ພິທີມອບ-ຮັບ ໜ້າປະທານ ສະພາປະຊາຊົນແຂວງຜູ້ເກົ່າ – ຜູ້ໃໝ່ ລະຫວ່າງ ທ່ານ ນາງອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ (ຜູ້ເກົ່າ) ແລະ ທ່ານ ຄອນປະພັນເລືອງ ສີຈັນທອງ ຄະນະປະຈຳພັກແຂວງຮອງປະທານສະພາປະຊາຊົນແຂງ ຮັກສາການປະທານສະພາປະຊາຊົນ ແຂວງຫົວພັນ(ຜູ້ໃໝ່) ໄດ້ຈັດຂຶ້ນໃນວັນທີ 9 ພຶດສະພາ 2024 ທີ່ຫ້ອງວ່າການແຂວງ ເປັນກຽດເຂົ້າຮ່ວມ ຂອງ ທ່ານ ຄໍາແພງ ໄຊສົມແພງ ກຳມະການສູນການພັກ ເລຂາພັກແຂວງ ເຈົ້າແຂວງ ແຂວງຫົວພັນ ມີບັນດາທ່ານຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ , ກຳມະການພັກແຂວງ, ຫົວໜ້າ – ຮອງຫົວໜ້າພະແນກການ, ອົງການທຽບເທົ່າ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສອງກອງບັນຊາການ, ບັນດາທ່ານເຈົ້າເມືອງ, ສະມາຊິກສະພາປະຊາຊົນແຂວງ ແລະ ພະນັກງານ – ລັດຖະກອນ ພາຍໃນສະພາປະຊາຊົນແຂວງເຂົາຮ່ວມທັງໝົດ
ໃນພິທີ, ທ່ານ ນາງ ລ້ອງຄຳ ພອນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ ໄດ້ຜ່ານຄຳສັ່ງຂອງກົມການເມືອງສູນກາງພັກສະບັບເລກທີ10/ກມສພ,ລົງວັນທີ 30 ເມສາ 2024 ວ່າດ້ວຍການຍົກຍ້າຍ ສະຫາຍ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນ( ຜູ້ເກົ່າ) ໄປຮັບໜ້າທີ່ໃໝ່ ເປັນເລຂາທິການສະພາແຫ່ງຊາດ ແລະ ມະຕິຂອງຄະນະປະຈໍາສະພາປະຊາຊົນແຂວງຫົວພັນສະບັບເລກທີ 233/ ຄປຈຂ. ຫພ,ລົງວັນທີ 6 ພຶດສະພາ 2024 ວ່າດ້ວຍການຮັບຮອງເອົາການແຕ່ງຕັ້ງ ຮັກສາການແທນປະທານສະພາປະຊາຊົນແຂວງ ໂດຍເຫັນດີຮັບຮອງເອົາການແຕ່ງຕັ້ງ ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ເປັນຮັກສາການປະທານສະພາປະຊາຊົນແຂວງຫົວພັນ.
ໂອກາດນີ້, ທ່ານ ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ ໄດ້ມີຄຳເຫັນໂອ້ລົມ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງສອງທ່ານ ທີ່ຍາດມາໄດ້ໃນໄລຍະຜ່ານມາ. ພ້ອມທັງສະເໜີໃຫ້ປະທານສະພາປະຊາຊົນແຂວງຜູ້ເກົ່າ ແລະ ຜູ້ໃໝ່ສືບຕໍ່ເສີມຂະຫຍາຍຄວາມເປັນແບບຢ່າງນຳໜ້າ, ປະສົບການໃນການນຳພາ-ຊີ້ນຳ ນຳໄປປັບປຸງກົງຈັກການຈັດຕັ້ງ ແລະ ແບບແຜນວິທີເຮັດວຽກບ່ອນໃໝ່ໃຫ້ດີຂຶ້ນກ່ວາເກົ່າ ແລະ ສືບຕໍ່ໃຫ້ຄຳຄິດເຫັນ, ຄຳປຶກສາຫາລືໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຮອບດ້ານ ຂອງສະພາປະຊາຊົນແຂວງ ເພື່ອເປັນການຊ່ວຍແນະນຳບົດຮຽນ ໃນການຈັດຕັ້ງປະຕິບັດວຽກງານຕົວຈິງຂອງຕົນ ໃນຜ່ານມາໄດ້ຜັນຂະຫຍາຍເຂົ້າສູ່ພຶດຕິກຳຕົວຈິງ ຂອງເຂົາເຈົ້າໃຫ້ມີຜົນສຳເລັດ.
