ຕອນບ່າຍວັນທີ 24 ທັນວາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ເປີດກອງປະຊຸມລາຍງານການກະກຽມບັນດາເນື້ອໃນທີ່ຈະນໍາເຂົ້າຜ່ານໃນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ II, ໂດຍການເປັນປະທານຂອງທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ, ມີທ່ານ ຄໍາເຜີຍ ງອນວັນຄໍາ ຮອງປະທານສະພາປະຊາຊົນແຂວງ, ບັນດາທ່ານໃນຄະນະປະຈໍາ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງພາຍໃນສະພາປະຊາຊົນແຂວງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານຫຍໍ້ ຂອງແຕ່ລະອະນຸກໍາມະການ ກ່ຽວກັບການກະກຽມຄວາມພ້ອມທາງດ້ານພິທີການ, ດ້ານບໍລິຫານ ແລະ ດ້ານເນື້ອໃນຕ່າງໆ ທີ່ຈະນໍາເຂົ້າຜ່ານໃນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ II. ຫຼັງຈາກນັ້ນ, ບັນດາທ່ານໃນຄະນະປະຈໍາ, ບັນດາອະນຸກໍາມະການກ່ຽວຂ້ອງໄດ້ມີຄໍາຄິດຄໍາເຫັນແລກປ່ຽນ ແລະ ປຶກສາຫາລືກັນ ຢ່າງກົງໄປກົງມາ.
ປະທານກອງປະຊຸມໄດ້ມີຄໍາເຫັນ ແລະ ມີທິດຊີ້ນໍາຕໍ່ການກະກຽມກອງປະຊຸມ, ເຊິ່ງໃນໄລຍະຜ່ານມາທາງຄະນະປະຈໍາສະພາປະຊາຊົນແຂວງ, ໄດ້ອອກຂໍ້ຕົກລົງແຕ່ງຕັ້ງບັນດາອະນຸກໍາມະການຕ່າງໆ, ໄດ້ມີແຜນກໍານົດບັນດາຫົວຂໍ້ໃຫ້ພະແນກການ, ອົງການ ແລະ ໃຫ້ອະນຸກໍາມະການກ່ຽວຂ້ອງປະສານສົມທົບກັບພາກສ່ວນຕ່າງໆໃນກະກຽມບົດລາຍງານຕໍ່ກອງປະຊຸມ ແລະ ເຫັນວ່າສໍາເລັດໃນເບື້ອງຕົ້ນ, ພ້ອມທັງກໍານົດວັນສົ່ງບົດລາຍງານດັ່ງກ່າວໃຫ້ທາງສະພາປະຊາຊົນແຂວງ. ຕາມການຕົກລົງເຫັນດີກອງປະຊຸມຄັ້ງນີ້ຈະຈັດຂື້ນຢູ່ໃນລະຫວ່າງວັນທີ 13-15 ມັງກອນ 2025 ທີ່ຈະມາເຖິງນີ້ ແລະ ພ້ອມນັ້ນທ່ານຍັງໄດ້ຮຽກຮ້ອງໃຫ້ບັນດາຄະນະກໍາມະການ ປະສານສົມທົບກັບພະແນກການ, ອົງການ ເພີ່ມເຕີ່ມເພື່ອຄວາມເປັນເອກະພາບດ້ານເນື້ອໃນ ແລະ ໂຕເລກ, ພ້ອມທັງຮີບຮ້ອນສົ່ງບົດລາຍງານ ເພື່ອທີ່ຈະສົ່ງຕໍ່ໃຫ້ບັນດາທ່ານສະມາຊິກສະພາປະຊາຊົນແຂວງ ຄົ້ນຄວ້າຢ່າງເລິກຊິ່ງ, ຖີ່ຖ້ວນຕໍ່ບັນດາເນື້ອໃນ ແລະ ຮັບປະກັນໃນການພິຈາລະນາ, ຮັບຮອງເອົາໃນກອງປະຊຸມ ໃຫ້ມີປະສິດທິພາບ ແລະ ປະສິດທິຜົນສູງ.
ພາບ/ຂ່າວ: ສພຂ.