ຕອນເຊົ້າຂອງວັນທີ 7 ກຸມພາ 2024 ທີ່ຫໍພິພິທະພັນ ໄກສອນ ພົມວິຫານ ໄດ້ມີພິທີເປີດງານວາງສະແດງຮູບພາບ, ເອກະສານ, ປຶ້ມ ແລະ ວັດຖຸພັນ ພາຍໃຕ້ຫົວຂໍ້: “ຊີວິດ ແລະ ການເຄື່ອນໄຫວປະຕິວັດຂອງປະທານ ຄໍາໄຕ ສີພັນດອນ” ເນື່ອງໃນໂອກາດສະເຫຼີມສະຫຼອງວັນເກີດຂອງເພິ່ນ ຄົບຮອບ 100 ປີ (08/02/1924-08/02/2024) ໂດຍການເຂົ້າຮ່ວມຕັດແຖບຜ້າເປີດງານດັ່ງກ່າວຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ; ເຂົ້າຮ່ວມມີບັນດາສະຫາຍການນໍາຂັ້ນສູງ ແລະ ອະດີດການນໍາຂັ້ນສູງຂອງພັກ-ລັດ, ພັນລະຍາຂອງປະທານ ຄໍາໄຕ ສີພັນດອນ ພ້ອມດ້ວຍລູກຫຼານ, ບັນດາທ່ານລັດຖະມົນຕີ-ຮອງລັດຖະມົນຕີ ແລະ ແຂກທີ່ຖືກເຊີນ ເຊິ່ງຄະນະຂອງສະພາແຫ່ງຊາດນຳໂດຍສະຫາຍ ສິງຄໍາ ວົງພະຈັນ ຮອງເລຂາຄະນະພັກຮາກຖານ, ຮອງເລຂາທິການສະພາແຫ່ງຊາດ.

ໃນພິທີ, ທ່ານ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ໄດ້ກ່າວເປີດພິທີວ່າ: ເພື່ອສ້າງຂະບວນການອັນຄຶກຄື້ນເນື່ອງໃນວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ, ພວກເຮົາພ້ອມກັນຈັດງານວາງສະແດງຄັ້ງນີ້ ເພື່ອລະນຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງເພິ່ນທີ່ມີຕໍ່ປະເທດຊາດ ແນໃສ່ຮຽນຮູ້ ແລະ ນໍາເອົາແບບຢ່າງທີ່ດີຂອງເພິ່ນ ໝູນໃຊ້ເຂົ້າໃນການຈັດຕັ້ງ, ເຄື່ອນໄຫວ ແລະ ການດໍາລົງຊີວິດຂອງພະນັກງານ, ສະມາຊິກພັກ, ປະຊາ ຊົນ ແລະ ຊັ້ນຄົນຕ່າງໆ ເພື່ອສືບຕໍ່ພັດທະນາປະເທດຊາດ ກ້າວຂຶ້ນຕາມອຸດົມການຂອງພັກຢ່າງມີໄຊ. ງານວາງສະ ແດງໄດ້ແບ່ງອອກເປັນ 5 ພາກຄື: ພາກທີ 1: ບ້ານເກີດເມືອງນອນ, ໄລຍະເຍົາໄວ ແລະ ໄລຍະໄວໜຸ່ມຂອງປະ ທານ ຄໍາໄຕ ສີພັນດອນ (1924-1946); ພາກທີ 2: ເຂົ້າຮ່ວມຂະບວນການຕໍ່ສູ້ເພື່ອຄວາມເປັນເອກະລາດ ແລະ ອິດສະຫຼະພາບ ຕ້ານກັບການຮຸກຮານຢຶດຄອງຂອງພວກລ່າເມືອງຂຶ້ນແບບເກົ່າ ແລະ ຂຸນເສິກຍີ່ປຸ່ນ (1947-1954); ພາກທີ 3: ປະທານ ຄໍາໄຕ ສີພັນດອນ ປະກອບສ່ວນນໍາພາການປະຕິວັດຊາດ ປະຊາທິປະໄຕ ໃນພາລະ ກິດຕໍ່ສູ້ຕ້ານການຮຸກຮານຂອງຈັກກະພັດອາເມລິກາ ແລະ ລູກມື (1955-1975); ພາກທີ 4: ປະທານ ຄໍາໄຕ ສີພັນດອນ ພ້ອມກັບສູນກາງພັກປະຊາຊົນ ປະຕິວັດລາວ ໄດ້ນໍາພາ-ຊີ້ນໍາພາລະກິດປົກປັກຮັກສາ ແລະ ສ້າງສາປະ ເທດຊາດ, ສືບຕໍ່ນໍາພາພາລະກິດປ່ຽນແປງໃໝ່ຮອບດ້ານມີຫຼັກການຂອງພັກຢ່າງມີໄຊຕະຫຼອດມາ (1976-ປັດຈຸ ບັນ); ພາກທີ 5: ປະທານ ຄໍາໄຕ ສີພັນດອນ ກັບວຽກງານການຕ່າງປະເທດ. ໃນຈໍານວນ 5 ພາກດັ່ງກ່າວປະກອບມີບັນດາຮູບພາບວາງສະແດງ 275 ແຜ່ນ, ເອກະສານ 30 ສະບັບ ແລະ ວັດຖຸພັນ 20 ລາຍການ.

ທ່ານ ໄຊຍະລາດ ພົງຍາລັກ ຫົວໜ້າກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານຜູ້ນຳປະຕິວັດ, ຫ້ອງວ່າການສູນກາງພັກ ໄດ້ກ່າວວ່າ: ງານດັ່ງກ່າວນີ້ ກໍເພື່ອໂຄສະນາເຜີຍແຜ່ຊີວິດ ແລະ ການເຄື່ອນໄຫວປະຕິວັດຂອງປະທານ ຄໍາໄຕ ສີພັນດອນ ທີ່ໄດ້ອຸທິດສະຕິປັນຍາ, ກໍາລັງວັງຊາ ປະກອບສ່ວນອັນໃຫຍ່ຫຼວງໃຫ້ແກ່ພາລະກິດປະຕິວັດຂອງພັກ, ຂອງປະຊາຊົນລາວບັນດາເຜົ່າໃນໄລຍະຜ່ານມາ ເພື່ອໃຫ້ມວນຊົນທັງພາຍໃນ ແລະ ຕ່າງປະເທດ ຮັບຮູ້ເຂົ້າໃຈຢ່າງກວ້າງຂວາງເລິກເຊິ່ງ. ພ້ອມດຽວກັນນີ້, ເພື່ອສ້າງເງື່ອນໄຂໃຫ້ພະນັກງານ, ສະມາຊິກພັກ, ນັກຮົບ ແລະ ປະຊາຊົນ ໄດ້ສຶກສາຮໍ່າຮຽນແບບຢ່າງອັນໃສແຈ້ງ, ຄຸນສົມບັດສິນທໍາປະຕິວັດ ແລະ ຄຸນງາມ ຄວາມດີຜົນງານອັນໃຫຍ່ຫຼວງ ແລະ ແບບຢ່າງທີ່ດີເລີດຂອງປະທານ ຄໍາໄຕ ສີພັນດອນ; ທັງເປັນການສຶກສາອົບຮົມທາງດ້ານການເມືອງແນວຄິດໃຫ້ພະນັກງານ, ສະມາຊິກພັກ, ທະຫານ, ຕໍາຫຼວດ, ນັກຮຽນຮູ້ ຕະຫຼອດເຖິງປະຊາ ຊົນລາວບັນດາເຜົ່າ, ແຂກພາຍໃນ ແລະ ຕ່າງປະເທດ ຮັບຮູ້ເຖິງຜົນງານການເຄື່ອນໄຫວຂອງປະທານ ຄໍາໄຕ ສີພັນດອນ ແລະ ຜູ້ນໍາພັກ-ລັດທ່ານອື່ນໆ.

ງານວາງສະແດງຮູບພາບ, ເອກະສານ, ປຶ້ມ ແລະ ວັດຖຸພັນ ພາຍໃຕ້ຫົວຂໍ້: “ຊີວິດ ແລະ ການເຄື່ອນໄຫວປະຕິວັດຂອງປະທານ ຄໍາໄຕ ສີພັນດອນ” ໄດ້ເລີ່ມເປີດໃຫ້ບັນດາທ່ານຜູ້ທີ່ມີຈຸດປະສົງເຂົ້າຊົມ ແມ່ນສາມາດເຂົ້າມາໄດ້ໃນວັນ ແລະ ເວລາລັດຖະການ ໂດຍງານຄັ້ງນີ້ຈັດຂຶ້ນເປັນເວລາ 3 ເດືອນ ນັບແຕ່ມື້ເປີດງານ ເຊິ່ງຄົນລາວເຮົາແມ່ນເຂົ້າຊົມໂດຍບໍ່ເສຍຄ່າ, ສ່ວນຄົນຕ່າງປະເທດ ແມ່ນໄດ້ຊື້ປີ້ເຂົ້າຊົມ ໃນລາຄາ 5.000 ກີບ.