ວັນທີ 11 ກັນຍາ 2024 ນີ້ ສະພາປະຊາຊົນແຂວງ (ສພຂ) ເຊກອງ ສົມທົບກັບອົງການກາແດງ ແຂວງ ເຊກອງ ນໍາໂດຍທ່ານ ນາງ ຄໍາເສັງ ທຸມມະວົງສາ ຮອງປະທານສະພາປະຊາຊົນ ແຂວງເຊກອງ ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງທ່າແຕງ ແລະ ອົງການກາແດງ ແຂວງເຊກອງ ໄດ້ນໍາເອົາເຄື່ອງຊ່ວຍເຫຼືອໄປມອບໃຫ້ແກ່ຄອບຄົວທີ່ໄດ້ຮັບຜົນກະທົບຈາກອັກຄີໄຟ ຢູ່ບ້ານ ຕະກຽວ ເມືອງທ່າແຕງ. ທ່ານ ອິນປັນ ພັນທະວົງ ຮອງຫົວໜ້າເຂດຈຸດສຸມພັດທະນາທີ 2 ເມືອງທ່າແຕງ ໄດ້ລາຍງານໃຫ້ຮູ້ວ່າ ໃນເວລາ 15:00 ໂມງ ຂອງວັນທີ 7 ກັນຍາ 2024 ທີ່ຜ່ານມາ ໄດ້ເກີດອັກຄີໄຟລຸກໄໝ້ເຮືອນຂອງ ທ່ານ ມັກ ອາຍຸ 55 ປີ ປະຊາຊົນ ບ້ານຕະກຽວ ເມືອງທ່າແຕງ ເຊິ່ງເປັນເຮືອນໄມ້ ແອ້ມແປ້ນ ມຸງສັງກະສີ ຂະໜາດ 6×9 ແມັດ ເບື້ອງຕົ້ນໄຟໄດ້ລຸກໄໝ້ຈາກໃຈກາງຂອງເຮືອນ ຄາດວ່າເກີດຈາກໄຟຟ້າລັດວົງຈອນ ຫຼັງຈາກນັ້ນ ໄດ້ລຸກໄໝ້ເປັນບໍລິເວນກວ້າງລຸກລາມໄປທົ່ວບໍລິເວນເຮືອນຂອງຜູ້ກ່ຽວ ເຮັດໃຫ້ເກີດຄວາມເສຍຫາຍຢ່າງຫຼວງຫຼາຍ ລວມມູນຄ່າ 300 ລ້ານກີບ ໃນນັ້ນ, ມີເຮືອນ 1 ຫຼັງ, ຕູ້ເຢັນ 1 ໜ່ວຍ, ໂທລະພາບ 1 ໜ່ວຍ, ລົດຈັກ 1 ຄັນ, ໄມ້ເຄື່ອງເຮືອນ, ເງິນສົດ 50 ລ້ານກີບ ແລະ ເຄື່ອງໃຊ້ສອຍອື່ນໆ. ຄອບຄົວທ່ານ ມັກ ມີທັງໝົດ 9 ຄົນ, ຍິງ 6 ຄົນ. ພາຍຫຼັງໄດ້ຮັບຟັງການລາຍງານກ່ຽວກັບສະພາບດັ່ງກ່າວແລ້ວ ທ່ານ ນາງ ຄໍາເສັງ ທຸມມະວົງສາ ຮອງປະທານ ສະພາປະຊາຊົນແຂວງ ກໍໄດ້ມອບເຄື່ອງຊ່ວຍເຫຼືອເພື່ອບັນເທົາທຸກໃນເບື້ອງຕົ້ນໃຫ້ແກ່ຄອບຄົວທີ່ໄດ້ຮັບຜົນກະທົບຈາກອັກຄີໄຟໃນຄັ້ງນີ້ ໃນນັ້ນມີ ຜ້າຫົ່ມ, ມຸ້ງ, ເຄື່ອງນຸ່ງຫົ່ມ, ເກີບ ແລະ ເຄື່ອງຄົວເຮືອນ ຈໍານວນໜຶ່ງ ໂດຍຊ້ອງໜ້າອໍານາດການປົກຄອງເມືອງ, ບ້ານ ແລະ ພໍ່ແມ່ປະຊາຊົນຮ່ວມເປັນສັກຂີພິຍານ.
ຈາກນັ້ນ, ທ່ານ ຮອງປະທານສະພາປະຊາຊົນແຂວງເຊກອງ ກໍໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມຊົມມາຍັງຄະພັກຄະນະນໍາຂັ້ນເມືອງ, ຂັ້ນບ້ານ ທີ່ໄດ້ລາຍງານອັນຮີບດ່ວນຕໍ່ຄະນະນໍາຂັ້ນເທິງໄດ້ຮັບຊາບກ່ຽວກັບຜົນກະທົບດ່ງກ່າວ, ແລະຍ້ອງຍໍຊົມເຊີຍຄະນະພັກ-ອໍານາດການປົກຄອງບ້ານທີ່ສາມາດເຕົ້າໂຮມຄວາມສາມັກຄີພາຍໃນບ້ານຊ່ວຍເຫຼືອເຊິ່ງກັນ ແລະກັນໃນການແກ້ໄຂ, ຢຸດຕິບໍ່ໃຫ້ອັກຄີໄຟດັ່ງກ່າວແຜ່ລາມເປັນບໍລິເວນກວ້າງ ພ້ອມນີ້, ທ່ານຍັງໄດ້ຮຽກຮ້ອງມາຍັງຄະນະນໍາຂັ້ນເມືອງ, ຂັ້ນບ້ານ ໃຫ້ສືບຕໍ່ປຸກລະດົມພໍ່ແມ່ປະຊາຊົນໃຫ້ມີສະຕິໃນການໃຊ້ໄຟເປັນຕົ້ນ ກ່ອນອອກຈາກບ້ານເຮືອນແມ່ນໃຫ້ກວດເຊັກເບິ່ງຟືນໄຟຢູ່ໃນເຮືອນຂອງຕົນ, ພ້ອມກັນສືບຕໍ່ຮັກສາມູນເຊື້ອຄວາມສາມັກຄີເປັນປຶກແຜ່ນ, ຮັກສາຮີດຄອງອັນດີງາມຂອງຊາດ-ຂອງເຜົ່າ ແລະ ຮັກສາອະນາໄມສາມສະອາດຢູ່ສະເໝີ.
#ໂດຍ: ນາລີວັນ ແສງມະນີວົງ.