ໃນວັນທີ 20 ສິງຫາ 2024 ນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແລະ ສະມາຊິກສະພາປະຊາຊົນແຂວງຈໍາປາສັກ ເຄື່ອນໄຫວພົບປະຢ້ຽມຢາມປິຊາຊົນຢູ່ຫຼາຍບ້ານ ຂອງເຂດເລືອກຕັ້ງເມືອງສຸຂຸມາ ນໍາໂດຍ ທ່ານ ນາງ ບຸນສຸວັນ ໂພໄຊຊະນະສັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ສົມທັບກັບ ທ່ານ ພັທ. ນົງຄານ ວົງພານິດ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສຸຂຸມາ ແລະ ທ່ານ ສີໃສ ແກ້ວມະນີໄຊ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສຸຂຸມາ ພ້ອມຄະນະ ເຄື່ອນໄຫວຢູ່ຈຸດບ້ານດອນຫວາຍ ແລະ ບ້ານປ່າກໍ່ ໂດຍມີອໍານາດການປົກຄອງບ້ານອ້ອມຂ້າງຄື: ບ້ານທາດສາມປາງ, ບ້ານບ້ານໂນນພະເຈົ້າ, ບ້ານບາກ, ບ້ານສາມຂາ ແລະ ບ້ານໂນນຍາງ.
ໃນໂອກາດລົງພົບປະຢ້ຽມຢາມພໍ່ແມ່ປະຊາຊົນໃນຄັ້ງນີ້ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາບັນດາເນື້ອໃນສໍາຄັນ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 07 ຂອງສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງຈໍາປາສັກ ລວມທັງແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ອໍານາດການປົກຄອງ ແລະ ພໍ່ແມ່ປະຊາຊົນມີຄວາມຮັບຮູ້, ເຊື່ອມຊຶມຢ່າງເລິກເຊິ່ງ ຕິດພັນກັບການເກັບກໍາຄໍາຄິດເຫັນ, ຄໍາສະເໜີຂອງຜູ້ມີສິດເລືອກຕັ້ງໃນເຂດດັ່ງກ່າວ ເພື່ອນໍາໄປຊຸກຍູ້ອົງການປົກຄອງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆແກ້ໄຂ. ຄະນະຍັງຈະສືບຕໍ່ເຄື່ອນໄຫວອີກຫຼາຍຈຸດຂອງເຂດເລືອກຕັ້ງເມືອງສຸຂຸມາ ຄາດວ່າຈະເຄື່ອນໄຫວສໍາເລັດໃນທ້າຍອາທິດນີ້.
(ຂ່າວ-ພາບ: ສົມວິຈິດ ໄຊມົນຕີ)