ພົບປະຜູ້ມີສິດເລືອກຕັ້ງ ຢູ່ເມືອງນາໝໍ້

ໃນລະຫວ່າງວັນທີ 1-3 ກັນຍາ 2025, ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ທ່ານ ນ. ບົວພອນ ແກ້ວມະນີ, ທ່ານ ພັທ ເພັດສະຫວັນ ໄຊອຸ່ນຄໍາ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາໝໍ້ ພ້ອມດ້ວຍຄະນະ, ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບັນດາບ້ານຂອງເມືອງນາໝໍ້ໄດ້ 6 ບ້ານຄື: ບ້ານນາໝໍ້ໃຕ້, ບ້ານນາໝໍ້ເໜືອ, ບ້ານເລົ່າ, ບ້ານປາງເດື່ອ, ບ້ານນໍ້າແພງ ແລະ ບ້ານນາໂຮມ, ມີເລຂາພັກບ້ານ, ນາຍບ້ານ, ອົງການປົກຄອງບ້ານ ແລະ ພໍ່ແມ່ປະຊາຊົນ ຜູ້ມີສິດເລືອກຕັ້ງເຂົ້າຮ່ວມຮັບຟັງທັງໝົດ 486 ຄົນ, ຍິງ 152 ຄົນ.

ພິທີໄດ້ນໍາເອົາບັນດາເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX, ສະພາປະຊາຊົນແຂວງອຸດົມໄຊ ຊຸດທີ II, ບັນດາມະຕິຕ່າງໆ ແລະ ຜົນສໍາເລັດກອງປະຊຸມໃຫຍ່ ແລະ ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງອຸດົມໄຊ ສະໄໝທີ X. ຜ່ານການເຜີຍແຜ່ບັນດາເນື້ອໃນຕ່າງໆ ເຫັນວ່າປະຊາຊົນມີຄວາມສົນໃຈຕໍ່ເນື້ອໃນທີ່ໄດ້ນໍາສະເໜີໃນຄັ້ງນີີ້ ແລະ ໄດ້ສ້າງຄວາມຮັບຮູ້, ເຂົ້າໃຈໃຫ້ປະຊາຊົນໄດ້ດີພໍສົມຄວນ. ພ້ອມນັ້ນ, ໄດ້ຮັບຟັງຄໍາສະເໜີຈາກອົງການປົກຄອງບ້ານ ແລະ ພໍ່ແມ່ປະຊາຊົນ ສ່ວນຫຼາຍແມ່ນຕິດພັນກັບການພັດທະນາພື້ນຖານໂຄງລ່າງເປັນຕົ້ນ: ການກໍ່ສ້າງປັບປຸງສ້ອມແປງເສັ້ນທາງ, ນ້ຳລິນ, ໄຟຟ້າ, ຫ້ອງການບ້ານ, ການແກ້ໄຂຄວາມທຸກຍາກ, ການແກ້ໄຂປະກົດການຫຍໍ້ທໍ້ໃນສັງຄົມ, ບັນຫາຢາເສບຕິດ, ລາຄາສິນຄ້າແພງ, ແລະ ອື່ນໆ.

ບັນດາຄໍາສະເໜີ ສ່ວນຫຼາຍແມ່ນຕິດພັນກັບຂອບເຂດຄວາມຮັບຜິດຊອບຂອງຂະແໜງການທີ່ກ່ຽວຂ້ອງຂັ້ນເມືອງ, ເຊິ່ງສະມາຊິກສະພາແຫ່ງຊາດ, ສະພາປະຊາຊົນແຂວງ ກໍ່ໄດ້ຊີ້ແຈງກັບທີ່ຕໍ່ກັບຄໍາສະເໜີຂອງປະຊາຊົນກັບທີ່ ແລະ ຍັງມີບາງຄໍາສະເໜີ ທີ່ສະມາຊິກສະພາປະຊາຊົນແຂວງປະຈໍາເຂດເລື່ອກເມືອງ ຈະສືບຕໍ່ຊຸກຍູ້ ແລະ ປະສານສົມທົບກັບບັນດາຫ້ອງການທີ່ກ່ຽວຂ້ອງຂັ້ນເມືອງ, ພະແນການ, ອົງການ ໃນຄົ້ນຄວ້າພິຈາລະນາແກ້ໄຂຕາມຂອບເຂດສິດ ແລະ ໜ້າທີ່ ຄວາມຮັບຜິດຊອບຂອງແຕ່ລະພາກສ່ວນ, ແຈ້ງຕອບໃຫ້ປະຊາຊົນ ແລະ ພ້ອມທັງຕິດຕາມ-ກວດກາ ຜົນຂອງການແກ້ໄຂ, ຕາມພາລະບົດບາດຂອງສະພາປະຊາຊົນແຂວງ ທີ່ໄດ້ກໍານົດໄວ້ໃນກົດໝາຍ.