………………………………………………………………

(ສພຊ) ໃນຕອນບ່າຍວັນທີ 16 ພະຈິກ 2023 ທີ່ສະພາແຫ່ງຊາດລາວ ໄດ້ມີການພົບປະສອງຝ່າຍລາວ-ກູບາ ເຊິ່ງຝ່າຍລາວນຳໂດຍສະຫາຍ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ແຫ່ງ ສປປລາວ, ປະທານສະມາຄົມມິດຕະພາບລາວ-ກູບາ ພົບປະກັບ ສະຫາຍ ລູເບັນ ຣິມິກີໂອ ເຟີໂລ ປະທານສານປະຊາຊົນສູງສຸດ ແຫ່ງ ສ.ກູບາ ເນື່ອງໃນໂອກາດທີ່ ນໍາພາຄະນະຜູ້ແທນສານປະຊາຊົນສູງສຸດ ແຫ່ງ ສ.ກູບາ ຢ້ຽມຢາມ ສປປລາວ ຢ່າງເປັນທາງການ.

ການພົບປະກັນໃນຄັ້ງນີ້ ແມ່ນເປັນການປະກອບສ່ວນອັນສໍາຄັນໃນການຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີເປັນເວລາຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃຫ້ໄດ້ຮັບການເສີມຂະຫຍາຍ ແລະ ນັບມື້ນັບເຂົ້າສູ່ລວງເລິກ ພ້ອມທັງ ແລກປ່ຽນ, ຖອດຖອນບົດຮຽນ ເຊິ່ງກັນ ແລະ ກັນ ໃນການຈັດຕັ້ງພາລະບົດບາດ ຂອງອົງການນິຕິບັນຍັດ ຂອງສອງປະເທດ ກໍຄືບັນຫາອື່ນໆທີ່ສອງຝ່າຍ ມີຄວາມສົນໃຈ.

ໃນການພົບປະ, ທັງສອງຝ່າຍໄດ້ແຈ້ງໃຫ້ຮູ້ກ່ຽວກັບ ສະພາບການທີ່ພົ້ນເດັ່ນ ໃນການພັດທະນາເສດຖະ ກິດ-ສັງຄົມຂອງຕົນໃຫ້ກັນ ແລະ ກັນຊາບໂດຍສັງເຂບ, ພິເສດ ແມ່ນສະພາບການເຄື່ອນໄຫວວຽກງານ ຂອງ ສານປະຊາຊົນສູງສຸດກູບາ; ສະຫາຍ ສຈ. ປອ. ຈະເລີນ ເຍຍປາວເຮີ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດການພົບປະ ລະຫວ່າງ 2 ປະທານສານປະຊາຊົນສູງສຸດ ສ.ກູບາ ແລະ ສປປລາວ, ສອງຝ່າຍ ໄດ້ຕີລາຄາຄືນການພົວພັນຮ່ວມມື ໃນໄລຍະຜ່ານມາ ແລະ ປຶກສາຫາລືກັນກ່ຽວກັບທິດທາງແຜນການຮ່ວມມືໃນ ຕໍ່ໜ້າ, ການສ້າງຄວາມເຂັ້ມແຂງຂອງລະບົບຕຸລາການ, ການປະຕິຮູບລະບົບຕຸລາການຂອງສອງປະເທດ, ຜູ້ພິພາກ ສາ ແລະ ອື່ນໆ. ພ້ອມນີ້, ສະແດງຄວາມຊົມເຊີຍ ຕໍ່ຜົນສໍາເລັດ ແລະ ໄຊຊະນະອັນໃຫຍ່ຫຼວງ ທີ່ ພັກ, ລັດຖະບານ ແລະ ປະຊາຊົນກູບາ ຍາດມາໄດ້ໃນການປົກປັກຮັກສາໝາກຜົນຂອງການປະຕິວັດ ແລະ ການສ້າງສາພັດທະນາປະເທດຊາດ. ທັງໝົດນີ້, ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະ ພາບ, ການຮ່ວມມືທີ່ເປັນມູນເຊື້ອ ແລະ ເພື່ອນມິດຍຸດທະສາດ ລະຫວ່າງ ສອງພັກ, ສອງລັດ ແລະ ປະຊາຊົນສອງ ຊາດ ລາວ-ກູບາ.

