ຕອນເຊົ້າຂອງວັນພະຫັດ, ວັນທີ 4 ພຶດສະພາ 2023, ຢູ່ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງ, ສະ ພາປະຊາຊົນແຂວງອຸດົມໄຊ ໄດ້ສືບຕໍ່ຈັດກອງປະຊຸມ ທາບ ທາມຄຳເຫັນໃສ່ຮ່າງກົດໝາຍ 11 ສະບັບ ເປັນມື້ທີ 2, ໂດຍການເປັນປະທານຂອງທ່ານ ຄໍາມະນີ ໄຊດວງຕາ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04, ປະທານຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ອົງການທຽບເທົ່າ, ສອງກໍາລັງ ປກຊ-ປກສ, ແຂກເຊີນ ແລະ ຄະນະຮັບຜິດຊອບພາຍໃນສະພາປະຊາຊົນແຂວງ ເຂົ້າຮ່ວມ.
ກອງປະຊຸມ, ບັນດາຜູ້ແທນຈະໄດ້ປະກອບຄໍາຄິດເຫັນໃສ່ 3 ຮ່າງກົດໝາຍຄື: ຮ່າງກົດໝາຍວ່າດ້ວຍ ການຈັດຫາງານ, ກົດໝາຍວ່າດ້ວຍ ການປົກປ້ອງສິດ ແລະ ຜົນປະ ໂຫຍດຂອງເດັກ ແລະ ກົດໝາຍວ່າດ້ວຍ ທະນາຄານທຸລະກິດ, ພາຍຫລັງທີ່ຄະນະຮັບຜິດຊອບໄດ້ຜ່ານບົດສະເໜີກ່ຽວກັບການສ້າງ ແລະ ປັບປຸງກົດໝາຍ ບັນດາທ່ານຜູ້ແທນກອງປະຊຸມ ໄດ້ເຊີດຊູຄວາມຮັບຜິດຊອບ ການເມືອງຂອງຕົນຕາມສິດ ແລະ ໜ້າທີ່ ປະກອບຄໍາຄິດຄໍາເຫັນໃສ່ບັນດາເນື້ອໃນຂອງຮ່າງກົດໝາຍຕາມການສະເໜີເຈາະຈີ້ມຂອງຄະນະຮັບຜິດຊອບ ແລະ ບັນຫາອື່ນໆ ຢ່າງເປັນຂະບວນຟົດຟື້ນ, ເພື່ອຮັບປະກັນໃຫ້ແກ່ການ ປະຕິບັດຕາມຂັ້ນຕອນການສ້າງ ແລະ ປັບປຸງກົດໝາຍ ທີ່ກຳນົດໄວ້ໃນກົດໝາຍວ່າດ້ວຍການສ້າງນິຕິກຳ ໃຫ້ມີຄວາມຖືກຕ້ອງ.
ພາບ/ຂ່າວ: ແສງພອນ ອິນນະລົງ.