ໃນລະຫວ່າງວັນທີ 11-13 ກັນຍາ 2023 ນີ້, ທ່ານ ຄໍາພອນ ພິມມະລາດ ຫົວໜ້າຄະນະສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງແບງ ແລະ ປອ ນ. ວຽງມາລີ ສຸລີໄຊ ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງແບງ, ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ພໍ່ແມ່ປະຊາ ຊົນຢູ່ທີ່ບ້ານ ທ່າມື່ນ, ປາງທອງ, ຫ້ວຍລໍ, ປາງເດື່ອ, ໂພແກ້ວ ແລະ ບ້ານ ແບງຄໍາ, ມີນາຍບ້ານ, ອົງການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າພາຍໃນບ້ານເຂົ້າຮ່ວມທັງໝົດ 582 ຄົນ, ຍິງ 275 ຄົນ.

ການລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ເມືອງແບງໃນຄັ້ງນີ້, ໄດ້ຮັບຟັງການລາຍງານໂດຍຫຍໍ້ສະພາບພົ້ນເດັ່ນໃນໄລຍະຜ່ານມາຂອງບັນດາບ້ານ ແລະ ຫຼັງຈາກນັ້ນ, ບັນດາທ່ານສະມາຊິກສະພາປະຊາຊົນແຂວງ ໄດ້ພັດປ່ຽນກັນເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ຂອງສະພາສະພາປະຊາຊົນແຂວງ ຊຸດທີ II ແລະ ບັນດາມະຕິຕ່າງໆຂອງກອງປະຊຸມ ເພື່ອໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈວ່າ 2 ກອງປະຊຸມດັ່ງກ່າວໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ, ຂອງແຂວງແນວໃດແດ່.

ພ້ອມນັ້ນ, ຍັງໄດ້ຮັບຟັງຄໍາຄິດເຫັນ, ຄໍາສະເໜີຂອງບ້ານ ແລະ ພໍ່ແມ່ປະຊາຊົນຕໍ່ກັບການຄຸ້ມຄອງ, ບໍລິ ຫານລັດຂັ້ນຕ່າງໆ ແລະ ບັນດາຄໍາສະເໜີເຫຼົ່ານັ້ນ ສະພາປະຊາຊົນແຂວງໄດ້ຊີ້ແຈງກັບທີ່ແລ້ວ, ສ່ວນບາງບັນຫາທີບໍ່ທັນຊີ້ແຈງແມ່ນຈະໄດ້ນໍາໄປຄົ້ນຄວ້າ ແລະ ສົ່ງໃຫ້ພະແນກການ, ອົງການທີ່ກ່ຽວ ຂ້ອງພິຈາລະນາແກ້ໄຂ ຕາມພາລະບົດບາດ.

ຂ່າວ: ສະພາປະຊາຊົນແຂວງ.