ດັ້ນກີບເມກ:
ບາງຄົນເກີດມາຈົນ ແລ້ວຮູ້ສຶກທໍ້ຖອຍ, ຮູ້ສຶກວ່າຕົນເອງຂາດທີ່ເພິ່ງ… ແຕ່ບາງຄົນທີ່ສໍາເລັດ ຈະຄິດຕ່າງກັນ ເພາະເຂົາຈະຄິດສ້າງຄວາມເຂັ້ມແຂງໃຫ້ຕົນເອງ ແລ້ວຄ່ອຍລົງມືປະຕິບັດນັບຈາກວຽກນ້ອຍໄປຫາວຽກໃຫຍ່, ບາງຄົນຮຽນພຽງເພື່ອເອົາໃບປະກາດໄປສະໝັກວຽກ ແຕ່ບາງຄົນຕັ້ງໃຈຮຽນໃຫ້ເກີດຄວາມຮູ້ແທ້ຈິງ ເພື່ອໄປເຮັດທຸລະກິດ ຫຼື ສ້າງຕົວເອງດ້ວຍຄວາມຮູ້ຄວາມສາມາດ ດັ່ງນັ້ນ, ວິທີຄິດຂອງຄົນເຮົາຈຶ່ງສໍາຄັນຕັດສິນອະນາຄົດໄດ້.
ທ່ານຜູ້ອ່ານອາດມີວິທີຄິດແຕກຕ່າງກັນ ແຕ່ຄົນທີ່ປະສົບຜົນສໍາເລັດ ເຂົາມີລັກສະນະຄິດບວກ; ເບິ່ງເຫັນຜົນດີຜົນເສຍ ຖ້າຕັດສິນໃຈພາດກໍມີສິດລົ້ມເຫຼວດ້ວຍເຫດນັ້ນ ຄົນທີ່ເຂົາສໍາເລັດເຂົາຈະມີວິທີຄິດໄຕ່ຕອງຫາເຫດຜົນ, ຊັ່ງຊາຜົນໄດ້ຜົນເສຍ ໂດຍໃຊ້ຄວາມພະຍາຍາມ ແລະ ຄວາມອົດທົນເປັນເຄື່ອງມືກ້າວໄປສູ່ເປົ້າໝາຍ, ມີຫຼາຍຄຸນສົມບັດຂອງຄົນສໍາເລັດຄື: ເຂົາຈະຄິດຫາວິທີປັບປຸງພັດທະນາຕົນເອງຕະຫຼອດເວລາ ແຕ່ຄົນລົ້ມເຫຼວມັກບໍ່ປ່ຽນແປງຕົວເອງ ຮັກສາຮູບແບບເດີມເອົາໄວ້ ກໍຈະໄດ້ຮັບຜົນເກົ່າໆ ເພາະມີວິທີດຽວ.
ຖ້າເຮົາສັງເກດຊີວິດຄົນໃນເລື່ອງການສ້າງອະນາຄົດ ບາງຄົນສ້າງໜີ້ (ຢືມເງິນ) ດ້ວຍເຫດຜົນຕ່າງກັນ ຜົນທີ່ໄດ້ຮັບຈຶ່ງອອກມາຕ່າງກັນ; ຄົນສໍາເລັດຈະຢືມເງິນມາຕໍ່ຍອດລາຍໄດ້ສ້າງທຸລະກິດ; ລົງທຶນສ້າງຄວາມເຂັ້ມແຂງໝັ້ນຄົງໃຫ້ຊີວິດກ້າວໜ້າ ແຕ່ສໍາລັບຜູ້ລົ້ມເຫຼວ ຫຼື ຜູ້ບໍ່ພັດທະນາ ກໍຈະຢືມເງິນສ້າງໜີ້ເພີ່ມພຽງແຕ່ເອົາມາໃຊ້ຈ່າຍບໍລິໂພກໃຫ້ຮູ້ສຶກວ່າຕົວເອງຢູ່ດີກິນດີມີຖານະໂກ້ຫຼູໄປແຕ່ລະມື້ ຜູ້ຂຽນພຽງແຕ່ຍົກຕົວຢ່າງຂ້າງເທິງນັ້ນກໍຄົງເປັນທີ່ເຂົ້າໃຈໄດ້ວ່າ: ວິທີຄິດຂອງຄົນເຮົາຈະສໍາເລັດ ຫຼື ລົ້ມເຫຼວມັນຕ່າງກັນ.
ສັງລວມໄດ້ວ່າ: ການທີ່ຈະປະສົບຜົນສໍາເລັດ ມັນອາດບໍ່ຂຶ້ນກັບປະລິມານຄວາມຮູ້-ໃບປະລິນຍາສູງໆຢ່າງດຽວ ແຕ່ປັດໄຈສໍາຄັນກວ່ານັ້ນຄືວິທີຄິດ-ຮູ້ຈັກຄິດຢ່າງສະຫຼາດ, ຂະບວນການສຶກສາ-ຮຽນຮູ້ ທີ່ດີບໍ່ແມ່ນສອນ ຫຼື ຮຽນໃຫ້ໄດ້ຄວາມຮູ້ຢ່າງດຽວ ແຕ່ສອນໃຫ້ຄິດເປັນຮູ້ຈັກເອົາຄວາມຮູ້ມາຄິດຕໍ່ຍອດຈຶ່ງເອີ້ນວ່າເປັນຜູ້ມີປັນຍາ!