(ສພຊ) – ຕອນເຊົ້າວັນທີ 10 ກໍລະກົດ 2024, ທີ່ຫ້ອງປະຊຸມຄະນະປະຈຳສະພາແຫ່ງຊາດ ໄດ້ມີພິທີມອບ-ຮັບໜ້າທີ່ລະຫວ່າງປະທານກຳມາທິການຍຸຕິທໍາ ຜູ້ເກົ່າ ກັບ ຜູ້ໃໝ່ ແລະ ປະທານກຳມາທິການວັດທະນະທຳ-ສັງຄົມ ຜູ້ເກົ່າ ກັບ ຜູ້ໃໝ່ ໂດຍມີການເຂົ້າຮ່ວມເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ; ມີຄະນະປະຈໍາສະພາແຫ່ງຊາດ, ຮອງປະທານກໍາມາທິການພາຍໃນສະພາແຫ່ງຊາດ, ບັນດາທ່ານການນຳຂັ້ນສູງຈາກກະຊວງ, ອົງການທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມເປັນສັກຂີພະຍານຢ່າງຫຼວງຫຼາຍ.

ໃນພິທີ, ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ຜູ້ເກົ່າ ແລະ ທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ຜູ້ເກົ່າ ໄດ້ລາຍງານໂດຍສັງເຂບການຈັດຕັ້ງປະ ຕິບັດໜ້າທີ່ວຽກງານຂອງກຳມາທິການໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ຈາກນັ້ນ ທ່ານ ວຽງແກ້ວ ວັນນະຈັກ ຮອງປະທານກຳມາທິການວຽກງານສະມາຊິກສະພາແຫ່ງຊາດ ໄດ້ຂຶ້ນຜ່ານມະຕິຄະນະປະຈຳສະພາແຫ່ງຊາດ ວ່າດ້ວຍການສັບຊ້ອນວຽກງານຂອງປະທານກຳມາທິການພາຍໃນສະພາແຫ່ງຊາດ ສະບັບເລກທີ 93/ຄປຈ, ລົງວັນທີ 02 ກໍລະກົດ 2024 ແລະ ມະຕິກອງປະຊຸມສະ ພາແຫ່ງຊາດ ວ່າດ້ວຍການຮັບຮອງເອົາການເລືອກຕັ້ງກຳມະການຄະນະປະຈຳສະພາແຫ່ງຊາດ ແລະ ຮັບຮອງເອົາການແຕ່ງຕັ້ງປະທານກຳມາທິການວັດທະນາທຳ-ສັງຄົມ ສະບັບເລກທີ 193/ສພຊ, ລົງວັນທີ 02 ກໍລະກົດ 2024. ຫຼັງຈາກນັ້ນ, ກໍໄດ້ມີພິທີລົງນາມມອບ-ຮັບໜ້າທີ່ລະຫວ່າງຜູ້ເກົ່າ-ຜູ້ໃໝ່ ຄື: ທ່ານ ຄຳແພງ ວິລະພັນ ຖືກມອບໝາຍໜ້າທີ່ເປັນປະທານກຳມາທິການກົດໝາຍ (ຜູ້ໃໝ່), ທ່ານ ນາງ ທຸມມາລີ ວົງພະຈັນ ຖືກມອບໝາຍໜ້າທີ່ເປັນປະທານກຳມາທິການຍຸຕິທຳ (ຜູ້ໃໝ່) ແລະ ທ່ານ ບຸນຕາ ເທບພະວົງ ກຳມະການສຳຮອງສູນກາງພັກ, ຮອງປະທານກຳມາທິການແຜນການ, ການເງິນ ແລະ ການກວດສອບ ຖືກມອບໝາຍໜ້າທີ່ເປັນກຳມະການຄະນະປະຈໍາສະພາແຫ່ງຊາດ, ປະທານກໍາມາທິການວັດທະນະທຳ-ສັງຄົມ (ຜູ້ໃໝ່).

ໃນພິທີມອບ-ຮັບ ຄັ້ງນີ້, ທ່ານ ປອ.ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຜົນງານ, ຜົນສຳເລັດຂອງສອງກຳມາທິການຍຸຕິທໍາ ແລະ ວັດທະນະທໍາ-ສັງຄົມ, ຜົນສໍາເລັດໃນການຊີ້ນໍາ-ນໍາພາການປະຕິບັດໜ້າທີ່ຂອງສອງທ່ານປະທານໃນໄລຍະຜ່ານມາ. ທ່ານຍັງໄດ້ມີຄໍາເຫັນຊີ້ນໍາໃນການຈັດຕັ້ງປະຕິບັດໜ້າທີ່ຂອງກໍາມາທິການກົດໝາຍ, ກໍາມາທິການຍຸຕິທໍາ ແລະ ກຳມາທິການວັດທະນະທໍາ-ສັງຄົມ ໂດຍໃຫ້ເອົາໃຈໃສ່ໃນການນໍາພາວຽກງານການ ເມືອງ-ແນວຄິດ, ສ້າງໃຫ້ພະນັກງານມີຈັນຍາບັນ, ຈັນຍາທໍາ, ມີຄວາມດຸໝັ່ນ, ມີຫົວຄິດປະດິດສ້າງໃນການຄົ້ນຄວ້າ ສ້າງ ແລະ ປັບປຸງກົດໝາຍ; ການແກ້ໄຂວຽກງານຄໍາຮ້ອງຂໍຄວາມເປັນທໍາຂອງປະຊາຊົນໃຫ້ຖືກຕ້ອງຕາມກົດໝາຍ ແລະ ສອດຄ່ອງກັບຄວາມເປັນຈິງ; ໃຫ້ເພີ່ມທະວີຄວາມສາມັກຄີພາຍໃນ, ມີການແບ່ງງານແບ່ງຄວາມຮັບຜິດຊອບຢ່າງຈະແຈ້ງ; ມີແບບແຜນວິທີເຮັດວຽກທີ່ໂລ່ງລ່ຽນ, ມີການປະສານງານພາຍໃນກໍາມາທິການ, ພາຍໃນສະພາແຫ່ງຊາດ ແລະ ກັບກະຊວງ, ອົງການ ເພື່ອພ້ອມກັນເຮັດສໍາເລັດໜ້າທີ່ທີ່ຖືກມອບໝາຍ, ປະກອບສ່ວນສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ.

(ນາງ ອາລິນ ສຸພິມມະປະດິດ)