ຄະນະປະທານ
ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄຳມ່ວນ ຊຸດທີ II ໄດ້ຈັດຂຶ້ນຢູ່ທີ່ສະໂມສອນຫຼັກ 4 ເຊິ່ງໃນວັນທີ 24 ມັງກອນ 2024 ແມ່ນເປັນມື້ທີ 2 ຂອງກອງປະຊຸມໂດຍການນຳພາດໍາເນີນກອງປະຊຸມຂອງທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ ເຂົ້າຮ່ວມມີບັນດາທ່ານຄະນະປະທານກອງປະຊຸມ, ທ່ານ ວັນໄຊ ພອງສະຫັວນ ເຈົ້າແຂວງໆຄໍາມ່ວນ; ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ບັນດາທ່ານສະມາຊິກສະພາປະຊາຊົນຂັ້ນແຂວງຈາກ 10 ເຂດເລືອກຕັ້ງທົ່ວແຂວງຄໍາມ່ວນ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນ.
ໃນນັ້ນແມ່ນຈະໄດ້ຮັບຟັງການຊີ້ແຈງ ແລະ ຕອບຄໍາຊັກຖາມໃນບາງດ້ານຈາກສະມາຊິກສະພາປະຊາຊົນຂັ້ນແຂວງ ໃນຂົງເຂດວຽກງານແຮງງານ ແລະ ສະຫວັດດີການສັງຄົມ, ຂົງເຂດກະສິກຳ ແລະ ປ່າໄມ້, ຂົງເຂດອຸດສາຫະກຳ ແລະ ການຄ້າ, ຂົງເຂດປ້ອງກັນຄວາມສະຫງົບ, ທະນາຄານແຫ່ງ ສປປ ລາວ ປະຈຳພາກກາງ ແລະ ຮັບຟັງການຊີ້ແຈງສັງລວມ ຂອງທ່ານເຈົ້າແຂວງຄຳມ່ວນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2023, ທິດທາງແຜນການ ປະຈຳປີ 2024 ແລະ ການຈັດຕັ້ງປະຕິບັດ 2 ວາລະແຫ່ງຊາດ ຢູ່ພາຍໃນແຂວງຄຳມ່ວນ.
ສສຂ ປະກອບຄໍາເຫັນ ແລະ ຊັກຖາມຕໍ່ບັນຫາທີມີຄວາມສົນ
ທ່ານ ອຸໄພວັນ ໄຊຍະວົງ ປະທານອົງການກວດສອບປະຈໍາພາກກາງ 2
ພ້ອມທັງໄດ້ຄົ້ນຄວ້າ ພິຈາລະນາ ບົດລາຍງານການເຄື່ອນໄຫວວຽກງານປະຈຳປີ 2023, ທິດທາງແຜນການເຄື່ອນໄຫວວຽກງານ ປະຈຳປີ 2024, ລາຍງານຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ປະຈຳປີ 2022 ແລະ ແຜນກວດສອບຄືນ ບົດສະຫຼຸບຂາດຕົວ ການຈັດຕັ້ງແຜນງົບປະມານຂອງແຂວງ ປີ 2023 ຂອງອົງການກວດສອບ ປະຈຳພາກກາງ ແລະ ບົດລາຍງານ ການເຄື່ອນໄຫວວຽກງານ ປະຈຳປີ 2023, ທິດທາງແຜນການ ປີ 2024, ລາຍງານຜົນການກວດກາ ຕາມຜົນການກວດສອບ ບົດສະຫຼຸບຂາດຕົວ ແຜນງົບປະມານ ປະຈຳປີ 2021 ແລະ ແຜນການກວດກາ ຕາມຜົນກວດສອບແຜນງົບປະມານຂອງແຂວງ ປີ 2022 ຂອງອົງການກວດກາລັດແຂວງ, ບົດລາຍງານການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງອົງການໄອຍະການປະຊາຊົນ ແລະ ສານປະຊາຊົນແຂວງຄຳມ່ວນ.
ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະດໍາເນີນໄປໃນລະຫວ່າງວັນທີ 23 ຫາ ວັນທີ 26 ມັງກອນ 2024 ເປັນເວລາ 3 ວັນເຄິ່ງ ຈຶ່ງຈະສໍາເລັດ.
ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງສາຍດ່ວນຂອງກອງປະຊຸມ:ໝາຍເລກໂທລະສັບ 051 156 ໂດຍບໍ່ເສຍຄ່າ, ຕິດຕາມການຖ່າຍທອດສົດສຽງຜ່ານລະບົບ FM 95.5 mhz ຂອງແຂວງ.
ໂດຍ: ເອື້ອ ມະໂນສິງ