ໃນວັນທີ 27 ກໍລະກົດ 2024, ທ່ານ ນາງ ບຸນມີ ຈຸນລະຈັກ ຮອງຫົວໜ້າສະຖາບັນການເມືອງ ແລະ ປົກຄອງແຫ່ງຊາດ, ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈໍາປາສັກ ສົມທົບກັບ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ເຂົ້າຮ່ວມມີ ທ່ານ ນາງ ພູໄພທອງ ພິມມະວົງສາ ເລຂາພັກເມືອງ, ເຈົ້າເມືອງຊະນະສົມບູນ, ຫົວໜ້າຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊະນະສົມບູນ ແລະ ທ່ານ ສໍາລານ ອ່ອນໄຊວຽງ ສະມາຊິກສະພາປະຊາຊົນແຂວງ ປະຈະເຂດເລືອກຕັ້ງເມືອງ ພ້ອມຄະນະ ຈຸດປະສົງເພື່ອເຜີຍແຜ່ຜົນສຳ ເລັດກອງປະຊຸມສະໄໝສາມັນ ເທື່ອທີ7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂງຈໍາປາສັກ ຊຸດທີ II ຢູ່ຈຸດບ້ານດອນແຊ ແລະ ບ້ານຄີລີ ໂດຍການໃຫ້ກຽດຕ້ອນຮັບຂອງທ່ານ ຄີວັນ ໂພສາລີວົງ ຄະນະປະຈຳພັກເມືອງ, ຫົວໜ້າອ້ອມຂ້າງເມືອງ, ຄະນະພັກຮາກຖານກຸ່ມບ້ານ, ເລຂາພັກບ້ານ ແລະ ປະຊາຊົນພາຍໃນບ້ານ ເຂົ້າຮ່ວມຕ້ອນຮັບຢ່າງອົບອຸ່ນ.

ກອງປະຊຸມໄດ້ຮັບຟັງການລາຍງານ ການຈັດຕັ້ງປະຕິບັດສະພາບລວມຂອບບ້ານໂດຍສັງເຂບ, ພາຍລັງສຳເລັດກອງປະຊຸມ ຄະນະເຄື່ອນໄຫວກໍ່ໄດ້ໄປຢ້ຽມຊົມໂຮງງານຜະລິດດິນຈີ່ ຈຳປາສັກ ບ້ານດອນແຊ ແລະ ໂຮງງານເຮັດຜະລິດເຕົາອັງໂລ້ ບ້ານຄີລີ ເພື່ອເປັນການຊຸກຍູ້, ສົ່ງເສີມ ຕິດພັນກັບການ ຕິດຕາມກວດກາບັນດາໂຮງງານດັ່ງກ່າວໃຫ້ປະຕິບັດການດຳເນີນກິດຈະການຖືກຕ້ອງ ແລະ ສອດຄ່ອງຕາມລະບຽບການ ເພື່ອຮັບປະກັນຄວາມຢືນຍົງຂອງກິດຈະການ ແລະ ຮັບປະກັນໃນການນຳໃຊ້ຊັບພະຍາກອນທຳມະຊາດ (ດິນ) ທີ່ມີຈຳນວນຈຳກັດ.

ໃນໂອກາດດັ່ງກ່າວນີ້, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຈຶ່ງໂອລົມ ແລະ ນໍາເອົາບັນດາຜົນສຳເລັດ, ເນື້ອໃນສຳຄັນຕ່າງໆ ທີ່ຮັບຮອງໃນກອງປະຊຸມສະໄໝສາມັນ ເທື່ອທີ7 ຂອງສະພາແຫ່ງຊາດ ແລະ ສະພາປະຊາຊົນແຂວງ, ຕິດພັນກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ ມາເຜີຍແຜ່, ເຊື່ອມຊຶມ ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງຮັບຮູ້ເຂົ້າໃຈ, ພ້ອມທັງເກັບກຳຄໍາຄິດ, ຄຳເຫັນ, ຄໍາສະເໜີ ຂອງຜູ້ມີສິດເລືອກຕັ້ງພາຍໃນບ້ານດັ່ງກ່າວ ເພື່ອນໍາໄປຊຸກຍູ້ພາກສ່ວນກ່ຽວຂ້ອງ ພິຈາລະນາແກ້ໄຂ.

ພ້ອມດຽວກັນນັ້ນ, ຄະນະເຄື່ອນໄຫວ ຍັງໄດ້ນຳເອົາເຄື່ອງອຸປະໂພກ ແລະ ອຸປະກອນກິລາ ມອບໃຫ້ແກ່ອົງການປົກຄອງບ້ານ ເພື່ອນຳໃຊ້ເຂົາໃນວຽກງານອັນລວມຂອງບ້ານ ລວມມູນຄ່າເປັນເງິນທັງໝົດ ຈຳນວນ 8.000.000 ກີບ.

ຂ່າວ-ພາບ: ສຸລິຍາ ເພັງສະຫວັດ