(ສພຊ) ເພື່ອເຝິກອົບຮົມຮ່າງປື້ມຄູ່ມື 2 ສະບັບ ຂອງສະພາແຫ່ງຊາດ ໃຫ້ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃຫ້ມີຄວາມຮັບຮູ້ ແລະ ເຂົ້າໃຈບັນດາຮ່າງເນື້ອໃນຂອງປື້ມຄູ່ມືດັ່ງກ່າວຢ່າງກວ້າງຂວາງ ແລະ ເລິກເຊິ່ງ; ເພື່ອມອບຮ່າງປຶ້ມຄູ່ມືເຫລົ່ານັ້ນ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ໄດ້ຮັບການເຝິກອົບຮົມແລ້ວນັ້ນ ນຳໄປຈັດຕັ້ງປະຕິບັດທົດລອງ ແລະ ທາບທາມຄຳຄິດຄຳເຫັນນຳປະຊາຊົນຢູ່ພາຍໃນເມືອງຂອງຕົນ ແລະ ສືບຕໍ່ນຳມາປັບປຸງຮ່າງປຶ້ມຄູ່ມືໃຫ້ມີຄວາມໜັກແໜ້ນ, ຮັດກຸມ ແລະ ສົມບູນຂຶ້ນ.
ກອງປະຊຸມສໍາມະນາລະດົມຄວາມຄິດເຫັນໃສ່ຮ່າງປຶ້ມຄູ່ມື 2 ສະບັບຂອງສະພາແຫ່ງຊາດ ໄດ້ຈັດຂຶ້ນໃນວັນທີ 12 ສິງຫາຜ່ານມາ ທີ່ເມືອງແປກ ແຂວງຊຽງຂວາງ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ ມີບັນດາຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງແຂວງຊຽງຂວາງ ແລະ ແຂວງຜົ້ງສາລີ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ບັນດາທ່ານຊ່ຽວຊານສ້າງຮ່າງປຶ້ມຄູ່ມື ແລະ ບັນດາທ່ານຄະນະກົມ, ຕາງໜ້າອົງການເຮວວີຕັດ ແລະ ກອງເລຂາຊ່ວຍວຽກ ພ້ອມດ້ວຍແຂກຖືກເຊີນ.
ກອງປະຊຸມໄດ້ຮັບຟັງການສະເໜີຮ່າງປຶ້ມຄູ່ມືລົງພົບປະປະຊາຊົນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ; ຮັບຟັງການສະເໜີຮ່າງປຶ້ມຄູ່ມືການພິຈາລະນາ ແລະ ແກ້ໄຂສາຍດ່ວນ ຈາກບັນດານັກວິທະຍາກອນ ຈາກນັ້ນ ກໍໄດ້ຜັດປ່ຽນກັນປະກອບຄໍາຄິດ ຄໍາເຫັນໃສ່ຮ່າງປຶ້ມຄູ່ມືດັ່ງກ່າວ ເພື່ອໃຫ້ມີເນື້ອໃນຄົບຖ້ວນ, ແທດເໝາະກັບການປະຕິບັດຕົວຈິງ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກຄະນະເລຂາທິການສະພາແຫ່ງຊາດ ແລະ ອົງການເຮວວີຕັດ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)