການປັບປຸງລັດຖະທໍາມະນູນ ໂດຍສະເພາະການປັບປຸງເນື້ອໃນກ່ຽວກັບການປະຕິບັດສິດ ແລະ ພັນທະຂອງພົນລະເມືອງລາວ, ສາສະໜາ, ຊາວຕ່າງດ້າວ ແລະ ຄົນບໍ່ມີສັນຊາດຢູ່ຂົງເຂດແນວລາວສ້າງຊາດ, ດີແທ້ ໃຫ້ເບິ່ງກວມລວມໄປເຖິງພີ່ນ້ອງເຊື້ອຊາດລາວຢູ່ຕ່າງປະເທດ ເພາະແນວທາງຂອງພັກໄດ້ກຳນົດໄວ້ວ່າ ເຂົາເຈົ້າເປັນສ່ວນໜຶ່ງຂອງວົງຄະນາຍາດແຫ່ງຊາດລາວ ທີ່ຕັດແຍກອອກຈາກກັນບໍ່ໄດ້.

ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການສະເໜີບົດສະຫຼຸບປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015, ການປະກອບຄຳເຫັນຂອງຕົວແທນຈາກພາກສ່ວນຕ່າງໆ ແລະ ບັນດາທ່ານທີ່ເຂົ້າຮ່ວມກອງປະຊຸມຄັ້ງນີ້, ລວມທັງຂໍ້ສະເໜີຕ່າງໆຕໍ່ກັບການປັບປຸງເນື້ອໃນຂອງລັດຖະທຳມະນູນ.

(ພາບ-ຂ່າວ: ສອນສັກ ວັນວິໄຊ)