ຕໍ່ກັບຜູ້ຮັກສາການແທນ(ຜູ້ໃຫມ່)ໃຫ້ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ ພະນັກງານລັດ – ຖະກອນພາຍໃນສະພາປະຊາຊົນໃຫ້ມີຄວາມເລິກເຊິ່ງ, ຫຼາຍຮູບແບບ, ຫຼາຍວິທີການ ເພື່ອສ້າງຄວາມຮັບຮູ້ທີ່ຖືກຕ້ອງ ແລະ ມີຄວາມເປັນເອກະພາບ, ມີຄວາມເຊື່ອໝັ້ນຕໍ່ການນຳພາຂອງພັກ, ມີສະຕິຕໍ່ການຈັດຕັ້ງ, ປະຕິບັດລະບຽບວິໄນຢ່າງເຂັ້ມງວດ, ມີຄວາມຕື່ນຕົວເປັນເຈົ້າການໃນການປະຕິບັດໜ້າທີ່ວຽກງານ ທີ່ໄດ້ຮັບມອບໝາຍ, ມີຄວາມທ່ຽງທຳ, ພາວະວິໄສ, ເດັດຂາດ, ເຂັ້ມງວດໃນການປົກປ້ອງລັດຖະທຳມະນູນ, ກົດໝາຍ, ປົກປ້ອງຜົນປະໂຫຍດອັນຊອບທຳ ຂອງປະຊາຊົນ,ຂອງປະເທດຊາດ ແລະ ຄວາມຍຸຕິທຳໃນສັງຄົມ, ສາມາດຫັນແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ເຂົ້າສູ່ວຽກງານຕົວຈິງຢ່າງປະດິດສ້າງ ແລະ ມີຜົນສຳເລັດ, ຮັກສາມູນເຊື້ອ ແລະ ເພີ່ມທະວີຄວາມສາມັກຄີພາຍໃນ ໃຫ້ມີຄວາມໜັກແໜ້ນ, ເຊີດຊູນ້ຳໃຈຮັກຊາດ, ຮັກລະບອບໃໝ່, ນ້ຳໃຈລວມໝູ່, ຊ່ວຍເຫຼືອເຊິ່ງກັນ ແລະ ກັນ ບົນພື້ນຖານຫຼັກການຂອງພັກ, ເດັດດ່ຽວຕ້ານ
ແລະ ແກ້ໄຂປັດໄຈຕ່າງໆທີ່ຈະກໍ່ໃຫ້ເກີດຄວາມແຕກແຍກຄວາມສາມັກຄີພ້ອມນັ້ນກໍ່ໃຫ້ເສີມຂະຫຍາຍຄວາມສາມັກຄີພາຍນອກໃຫ້ກວ້າງຂວາງ, ສ້າງເພື່ອນຮ່ວມງານໃຫ້ຫຼາຍຂຶ້ນເພື່ອສ້າງແຮງພັກດັນ ແລະ ການສະໜັບສະໜູນຈາກພາຍນອກໃຫ້ນັບມື້ຫຼາຍຂຶ້ນ ເພື່ອຄວາມສະດວກໃນການຈັດຕັ້ງປະຕິບັດໜ້າທີ່ວຽກງານລວມ ແລະ ວຽກງານສະເພາະຂອງ ສະພາ ກ້າຕັດສິນບັນຫາເອົາໃຈໃສ່ປະສານງານກັບພາກສ່ວນທີ່ກ່ຽວຂ້ອງໃຫ້ມີຄວາມກົມກຽວກັນ; ມີຄວາມສະດຸ້ງໄວຕໍ່ບັນຫາທີ່ເກີດຂຶ້ນ ແລະ ມີວິທີແກ້ໄຂທີ່ຄ່ອງຕົວ ບົນພື້ນຖານແນວທາງນະໂຍບາຍຂອງພັກ, ກົດໝາຍແລະ ລະບຽບການຂອງລັດ. ເອົາໃຈໃສ່ຈັດຕັ້ງປະຕິບັດໜ້າທີ່ວິຊາສະເພາະ ຕາມທິດທາງແຜນການ 5 ປີ ຂອງສະພາປະຊາຊົນແຂວງ ໃຫ້ສາມາດບັນລຸຜົນສຳເລັດຕາມຄາດໝາຍທີ່ວາງໄວ້.
ສພຂ ຫົວພັນ