ໃນລະຫວ່າງວັນທີ 6-9 ມີນາ 2023, ທ່ານ ຄໍາດີ ວົງລ້ອມ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04, ປະທານສະພາປະຊາຊົນແຂວງ ແລະ ທ່ານ ສົມເພັດ ເຜົ່າສຸພັນ ສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງປາກແບງ ໄດ້ລົງເຄື່ອນໄຫວພົບປະ ປະຊາຊົນຜູ້ມີສິດເລຶອກຕັ້ງຢູ່ບ້ານມົກຄະ, ແກ້ງແລະ, ແຕງສາ, ໂຮມໄຊ, ລວງໂຕ່ງ, ກິ່ວຄຸຍ, ຫ້ວຍເລົ່າ, ດອນແຈ້ງ, ຫ້ວຍກະ ແລະ ບ້ານດອນສະອາດ ມີນາຍບ້ານ, ອົງການປົກຄອງບ້ານ ແລະ ພໍ່ແມ່ປະຊາຊົນເຂົ້າຮ່ວມທັງໝົດ 841 ທ່ານ, ຍິງ 318 ທ່ານ.
ພິທີ, ບັນດາທ່ານນາຍບ້ານໄດ້ລາຍງານໂດຍຫຍໍ້ກ່ຽວກັບທີ່ຕັ້ງ, ຈຸດພິເສດ, ລາຍຮັບຂອງບ້ານ ແລະ ຫາອື່ນໆ, ພ້ອມທັງໄດ້ມີຄໍາຄິດເຫັນ ແລະ ຄໍາສະເໜີຕໍ່ການພັດ ທະນາພື້ນຖານໂຄງລາງດ້ານຕ່າງໆ ຂອງລັດແຕ່ລະຂັ້ນ.
ຫລັງຈາກນັ້ນ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຊຸດທີ II ໄດ້ພັດປ່ຽນກັນນໍາເອົາເນື້ອໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ຂອງສະພາສະພາປະຊາຊົນແຂວງ ຊຸດທີ II ເຜີຍແຜ່ໃຫ້ປະຊາຊົນໄດ້ຮັບຟັງ, ເພື່ອໃຫ້ຮັບຮູ້ ແລະ ເຂົ້າໃຈ ວ່າ 2 ກອງປະຊຸມດັ່ງກ່າວ ໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ແລະ ຂອງແຂວງແນວໃດ ເປັນຕົ້ນ: ກອງປະຊຸມໄດ້ຮັບຮອງເອົາ ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຜນງົບປະມານແຫ່ງລັດ ປະຈຳປີ 2022 ແລະ ທິດທາງແຜນການປະຈໍາປີ 2023; ບົດລາຍງານການເຄື່ອນ ໄຫວວຽກງານຂອງສະພາແຫ່ງຊາດ ປະຈຳປີ 2022 ແລະ ທິດທາງແຜນການປະຈໍາປີ 2023; ຮັບຮອງເອົາການແຕ່ງຕັ້ງ ທ່ານ ສອນໄຊ ສີພັນດອນ ເປັນນາຍົກລັດຖະມົນຕີ ແຫ່ງ ສປປ ລາວ ຜູ້ໃໝ່ ແລະ ກອງປະຊຸມສະພາປະຊົນແຂວງ ໄດ້ພິຈາລະນາຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ພິຈາລະນາ ແລະ ຮັບຮອງເອົາການສ້າງນິຕິກໍາຂອງອົງການປົກຄອງແຂວງຈໍານວນ 4 ສະບັບ ແລະ ຮັບຮອງເອົາການສະເໜີແຕ່ງຕັ້ງຫົວໜ້າພະແນກ, ອົງການ ຈໍານວນໜຶ່ງ ແລະ ບັນຫາສໍາຄັນອື່ນໆ.
ຈາກນັ້ນ, ບັນດາທ່ານສະມາຊິກສະພາແຫ່ງຊາດ, ສະ ພາປະຊາຊົນແຂວງ ໄດ້ຊີ້ແຈງຕໍ່ກັບບັນດາຄໍາສະເໜີຂອງປະຊາຊົນ, ສ່ວນບາງບັນຫາທີບໍ່ທັນກະຈ່າງແຈ້ງແມ່ນຈະໄດ້ນໍາໄປຄົ້ນຄວ້າໃນກອງປະຊຸມຄະນະປະຈຳສະພາປະຊາ ຊົນແຂວງ ແລະ ສົ່ງໃຫ້ພະແນກການ, ອົງການທີ່ກ່ຽວຂ້ອງຄົ້ນຄວ້າພິຈາລະນາ ແລະ ແກ້ໄຂ ຕາມພາລະບົດບາດ.
ພາບ/ຂ່າວ: ແສງພອນ ອິນນະລົງ.