(ສພຊ) – ເພື່ອຕິດຕາມ, ກວດກາການນໍາໃຊ້ລະບົບອິນເຕີເນັດວາຍຟາຍ ແລະ ເຄື່ອງມືໄອຊີທີ ພາຍຫຼັງຕິດຕັ້ງດ້ານເຕັກນິກສໍາເລັດ ທັງເປັນການເກັບກຳຜົນຂອງການນໍາໃຊ້ ແລະ ບັນດາຂໍ້ສະເໜີ ເພື່ອລາຍງານຕໍ່ຜູ້ໃຫ້ທຶນຮັບຊາບເຖິງຜົນສໍາເລັດເບື້ອງຕົ້ນ ແລະ ເປັນບ່ອນອີງໃນການຂຶ້ນແຜນວຽກການຊ່ວຍເຫຼືອ ແລະ ແຜນງົບປະມານຮັບໃຊ້ໃຫ້ແກ່ການຫັນເປັນທັນສະໄໝຢູ່ບັນດາສະພາປະຊາຊົນຂັ້ນແຂວງ (ສພຂ) ພ້ອມນັ້ນ, ຍັງເປັນການລະດົມຂົນຂວາຍການຊ່ວຍເຫຼືອເຂົ້າໃນວຽກງານດັ່ງກ່າວໃຫ້ຕໍ່ເນື່ອງ ແລະ ສອດຄ່ອງກັບບຸລິມະສິດຂອງ ສພຂ ແລະ ຕອບສະໜອງໄດ້ການເຜີຍແຜ່ຂໍ້ມູນຂ່າວສານກ່ຽວກັບຜົນງານການເຄື່ອນໄຫວຂອງຕົນໃຫ້ແກ່ປະຊາຊົນບັນດາເຜົ່າຊາບ.
ວັນທີ 25 ພະຈິກ-05 ທັນວານີ້, ຄະນະເລຂາທິການສະພາແຫ່ງຊາດ (ຄລສ) ພ້ອມດ້ວຍທີມງານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPS) ໄດ້ຈັດພິທີມອບ-ຮັບເຄື່ອງຊ່ວຍເຫຼືອລະຫວ່າງ ຄລສ ກັບ ສພຂ ແລະ ເຝິກອົບຮົມການນໍາໃຊ້ລະບົບອິນເຕີເນັດວາຍຟາຍ ແລະ ເຄື່ອງອຸປະກອນໄອທີ ເຊິ່ງໄດ້ສຳເລັດວຽກດ້ານເຕັກນິກ, ການຕິດຕັ້ງລະບົບວາຍຟາຍ ແລະ ການຕິດຕັ້ງອຸປະກອນ ໃຫ້ແກ່ສະພາປະຊາຊົນຂັ້ນແຂວງທົ່ວປະເທດ ຢູ່ 3 ຈຸດຄື: ຈຸດທີ 1 ຢູ່ແຂວງອຸດົມໄຊ ໃນວັນທີ 25-26 ພະຈິກ ມີແຂວງຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ ແລະ ໄຊຍະບູລີ ໂດຍການກ່າວມອບ ແລະ ເປັນປະທານກອງປະຊຸມເຝິກອົບຮົມຂອງທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ; ຈຸດທີ 2 ຢູ່ແຂວງສະຫວັນນະເຂດ ໃນວັນທີ 28-29 ພະຈິກ ມີນະຄອນຫຼວງວຽງຈັນ, ຫົວພັນ, ຊຽງຂວາງ, ວຽງຈັນ, ຈຳປາສັກ ແລະ ໄຊສົມບູນ ແລະ ຈຸດທີ 3 ຢູ່ແຂວງຈຳປາສັກ ໃນວັນທີ 4-5 ທັນວາ ມີແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ ແລະ ອັດຕະປື ໂດຍການກ່າວມອບ ແລະ ເປັນປະທານກອງປະຊຸມເຝິກອົບຮົມຂອງທ່ານ ປອ. ອາຄົມ ປຣະເສີດ ຮອງເລຂາທິການສະພາແຫ່ງຊາດ ເຊິ່ງມີຕາງໜ້າຄະນະປະຈຳ ສພຂ ກ່າວຮັບ ແລະ ມີພະນັກງານຈາກ ຄລສ, ສພຂ ເຂົ້າຮ່ວມເປັນສັກຂີພະຍານ.
ໃນການເຝິກອົບຮົມ, ສຳມະນາກອນໄດ້ຮັບຟັງພາບລວມຂອງການນຳໃຊ້ໄອຊີທີໃນລັດຖະສະພາສາກົນ: ບົດຮຽນທີ່ດີ, ບາງຄໍາແນະນໍາ ແລະ ການນຳໃຊ້ໄອຊີທີຢ່າງມີປະສິດທິພາບ; ພາບລວມບັນດາບົດຮຽນຂອງຕ່າງປະເທດ ແລະ ແນວໂນ້ມໃນປັດຈຸບັນ: ຜົນສໍາເລັດທີ່ຜ່ານມາ (ບົດຮຽນຈາກລັດຖະສະພາແບບເອເລັກໂຕຣນິກ ແລະ ບົດລາຍງານລັດຖະສະພາໂລກ); ບົດລາຍງານຜົນສໍາເລັດຂອງກອງປະຊຸມນະວັດຕະກຳ ຄັ້ງທີ 1 ທີ່ຈັດຂຶ້ນໃນເດືອນພຶດສະພາຜ່ານມາ; ການນຳໃຊ້ໄອຊີທີໃນການກະກຽມເນື້ອໃນສື່. ຈາກນັ້ນ, ໄດ້ມີການນຳສະເໜີພາກປະຕິບັດສໍາລັບການຜະລິດ ແລະ ການເຜີຍແຜ່ເນື້ອຫາສື່ສັງຄົມດ້ວຍເຄື່ອງມືໄອຊີທີ; ພ້ອມທັງຈັດກິດຈະກຳເປັນກຸ່ມໃນການສ້າງເນື້ອໃນ (ຂ່າວວິດີໂອສັ້ນ) ເພື່ອເຜີຍແຜ່ຜ່ານສື່ສັງຄົມ ກ່ຽວກັບພາລະບົດບາດ, ສິດ ແລະ ໜ້າທີ່ຂອງ ສພຂ, ການພົບປະປະຊາຊົນຂອງສະມາຊິກສະພາປະຊາຊົນຂັ້ນແຂວງ.
(ນາງ ອາລິນ ສຸພິມມະປະດິດ)