(ສພຊ) ກໍາມາທິການການຕ່າງປະເທດ, ສະພາແຫ່ງຊາດ ໄດ້ເປີດກອງປະຊຸມເປີດກວ້າງເພື່ອລະດົມແນວຄວາມຄິດໃສ່ຮ່າງມະຕິຂອງຄະນະປະຈຳສະພາແຫ່ງຊາດ ວ່າດ້ວຍລະບຽບການໃຫ້ສັດຕະຍາບັນແກ່ສົນທິສັນຍາສາ ກົນ ໃນລະຫວ່າງວັນທີ 20-21 ທັນວາ 2023 ທີ່ເມືອງວັງວຽງ ແຂວງວຽງຈັນ, ໂດຍການເປັນປະທານຂອງທ່ານ ນາງ ວັນດີ ບຸດທະສະວົງ ຮອງປະທານກຳມາທິການການຕ່າງປະເທດ; ມີບັນດາຫົວໜ້າ-ຮອງຫົວໜ້າກົມຈາກຫ້ອງວ່າການສຳນັກງານປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງການຕ່າງປະເທດ, ກະ ຊວງແຮງງານ ແລະ ສະຫວັດດີການສັງຄົມ ພ້ອມທັງບັນດາຄະນະກົມ, ຄະນະພະແນກ ແລະ ວິຊາການທີ່ກ່ຽວ ຂ້ອງພາຍໃນສະພາແຫ່ງຊາດ ເຂົ້າຮ່ວມຈຳນວນ 35 ທ່ານ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອລະດົມຄວາມຄິດເຫັນໃສ່ຮ່າງມະຕິຂອງຄະນະປະຈຳສະພາແຫ່ງຊາດ ວ່າດ້ວຍລະບຽບການໃຫ້ສັດຕະຍາບັນແກ່ສົນທິສັນຍາສາກົນ ແລະ ຮັບຟັງການເຜີຍແຜ່ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕິດຕາມ, ກວດກາການຜັນຂະຫຍາຍມາດຕາຂອງກົດໝາຍທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ແລະ ການສະເໜີກ່ຽວກັບສະພາບການສ້າງ ແລະ ປະຕິບັດສົນທິສັນຍາໃນໄລຍະຜ່ານມາ ຂອງ ສປປລາວ.

ບັນດາທ່ານຜູ້ແທນເຂົ້າຮ່ວມກອງປະຊຸມ ໄດ້ມີການຄົ້ນຄວ້າລະດົມແນວຄວາມຄິດປະກອບຄຳຄິດຄຳເຫັນ ຕໍ່ຮ່າງມະຕິສະບັບດັ່ງກ່າວຢ່າງມີຈຸດສຸມ, ກົງໄປກົງມາ ແລະ ເປັນຂະບວນຟົດຟື້ນ ເພື່ອເຮັດໃຫ້ເນື້ອໃນມີຄວາມຄົບຖ້ວນສົມບູນ ແລະ ສອດຄ່ອງກັບລະບຽບກົດໝາຍ ແລະ ສະພາບຄວາມເປັນຈິງ.

ໃນຕອນທ້າຍ, ປະທານກອງປະຊຸມໄດ້ຕີລາຄາສູງຕໍ່ຄະນະຮັບຜິດຊອບການຮ່າງມະຕິ ແລະ ບັນດາຄໍາຄິດ ຄໍາເຫັນ ແລະ ຂໍ້ສະເໜີແນະຕ່າງໆ ອັນໄດ້ເຮັດໃຫ້ກອງປະຊຸມເປີດກວ້າງລະດົມຄວາມຄິດໃສ່ຮ່າງມະຕິດັ່ງກ່າວ ມີເນື້້ອໃນຄົບຖ້ວນ ແລະ ສໍາເລັດຕາມລະດັບຄາດໝາຍ ແນໃສ່ການຄົ້ນຄວ້າ, ພິຈາລະນາໃຫ້ສັດຕະຍາບັນແກ່ສົນທິ ສັນຍາ ແລະ ສັນຍາສາກົນ ມີຄວາມເປັນເອກະພາບກັນ, ຖືກຕ້ອງ, ສອດຄ່ອງກັບລັດຖະທຳມະນູນ, ກົດໝາຍ ແລະ ລະບຽບການຕ່າງໆຂອງ ສປປລາວ; ພ້ອມທັງ, ສະແດງຄວາມຍ້ອງຍໍຊົມເຊີຍຕໍ່ບັນດາທ່ານວິທະຍາກອນທີ່ໄດ້ຂຶ້ນສະເໜີບົດເພື່ອເຜີຍແຜ່ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕິດຕາມກວດກາ, ການຜັນຂະ ຫຍາຍມາດຕາຂອງກົດໝາຍ ທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ແລະ ສະພາບການສ້າງ ແລະ ການປະຕິ ບັດສົນທິສັນຍາໃນໄລຍະຜ່ານມາ ໃຫ້ບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ໄດ້ເຂົ້າໃຈແຈ້ງຂຶ້ນກວ່າເກົ່າ ແລະ ນຳໄປຈັດຕັ້ງປະຕິບັັດໃຫ້ມີປະສິດທິຜົນສູງ.