ໃນວັນທີ 2 ສິງຫາ 2021 ທ່ານ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກຳມາທິການກົດໝາຍ ທັງເປັນຮອງຫົວໜ້າຄະນະຮັບຜິດຊອບສະເຫລີມສະຫລອງວັນລັດຖະທຳມະນູນແຫ່ງຊາດ ຄົບ ຮອບ 30 ປີ ໄດ້ໃຫ້ສຳພາດເນື່ອງໃນໂອກາດວັນລັດຖະທຳມະນູນແຫ່ງຊາດ ທີ່ໄດ້ໝູນວຽນມາຄົບຮອບ 30 ປີ (15/8/1991-15/812021) ວ່າ:
ວັນລັດຖະທຳມະນູນແຫ່ງຊາດ ແຫ່ງ ສປປລາວ ຄົບຮອບ 30 ປີ ໝາຍເຖິງວັນປະກາດໃຊ້ລັດຖະທຳມະນູນ ໄດ້ໝູນວຽນມາຄົບຮອບ 30 ປີພໍດີ ໃນວັນທີ 15 ສິງຫາ 2021 ຈຸດປະສົງຫລັກໆຂອງວັນລັດຖະທຳມະນູນແຫ່ງຊາດ ກໍແມ່ນຖືເອົາໂອກາດວັນປະກາດໃຊ້ລັດຖະທຳມະນູນ ເພື່ອສຳຫລວດຕີລາຄາຄືນການປະຕິບັດລັດຖະທຳມະນູນຂອງອົງການແຫ່ງອຳນາດລັດທຸກຂັ້ນ ກໍຄືທຸກພາກສ່ວນໃນສັງຄົມ ແລະ ພົນລະເມືອງລາວທຸກທົ່ວໜ້າໃນແຕ່ລະປີ ກໍຄືຕະຫລອດໄລຍະ 30 ປີທີ່ຜ່ານມາ ໃຫ້ເຫັນໄດ້ຄວາມໝາຍສຳຄັນຂອງລັດຖະທຳມະນູນ ເຫັນໄດ້ດ້ານດີ, ຜົນງານ, ດ້ານອ່ອນຂໍ້ຄົງຄ້າງ, ສາເຫດພາໃຫ້ມີດ້ານດີ, ດ້ານອ່ອນ, ບົດຮຽນທີ່ຖອດຖອນໄດ້ ເພື່ອກຳນົດທິດທາງຈັດຕັ້ງປະຕິບັດໃນຕໍ່ໜ້າ ໃຫ້ສອດຄ່ອງ, ຖືກຕ້ອງແທດຕົວຈິງ ແລະ ມີປະສິດທິພາບ, ປະສິດທິຜົນ ແນໃສ່ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃຫ້ສູງຂຶ້ນໃນທົ່ວສັງຄົມ, ປັບປຸງສະຕິຊາດ ເອກະພາບເປັນອັນໜຶ່ງອັນດຽວຂອງທົ່ວປວງຊົນລາວທັງຊາດ; ລັດຖະທຳມະນູນ ແຫ່ງ ສປປລາວ ແມ່ນກົດໝາຍພື້ນຖານຂອງລັດເຮົາທີ່ກຳນົດຫລັກການໃຫຍ່ໆກ່ຽວກັບລະບອບການເມືອງ, ເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ສິດ ແລະ ພັນທະພື້ນຖານຂອງພົນລະເມືອງລາວ, ການຈັດຕັ້ງລະບົບແຫ່ງອຳນາດລັດຂັ້ນຕ່າງໆ, ພາສາ, ຕົວອັກສອນ, ເຄື່ອງໝາຍຊາດ, ທຸງຊາດ, ເພງຊາດ, ສະກຸນເງິນ ແລະ ນະຄອນ ຫລວງ ເຊິ່ງລ້ວນແຕ່ເປັນບັນຫາພື້ນຖານຂອງຊາດ, ຂອງລະບອບປະຊາທິປະໄຕປະຊາຊົນ ພາຍໃຕ້ການນຳພາຂອງພັກປະຊາຊົນປະຕິວັດລາວ ພຽງແຕ່ພັກດຽວເທົ່ານັ້ນ ທັງສ່ອງແສງເຖິງຄວາມມຸ່ງມາດປາຖະໜາອັນແຮງກ້າຂອງປວງຊົນລາວທັງຊາດ ແນໃສ່ສ້າງປະເທດລາວໃຫ້ເປັນປະເທດ: ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ ຢ່າງແທ້ຈິງ ທັງເປັນການຢືນຢັນຕໍ່ຊາວໂລກກ່ຽວກັບຄວາມເປັນເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງຊາດ ແລະ ການດຳລົງຄົງຕົວທີ່ຕັດແຍກອອກຈາກກັນບໍ່ໄດ້ ຂອງທຸກຊົນເຜົ່າພາຍໃນຊາດ ທຸກການກະທຳທີ່ແບ່ງແຍກ, ຈຳແນກ, ດູໝິ່ນປະໝາດ ລະຫວ່າງຊົນເຜົ່າ ລ້ວນແຕ່ເປັນການລະເມີດລັດຖະທຳມະນູນ ແຫ່ງ ສປປລາວ ແລະ ຕ້ອງໄດ້ຖືກລົງໂທດຕາມກົດໝາຍຢ່າງເຂັ້ມງວດ ເໝາະສົມ.
ຕອນທ້າຍ, ທ່ານຮອງປະທານສະພາແຫ່ງຊາດ ຍັງໄດ້ກ່າວຕື່ມອີກວ່າ: ຂໍໃຫ້ປະຊາຊົນລາວບັນດາເຜົ່າ, ຊັ້ນຄົນ ແລະ ສາສະໜາ ຈົ່ງພ້ອມກັນສາມັກຄີເປັນຈິດໜຶ່ງໃຈດຽວ ຢູ່ອ້ອມຂ້າງພັກ ແລະ ລັດເຮົາ ເພື່ອສືບຕໍ່ປົກປັກຮັກສາ ແລະ ສ້າງສາປະເທດຊາດຂອງພວກເຮົາໃຫ້ບັນລຸຈຸດໝາຍ: ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີເປັນປຶກແຜ່ນ, ມີປະຊາທິປະໄຕ ແລະ ຍຸຕິທຳ.

ແຫຼ່ງຂ່າວທີ່ມາ: ສະພາແຫ່ງຊາດ