ໃນວັນທີ 23 ກຸມພາ 2022 ໄດ້ຈັດພິທີ ມອບ-ຮັບ ບັດພະນັກງານ-ລັດຖະກອນ ທີ່ຫ້ອງຊຸມໃຫຍ່ສະພາປະຊາຊົນແຂວງ ໂດຍໃຫ້ກຽດເປັນປະທານ ທ່ານ ນາງ ແກ້ວລາ ມະນີຈິດ ເລຂາທິການສະພາປະຊາຊົນແຂວງ, ທ່ານ ສິງທະວອນ ດາລາວົງ ຫົວໜ້າກົມ ຄຸ້ມຄອງລັດຖະກອນກະຊວງພາຍໃນ, ມີບັນດາຄະນະນໍາ ແລະ ພະນັກງານຈາກ 4 ພາກສ່ວນເຂົ້າຮ່ວມຄື ສະພາປະຊາຊົນແຂວງ,ຄະນະໂຄສະມາອົບຮົມແຂວງ, ພະແນກແຮງງານ ແລະ ສະຫວັດດີການສັງຄົມແຂວງ, ອົງການກາແດງລາວແຂວງຫລວງພະບາງ ແລະ ພະແນກຍຸຕິທໍາແຂວງ ເຂົ້້າຮ່ວມ ທັງໝົດ 145 ທ່ານ ຍິງ 73 ທ່ານ.

               ພິທີດັ່ງກ່າວກໍ່ໄດ້ຮັບຟັງການເຜີຍແຜ່ ບັນດານິຕິກຳການຈັດຕັ້ງປະຕິບັດ, ການອອກບັດ ແລະ ແຈກຍາຍບັດພະນັກງານ-ລັດຖະກອນ, ການກວດຜ່ານບັນຊີຈໍານວນພົນແບບເອເລັກໂຕຣນິກ ແລະ ວຽກງານກ່ຽວກັບຂໍ້ມູນລັດຖະກອນ, ສໍາລັບການກໍານົດເປົ້າໜາຍ ໃນການອອກບັດ ແລະ ແຈກຍາຍບັດ ໃຫ້ພະນັກງານ ລັດຖະກອນ ພ້ອມດຽວກັນນີ້ ກໍ່ໄດ້ສ້າງຄວາມເຂົ້າໃຈ ແລະເປັນເອກະພາບໃນການນໍາໃຊ້ບັດ, ເພື່ອເຮັດໃຫ້ການຄຸ້ມຄອງ-ນຳໃຊ້ຂໍ້ມູນລັດຖະກອນ ຢ່າງເປັນລະບົບ ແລະ ມີປະສິດທິພາບ, ເຮັດໃຫ້ການຄຸ້ມຄອງທາງດ້ານຈຳນວນພົນ, ສະຖິຕິ ແລະ ອຸດໜູນຕ່າງໆ, ມີຄວາມສະດວກ, ມີຄວາມຊັດເຈນ ແລະ ຖືກຕ້ອງຕາມຕົວຈິງ, ເຂົ້າສູ່ລະບົບທັນສະໄໝ, ບໍລິການວ່ອງໄວ ແລະ ສາມາດເຊື່ອມຕໍ່ກັບລະບົບປະກັນສັງຄົມ, ລະບົບການເບີກຈ່າຍເງິນເດືອນ, ບັດລັດຖະກອນສາມາດເປັນບັດ ATM ແລະ ບັດປະກັນສັງຄົມ ໃນບັດດຽວກັນໄດ້.

ຂ່າວ: ນາງ ຄໍາຫຼ້າ ພອນພິລາ