(ສພຊ) ເພື່ອເປັນການຜັນຂະຫຍາຍການພົບປະທາງໄກ ລະຫວ່າງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ແລະ ທ່ານ ນາງ ວາເລັນຕີນາ ມັດວຽນໂກ ປະທານສະພາສູງ ແຫ່ງ ສະຫະພັນຣັດເຊຍ ໃນທ້າຍປີ 2021 ຜ່ານມາ, ປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບການຊຸກຍູ້ ແລະ ສົ່ງເສີມການເສີມຂະ ຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະ ຄູ່ຮ່ວມຍຸດທະສາດລະຫວ່າງ ສອງປະເທດ ລາວ-ຣັດເຊຍ ກໍຄື ສອງອົງການນິຕິບັນຍັດໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທຳຍິ່ງໆຂຶ້ນ ໃນຕອນບ່າຍຂອງວັນທີ 21 ຕຸລາ 2022 ທີ່ຫ້ອງປະຊຸມຄະນະປະຈໍາສະພາແຫ່ງຊາດ ໄດ້ມີການຈັດກອງປະຊຸມພົບປະທາງໄກ ລະຫວ່າງປະທານຄະນະມິດຕະພາບ ລັດຖະສະພາ ລາວ-ຣັດຊຍ, ຣັດເຊຍ-ລາວ ເຊິ່ງຝ່າຍລາວນໍາໂດຍທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາ ລາວ-ຣັດເຊຍ ແລະ ຝ່າຍຣັດເຊຍ ນໍາໂດຍທ່ານ ປາແວວ ທາຣາກາໂນບ (Pavel TARAKANOV) ສະມາຊິກສະພາສູງ, ປະທານຄະນະມິດຕະພາບ ລັດຖະສະພາ ຣັດເຊຍ-ລາວ ໂດຍມີ ຮອງປະທານຄະນະມິດຕະພາບ ລັດຖະສະພາລາວ-ຣັດເຊຍ, ຣັດເຊຍ-ລາວ, ເອກອັກຄະລັດຖະທູດ ແລະ ຄະນະນໍາທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ໃນການພົບປະຄັ້ງນີ້ ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະປະເທດ, ຕີລາຄາການພົວພັນຮ່ວມມື ລະຫວ່າງສອງລັດ ແລະ ປະຊາຊົນສອງຊາດ ລາວ-ຣັດເຊຍ, ຣັດເຊຍ-ລາວ ແລະ ລະຫວ່າງສອງອົງ ການນິຕິບັນຍັດຂອງສອງປະເທດ, ພ້ອມທັງໄດ້ມີການປຶກສາຫາລື ກ່ຽວກັບທິດທາງໃນການຮ່ວມມືດ້ານຕ່າງໆ ເພື່ອປະ ກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະ ຄູ່ຮ່ວມຍຸດທະສາດ ລະ ຫວ່າງສອງປະເທດ ລາວ-ຣັດເຊຍ ກໍຄືສອງອົງການນິຕິບັນຍັດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທໍາຫຼາຍຂຶ້ນ ເປັນຕົ້ນໃນຂະແໜງການຄ້າ-ການລົງທຶນ, ພະລັງງານ, ການສຶກສາ, ວັດທະນະທໍາ-ສັງຄົມ ແລະ ບັນດາໂຄງການຮ່ວມມືຕ່າງໆທີ່ສອງຝ່າຍໄດ້ມີການລົງນາມຮ່ວມມືນໍາກັນ ຈາກນັ້ນ, ທ່ານຮອງປະທານສະພາແຫ່ງຊາດລາວ ໄດ້ແຈ້ງສະ ພາບການໃນການຕ້ານ, ສະກັດກັ້ນ ແລະ ຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປປລາວ ໃນປັດຈຸບັນ ແລະ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຣັດເຊຍ ທີ່ໄດ້ໃຫ້ການຊ່ວຍເຫຼືອທາງດ້ານອຸປະກອນ ແລະ ຢາ Sputnik ມາໃຫ້ປະຊາຊົນລາວ ໃນການປ້ອງກັນການແຜ່ລະບາດຂອງພະຍາດໂຄວິດ-19 ເຮັດໃຫ້ ສປປລາວ ສາມາດຮັບມືໄດ້ດີພໍສົມຄວນ, ທ່ານຮອງປະທານສະພາແຫ່ງຊາດລາວ ໄດ້ຕີລາຄາສູງຕໍ່ສາຍພົວພັນ ລະຫວ່າງສອງອົງ ການນິຕິບັນຍັດຂອງສອງປະເທດ ໃນໄລຍະທີ່ຜ່ານມາ ແລະ ສະແດງຄວາມພ້ອມທີ່ຈະສືບຕໍ່ຮ່ວມມືກັນໃນຕໍ່ໜ້າ ໂດຍຈະສືບຕໍ່ປະຕິບັດຕາມຂໍ້ຕົກລົງບົດບັນທຶກວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ແລະ ສະພາສູງຣັດເຊຍ ໃນໄລຍະຜ່ານມາ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນທີ່ເປັນມູນເຊື້ອທີ່ດີງາມມາແຕ່ດົນນານ ແລະ ຄູ່ຮ່ວມຍຸດທະສາດ ລະຫວ່າງ ລາວ-ຣັດເຊຍ ໃຫ້ມີປະສິດທິພາບ ແລະ ປະສິດທິຜົນຍິ່ງໆຂຶ້ນ; ພ້ອມນັ້ນ, ທ່ານຍັງໄດ້ສະເໜີທິດທາງການພົວພັນ ແລະ ການຮ່ວມມື ລະຫວ່າງສອງອົງການນິຕິບັນຍັດໃນຕໍ່ໜ້າ ດັ່ງນີ້: ສືບຕໍ່ປະຕິບັດຜົນການພົບປະທາງໄກລະຫວ່າງ ທ່ານ ດຣ. ໄຊສົມພອນ ພົມວິຫານ ປະທານສະພາແຫ່ງຊາດລາວ ແລະ ທ່ານ ນາງ ວາເລັນຕີນາ ມັດວຽນໂກ, ປະທານສະພາສູງ ສ. ຣັດເຊຍ ໃນເດືອນທັນວາ 2021 ຜ່ານມາ ໂດຍສະເພາະແມ່ນການແລກປ່ຽນການຢ້ຽມຢາມ ລະຫວ່າງ ຄະນະຜູ້ແທນຂັ້ນສູງ, ຂັ້ນກໍາມາທິການ ແລະ ຄະນະມິດຕະພາບລັດຖະສະພາ ຢ່າງເປັນປົກກະຕິ ທີ່ຕິດພັນກັບການແລກປ່ຽນບົດຮຽນ ກ່ຽວກັບການປະຕິບັດພາລະບົດບາດຂອງອົງການນິຕິບັນຍັດ; ສະເໜີສອງຝ່າຍຊຸກຍູ້ໃຫ້ມີການຈັດຕັ້ງປະຕິບັດບັນດາສັນຍາ ແລະ ສົນທິສັນຍາ ທີ່ສອງລັດຖະບານລາວ ແລະ ຣັດເຊຍ ໄດ້ລົງນາມຮ່ວມກັນໃຫ້ເປັນຮູບປະທຳ ເປັນຕົ້ນແມ່ນການຮ່ວມມືວຽກງານປ້ອງກັນຊາດ, ການຮ່ວມມືທາງດ້ານເສດຖະກິດ (ການຄ້າ-ການລົງທຶນ), ການສຶກສາ, ສາທາລະນະສຸກ, ການທ່ອງທ່ຽວ, ດ້ານພະລັງງານ ແລະ ອື່ນໆ ລວມທັງສືບຕໍ່ຊຸກຍູ້ການຈັດຕັ້ງປະຕິບັດບັນດາໂຄງການຕ່າງໆ ຂອງຣັດເຊຍ ທີ່ລົງທຶນຢູ່ ສປປລາວ ໃຫ້ສໍາເລັດຕາມແຜນການທີ່ຕົກລົງກັນ ແລະ ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນເຂົ້າໃນພາລະກິດປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາແບບຍືນຍົງ ເຊິ່ງໃນປີ 2024 ນີ້ ສະພາແຫ່ງຊາດລາວ ຈະໄດ້ເປັນເຈົ້າພາບ ກອງປະຊຸມໄອປາ ຄັ້ງທີ 45.

ທ່ານ ປາແວວ ທາຣາກາໂນບ ໄດ້ສະແດງຄວາມຊົມເຊີຍ ແລະ ຂອບໃຈທີ່ທ່ານຮອງປະທານສະພາແຫ່ງຊາດລາວ ໄດ້ເສຍສະຫຼະເວລາອັນມີຄຸນຄ່າ ເປັນປະທານຮ່ວມກອງປະຊຸມໃນຄັ້ງນີ້ ພ້ອມທັງຊົມເຊີຍບັນດາຜົນສຳເລັດອັນຮອບດ້ານຂອງ ສປປລາວ ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ກໍຄືປັດຈຸບັນ, ທັງໄດ້ຕີລາຄາສູງຕໍ່ສາຍພົວພັນຂອງສອງຝ່າຍ ໃນດ້ານຕ່າງໆ ແລະ ເຫັນດີຈະຮ່ວມກັບຝ່າຍລາວ ເພື່ອເສີມຂະຫຍາຍສາຍພົວພັນຮ່ວມມື ລະຫວ່າງອົງການນິຕິບັນຍັດຂອງສອງປະເທດໃນດ້ານຕ່າງໆ ໃຫ້ໄດ້ຮັບການພັດທະນາຍິ່ງຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ ຣັດເຊຍ-ລາວ ກໍຄືຜົນປະໂຫຍດ ຂອງສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະ ນາ ໃນພາກພື້ນ ແລະ ໃນໂລກ.

(ພາບ ແລະ ຂ່າວ: ສອນສັກ ວັນວິໄຊ)