(ສພຊ) ໃນວັນທີ 8 ພຶດສະພາ 2023 ທີ່ສະພາແຫ່ງຊາດລາວ ໄດ້ມີການພົບປະສອງຝ່າຍລາວ-ໄທ ເຊິ່ງຝ່າຍລາວນໍາໂດຍທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທໍາ-ສັງຄົມ ສະພາແຫ່ງຊາດລາວ ແລະ ຝ່າຍໄທ ນໍາໂດຍທ່ານ ເຈດ ສິຣາທຣານົນ ປະທານກຳມາທິການສາທາລະນະສຸກ ວຸດທິສະພາ ແຫ່ງຣາຊະອານາຈັກໄທ ໂດຍມີຄະນະຜູ້ແທນທັງສອງຝ່າຍເຂົ້າຮ່ວມ.

ທັງນີ້ ເພື່ອເປັນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີງາມຖານບ້ານໃກ້ເຮືອນຄຽງທີ່ມີຄວາມຜູກພັນມາແຕ່ບູຮານນະການ, ມີຂະນົບທໍານຽມ, ວັດທະນະທໍາ, ຮີດຄອງປະເພນີ ແລະ ພາສາປາກເວົ້າທີ່ຄ້າຍຄືກັນ ລະຫວ່າງສອງປະເທດ ລາວ-ໄທ ເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດໃຫ້ຈະເລີນງອກງາມ ແລະ ເກີດດອກອອກຜົນຍິ່ງໆຂຶ້ນ ແລະ ເພື່ອພົບປະແລກປ່ຽນບົດຮຽນ ລະຫວ່າງກໍາມາທິການວັດທະນະທໍາ-ສັງຄົມ ແລະ ກໍາມາທິການສາທາລະນະສຸກ ວຸດທິສະພາ ແຫ່ງ ຣາຊະອານາຈັກໄທ ພາຍໃຕ້ຫົວຂໍ້ ການບໍລິຫານຈັດການວຽກງານດ້ານສາທາລະນະສຸກ ຂອງ ສປປລາວ.

ໃນການພົບປະຄັ້ງນີ້ ທັງສອງຝ່າຍ ໄດ້ພ້ອມກັນຕີລາຄາສູງຕໍ່ການພົວພັນຮ່ວມມື ລະຫວ່າງສອງປະເທດ ກໍຄືສອງອົງການນິຕິບັນຍັດໃນໄລຍະຜ່ານມາ ໂດຍສະເພາະແມ່ນການຢ້ຽມຢາມທາງການ ຣາຊະອານາຈັກໄທ ຂອງພະນະທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໃນເດືອນຕຸລາ ປີ 2022 ແລະ ໄດ້ລົງນາມເຊັນບົດບັນທຶກຄວາມເຂົ້າໃຈ ລະຫວ່າງ ສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະສະພາ ແຫ່ງ ຣາຊະອານາຈັກໄທ ໃນວັນທີ 31 ຕຸລາ 2022 ທີ່ກຸງເທບມະຫານະຄອນ ຣາຊະອານາຈັກໄທ.

ນອກຈາກນັ້ນ, ຍັງໄດ້ແລກປ່ຽນຢ້ຽມຢາມ ແລະ ເຂົ້າຮ່ວມກອງປະຊຸມຂອງຄະນະຜູ້ແທນຂັ້ນສູງ ຂອງລັດຖະບານ, ບັນດາຂະແໜງການໃນລະດັບສູນກາງ ແລະ ທ້ອງຖິ່ນ, ໄດ້ມີການຮ່ວມມືກັນຈັດຕັ້ງປະຕິບັດບັນດາ ສັນຍາ, ສົນທິສັນຍາ, ຂໍ້ຕົກລົງ ແລະ ບົດບັນທຶກຊ່ວຍຈໍາ ໂດຍຜ່ານຫຼາຍກົນໄກການຮ່ວມມືທີ່ມີໝາກຜົນ; ແຈ້ງໃຫ້ຮູ້ກ່ຽວກັບສິດ, ພາລະບົດບາດ, ທີ່ຕັ້ງ ແລະ ກົງຈັກຂອງສອງອົງການນິຕິບັນຍັດ, ພາລະບົດບາດ ສິດ ແລະ ໜ້າທີ່ຂອງກໍາມາທິການວັດທະນະທໍາ-ສັງຄົມ ແລະ ກໍາມາທິການສາທາລະນະສຸກ ວຸດທິສະພາແຫ່ງ ຣາຊະອານາຈັກໄທ ແລະ ວຽກງານ ການບໍລິຫານຈັດການວຽກງານດ້ານສາທາລະນະສຸກ ຂອງ ສປປລາວ. ນອກຈາກນີ້ ຄະນະຝ່າຍລາວ ຍັງໄດ້ສະເໜີບາງເນື້ອໃນຈິດໃຈ ດັ່ງນີ້: ສະເໜີໃຫ້ມີການສືບຕໍ່ແລກປ່ຽນການຢ້ຽມຢາມ ແລະ ໄປມາຫາສູ່ກັນໃຫ້ເປັນປົກກະຕິລະຫວ່າງ ກຳມາທິການວັດທະນະທຳ-ສັງຄົມ ສະພາແຫ່ງຊາດລາວ ກັບ ກຳມາທິການສາທາລະນະສຸກ ວຸດທິສະພາ ແຫ່ງຣາຊະອານາຈັກໄທ ເພື່ອແລກປ່ຽນບົດຮຽນເຊິ່ງກັນ ແລະ ກັນ ໃນການປະຕິບັດພາລະບົດບາດຂອງລັດຖະສະພາ; ສະເໜີໃຫ້ມີການແລກປ່ຽນຂໍ້ມູນໃນການຈັດຕັ້ງປະຕິບັດພາລະບົດບາດນິຕິບັນຍັດເປັນຕົ້ນ ການສ້າງ ແລະ ປັບປຸງກົດໝາຍ, ການຕິດຕາມກວດກາ, ການຄຸ້ມຄອງ ແລະ ການໃຫ້ບໍລິການຄົນເຈັບ, ການສົ່ງເສີມການທ່ອງທ່ຽວລະຫວ່າງສອງປະເທດ, ການພັດທະນາຊັບພະຍາກອນມະນຸດ ແລະ ອື່ນໆ ແລະ ສະເໜີສືບຕໍ່ສະໜັບສະໜູນການຈັດຕັ້ງປະຕິບັດບັນດາແຜນງານ, ໂຄງການ, ກິດຈະກຳຮ່ວມມື ພາຍໃຕ້ບັນດາກົນໄກການຮ່ວມມື ລາວ ແລະ ໄທ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ.

(ພາບ ແລະ ຂ່າວ: ສອນສັກ ວັນວິໄຊ)