ໃນໄລຍະຜ່ານມາ, ການພົວພັນ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ກູບາ-ລາວ ທີ່ມີມູນເຊື້ອອັນດີງາມມາເປັນເວລາຍາວນານ ແລະ ເປັນເພື່ອນມິດຍຸດທະສາດ ໄດ້ຮັບການ ເສີມຂະຫຍາຍນັບມື້ນັບມີຄວາມເລິກເຊິ່ງ ອັນໄດ້ນໍາຜົນປະໂຫຍດມາສູ່ປະຊາຊົນສອງຊາດ ລາວ-ກູບາ, ກູບາ-ລາວ. ພວກຂ້າພະເຈົ້າ ຈະເຮັດສຸດຄວາມສາມາດຮ່ວມກັບບັນດາສະຫາຍ ໃນການຊຸກຍູ້ສົ່ງເສີມ ການພົວພັນການຮ່ວມມື ທີ່ມີມາແລ້ວນັ້ນ ໃຫ້ໝັ້ນຄົງຂະໜົງແກ່ນ ແລະ ຂະຫຍາຍການຮ່ວມມືໃນຂົງເຂດຕ່າງໆ ຕາມທ່າແຮງຂອງສອງປະ ເທດ. ພວກຂ້າພະເຈົ້າ ຕີລາຄາສູງທີ່ສອງຝ່າຍໄດ້ມີການແລກປ່ຽນຄະນະຜູ້ແທນຂັ້ນຕ່າງໆນໍາກັນຢ່າງເປັນປົກກະຕິ; ພັກ ແລະ ລັດຖະບານ ແລະ ປະຊາຊົນລາວ ຍາມໃດກໍຍຶດໝັ້ນນະໂຍບາຍສະເໝີຕົ້ນສະເໝີປາຍ ຕໍ່ພັກ ແລະ ລັດຖະບານກູບາ ໃນການເຄື່ອນໄຫວຕໍ່ສູ້ໃນເວທີພາກພື້ນ ແລະ ສາກົນ. ພິເສດ, ໃນລະຫວ່າງວັນທີ 13-14 ກັນຍາ 2023 ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະ ເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ນໍາພາຄະນະຜູ້ແທນ ໄປຢ້ຽມຢາມລັດຖະກິດ ແລະ ສືບຕໍ່ເຂົ້າຮ່ວມກອງປະຊຸມສຸດຍອດກຸ່ມປະເທດ 77 ແລະ ຈີນ ຢູ່ ສ.ກູບາ ເຊິ່ງເປັນເຫດການສໍາຄັນ ໃນ ການພົວພັນລະຫວ່າງ ສອງປະເທດ.

ການພົວພັນ ແລະ ການຮ່ວມມືລະຫວ່າງ ສະພາແຫ່ງຊາດລາວ ແລະ ກູບາ ສະພາແຫ່ງຊາດລາວ ແລະ ສະ ພາແຫ່ງຊາດອໍານາດປະຊາຊົນກູບາ ໃນໄລຍະຜ່ານມາ ໄດ້ມີການພົວພັນປົກກະຕິມາໂດຍຕະຫຼອດ ມີການແລກ ປ່ຽນການຢ້ຽມຢາມຂອງຜູ້ແທນລະດັບປະທານສະພາ ແລະ ຄະນະມິດຕະພາບລັດຖະສະພາລາວ-ກູບາ ນໍາກັນ ຢ່າງເປັນປົກກະຕິ ມີທັງການພົບປະເຮັດວຽກແບບເຊິ່ງໜ້າ ແລະ ແບບທາງໄກ, ມີການຈັດກອງປະຊຸມປາຖະກະຖາ ເລົ່າມູນເຊື້ອ ໃນໂອກາດວັນສໍາຄັນຕ່າງໆ ເພື່ອຫວນຄືນການພົວພັນຮ່ວມມື ສອງປະເທດ, ມູນເຊື້ອການຕໍ່ສູ້ຂອງ ປະຊາຊົນກູບາ, ແລກປ່ຽນສະພາບການພົ້ນເດັ່ນໃນການພັດທະນາເສດຖະກິດ-ສັງຄົມ ໃຫ້ກັນຊາບ. ສອງຝ່າຍ ໄດ້ລົງນາມບົດບັນທຶກຊ່ວຍຈໍາ (MOU) ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດນຳກັນ ເພື່ອຮັດ ແໜ້ນ ແລະ ເສີມຂະຫຍາຍການພົວພັນຮ່ວມມື ລະຫວ່າງ ສອງອົງການນິຕິບັນຍັດ ແລະ ປະກອບສ່ວນອັນ ສໍາຄັນໃຫ້ແກ່ການເພີ່ມພູນຄູນສ້າງ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີຍາວນານ ລະຫວ່າງ ສອງປະເທດ ໃຫ້ເຂົ້າສູ່ລວງເລິກ.

ໃນນາມຄະນະມິດຕະພາບລັດຖະສະພາລາວ-ກູບາ-ລາວ ສະເໜີໃຫ້ ສານປະຊາຊົນສູງສຸດ ສ.ກູບາ ສືບຕໍ່ພົວ ພັນຮ່ວມມືກັບ ສານປະຊາຊົນສູງສຸດ ສປປລາວ ເພື່ອເພີ່ມພູນຄູນສ້າງການພົວພັນຮ່ວມມື ລະຫວ່າງ ສອງພັກ, ສອງ ລັດ ແລະ ປະຊາຊົນສອງຊາດ ລາວ-ກູບາ ໃຫ້ໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກ; ພ້ອມນີ້ ຍັງໄດ້ອວຍ ພອນແດ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.