ໃນຕອນບ່າຍວັນທີ 21 ມິຖຸນາ 2023 ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີພິທີ ມອບ-ຮັບ ໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ໃຫ້ແກ່ 3 ໜ່ວຍພັກທີ່ຂຶ້ນກັບຄະນະພັກຮາກຖານ ສະພາປະຊາຊົນແຂວງ ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ນາງ ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນໍາຂົງເຂດວຽກພັກ-ພະນັກງານ ແລະ ສະຫາຍ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ ສະພາປະຊາຊົນແຂວງ, ມີບັນດາສະຫາຍຄະນະປະຈໍາພັກແຂວງ, ກໍາມະການພັກແຂວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ ແລະ ສຳຮອງພ້ອມດ້ວຍແຂກທີ່ຖືກເຊີນ ເຂົ້າຮ່ວມ.

       ໃນພິທີ ໄດ້ຮັບຟັງການຜ່ານບົດສະຫລຸບຕີລາຄາການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ແລະ ທິດທາງແຜນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ຂອງ 3 ໜ່ວຍພັກທີ່ຂຶ້ນກັບຄະນະພັກຮາກຖານ ສະພາປະຊາຊົນແຂວງຄື: ໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ; ໜ່ວຍພັກເສດຖະກິດແຜນການ ແລະ ວັດທະນະທໍາສັງຄົມ-ບັນດາເຜົ່າ ແລະ ໜ່ວຍພັກຄະນະເລຂາທິການ ສະພາປະຊາຊົນແຂວງ.

        ຈາກນັ້ນ, ສະຫາຍ ນາງ ກອງມະນີ ສຸວັນນະສານ ຮອງຫົວໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງ ຂອງຄະນະປະຈໍາພັກແຂວງ ສະບັບເລກທີ 99; 100; 101/ຄປພຂ, ລົງວັນທີ 16 ພຶດສະພາ 2023 ວ່າດ້ວຍການຮັບຮອງເອົາໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ; ໜ່ວຍພັກເສດຖະກິດແຜນການ ແລະ ວັດທະນະທໍາສັງຄົມ-ບັນດາເຜົ່າ ແລະ ໜ່ວຍພັກຄະນະເລຂາທິການ ສະພາປະຊາຊົນແຂວງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ມະຕິຕົກລົງ ຂອງຄະນະປະຈຳພັກແຂວງ ວ່າດ້ວຍການຮັບຮອງເອົາ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023.

          ໂອກາດດັ່ງກ່າວນີ້, ສະຫາຍ ນາງ ຈັນຫອມ ມະຫາໄຊ ໄດ້ໃຫ້ກຽດມອບໃບຢັ້ງຢືນ ແລະ ມີບາງຄໍາເຫັນຊີ້ນຳຕື່ມ ເປັນຕົ້ນ: ໃຫ້ຄະນະພັກຮາກຖານ, ຄະນະໜ່ວຍພັກ ເພີ່ມທະວີປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ, ປັບປຸງຍົກລະດັບສະມາຊິກພັກ-ພະນັກງານ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ຖືເອົາການຍົກສູງຄຸນນະພາບໃນການນໍາພາຢ່າງຮອບດ້ານ ເປັນໜ້າທີ່ຍຸດທະສາດທາງດ້ານການຈັດຕັ້ງ ແລະ ແມ່ນຄວາມຮັບຜິດ ຊອບໂດຍກົງຂອງຄະນະພັກແຕ່ລະຂັ້ນ, ສະມາຊິກພັກທຸກສະຫາຍ ແລະ ພະນັກງານທຸກຄົນ, ຕ້ອງຍົກສູງການນໍາພາຮອບດ້ານຂອງການຈັດຕັ້ງຮາກຖານພັກ ແນໃສ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ; ເພີ່ມທະວີຍົກສູງລະດັບຄວາມຮູ້, ຄວາມສາມາດ ທາງດ້ານທິດສະດີມາກ-ເລນິນ, ດ້ານວິຊາສະເພາະໃນທຸກໆດ້ານ ໃຫ້ແກ່ສະມາຊິກພັກ-ພະນັກງານໃຫ້ສູງຂຶ້ນເລື້ອຍໆ ເພື່ອເຮັດສໍາເລັດໜ້າທີ່ການເມືອງຕາມພາລະບົດບາດທີ່ພັກໄດ້ມອບໝາຍໃຫ້.

        ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເປັນວຽກຍຸດທະສາດຂອງພັກ, ເປັນວຽກທີ່ຕ້ອງເຮັດຢ່າງຕໍ່ເນື່ອງ, ເຮັດຢ່າງເປັນລະບົບໂດຍມີການຈັດຕັ້ງ, ມີການນໍາພາ-ຊີ້ນໍາຢ່າງຄັກແນ່ ແລະ ຕ້ອງເຮັດຢ່າງທົ່ວເຖິງ, ແທດເໝາະກັບສະພາບຕົວຈິງ ແລະ ຈຸດພິເສດຂອງບັນດາໜ່ວຍພັກ.

ການປັບປຸງ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແມ່ນເພື່ອຍົກສູງຄຸນນະພາບຂອງສະມາຊິກພັກ ແລະ ການຈັດຕັ້ງພັກ ເຮັດໃຫ້ໜ່ວຍພັກມີຄວາມປອດໃສທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນໍາພາອັນຖືກຕ້ອງ.

        ສະນັ້ນ, ໜ່ວຍພັກແມ່ນມີບົດບາດສໍາຄັນຕໍ່ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັັກແໜ້ນ ເນື່ອງຈາກວ່າໜ່ວຍພັກເປັນຜູ້ເຮັດໜ້າທີ່ນໍາພາ-ຊີ້ນໍາກົມໂດຍກົງ ໃນການປະຕິບັດພາລະບົດບາດ ເປັນເສນາທິການໃຫ້ແກ່ຄະນະພັກ ໃນການຜັນຂະຫຍາຍ ບັນດາມະຕິ, ຄໍາສັ່ງ, ແນວທາງນະໂຍບາຍ, ລະບຽບກົດໜາຍຕ່າງໆ ໃຫ້ປະກົດຜົນເປັນຈິງ; ການປັບປຸງວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແມ່ນມີຄວາມຈໍາເປັນຢ່າງຍິ່ງເພາະວ່າຖ້າບັນດາໜ່ວຍພັກມີຄວາມເຂັ້ມແຂງ ການເຮັດວຽກເປັນເສນາທິການໃຫ້ແກ່ຄະນະພັກ ກໍ່ມີຄວາມເຂັ້ມແຂງ, ການຈັດຕັ້ງພັກກໍເຂັ້ມແຂງ, ກົງກັນຂ້າມຖ້າບັນດາໜ່ວຍພັກບໍ່ເຂັ້ມແຂງ ຈະເຮັດໃຫ້ການຈັດຕັ້ງຢູ່ບ່ອນນັ້ນບໍ່ມີຄວາມເຂັ້ມແຂງ ກ້າວໄປເຖິງຜົນກະທົບຕໍ່ການຄົງຕົວ ແລະ ການຂະຫຍາຍຕົວຂອງອົງການດັ່ງກ່າວ.

        ຢາກເຮັດບັນດາໜ້າວຽກດັ່ງກ່າວນັ້ນ, ຕ້ອງໄດ້ເພີ່ມທະວີປັບປຸງ ວຽກງານການເມືອງ-ແນວຄິດພາຍໃນໜ່ວຍພັກ ໃຫ້ມີຄວາມໜັກແໜ້ນ, ເອົາໃຈໃສ່ປັບປຸງການຈັດຕັ້ງໃຫ້ມີຄວາມເຂັ້ມແຂງ, ເພີ່ມທະວີປັບປຸງແບບແຜນນໍາພາ ໃຫ້ມີຄວາມສະຫົງບ, ສືບຕໍ່ເສີມຂະຫຍາຍມູນເຊື້ອຄວາມສາມັກຄີ, ຄວາມເປັນປຶກແຜ່ນແໜ້ນໜາພາຍໃນໜ່ວຍພັກ ບົນພື້ນຖານແນວທາງນະໂຍບາຍຂອງພັກ; ຕ້ອງມີການຕິດຕາມກວດກາຢ່າງເປັນລະບົບ ແລະ ເຮັດຢ່າງເປັນປົກກະຕິ.

#ໂດຍ: ນາລີວັນ.