ໃນວັນທີ 20 ສິງຫາ 2024 ນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແລະ ສະມາຊິກສະພາປະຊາຊົນແຂວງຈໍາປາສັກ ເຄື່ອນໄຫວພົບປະຢ້ຽມຢາມປິຊາຊົນຢູ່ຫຼາຍບ້ານ ຂອງເຂດເລືອກຕັ້ງເມືອງສຸຂຸມາ ນໍາໂດຍ ທ່ານ ປອ. ສົມສັກ ແສງສັກດາ ຄະນະປະຈໍາສະພາປະຊາຊົນແຂວງແຂວງ, ປະທານຄະນະກໍາມະການສດຖະກິດ ແຜນການ ແລະການເງິນ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ສົມທົບກັບ ທ່ານ ປອ. ຄໍາໄຕ ແກ້ວປະເສີດ ຮອງເລຂາພັກເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສຸຂຸມາ ແລະ ທ່ານ ອະນຸສັກ ຈັນທະປະເສີດ ຮອງປະທານຄະນະກໍາມະການສດຖະກິດ ແຜນການ ແລະການເງິນ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສຸຂຸມາ ພ້ອມຄະນະ ລົງເຄື່ອນໄຫວຢູ່ຈຸດບ້ານ ດົງ ແລະ ບ້ານ ກຸດຕະບຸນ ໂດຍມີອໍານາດການປົກຄອງຂອງບ້ານອ້າມຂ້າງຄື ບ້ານໃຫຍ່ບຸ່ງແກ້ວ, ບ້ານຫ້ວຍແຫ່, ບ້ານທ່າແສງ, ບ້ານທ່ານໂພສີ, ບ້ານທັບຈາມ, ບ້ານບ້ານໂຄກໜອງບົວ ແລະ ບ້ານທ່ານດ່ານເຂົ້າຮ່ວມ.

ໃນໂອກາດລົງພົບປະຢ້ຽມຢາມພໍ່ແມ່ປະຊາຊົນໃນຄັ້ງນີ້ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາບັນດາເນື້ອໃນສໍາຄັນ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 07 ຂອງສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງຈໍາປາສັກ ລວມທັງແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ອໍານາດການປົກຄອງ ແລະ ພໍ່ແມ່ປະຊາຊົນມີຄວາມຮັບຮູ້, ເຊື່ອມຊຶມຢ່າງເລິກເຊິ່ງ ຕິດພັນກັບການເກັບກໍາຄໍາຄິດເຫັນ, ຄໍາສະເໜີຂອງຜູ້ມີສິດເລືອກຕັ້ງໃນເຂດດັ່ງກ່າວ ເພື່ອນໍາໄປຊຸກຍູ້ອົງການປົກຄອງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆແກ້ໄຂ. ການເຄື່ອນໄຫວຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນຄັ້ງນີ້ຍັງໄດ້ມອບຊີມັງຈໍານວນ 1 ໂຕນ ມູນຄ່າ 2,000,000 ກີບ ປະກອບສ່ວນສົມທົບໃນການກໍ່ສ້າງເສັ້ນທາງເຂດບ້ານດົງຫົວບ້ານ ອີກດ້ວຍ. ຄະນະຍັງຈະສືບຕໍ່ເຄື່ອນໄຫວອີກຫຼາຍຈຸດຂອງເຂດເລືອກຕັ້ງເມືອງສຸຂຸມາ ຄາດວ່າຈະເຄື່ອນໄຫວສໍາເລັດໃນທ້າຍອາທິດນີ້.