ວັນທີ 7 ສິງຫາ 2023 ນີ້, ທີ່ຫ້ອງປະຊຸມສະພາປະຊົນແຂວງ ໄດ້ມີພິທີຮັບສະມາຊິກພັກສໍາຮອງຂຶ້ນສົມບູນ. ໂດຍການເປັນປະທານຂອງສະຫາຍ ແຫວນຄໍາ ປະທຸມມະແສງ ເລຂາໜ່ວຍພັກຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ມີບັນດາສະຫາຍເລຂາໜ່ວຍພັກ, ຄະນະໜ່ວນພັກ,  ສະມະຊິກພັກພາຍໃນ ສະພາປະຊາຊົນແຂວງ ແລະ ແຂກທີ່ຖືກເຊີນເຂົ້າຮ່ວມ.

ໃນພິທີໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 229/ຄປພຂ, ລົງວັນທີ 03 ກໍລະກົດ 2023 ວ່າດ້ວຍການອະນຸມັດສະມາຊິກພັກສຳຮອງ ເລື່ອນຂື້ນເປັນສະມາຊິກພັກສົມບູນຂອງພັກປະຊາຊົນປະຕິວັດລາວ ມີທັງໝົດ 4 ສະຫາຍ ຍິງ 3 ສະຫາຍ. ໂດຍສະມາຊິກພັກສົມບູນໄດ້ຜ່ານການຝຶກຝົນຫຼໍ່ຫຼອມກໍ່ສ້າງ ແລະ ຕິດຕາມປະເມີນຈາກ ຄະນະພັກ ຮອດຕາມກໍານົດ, ສະມາຊິກພັກສົມບູນ ແລະ ເຫັນໄດ້ວ່າ ເປັນຜູ້ທີ່ມີຄຸນສົມບັດສິນທຳປະຕິວັດ, ມີຄວາມຮູ້ ຄວາມສາມາດ, ມີຄວາມສາມັກຄີພາຍໃນ ແລະ ພາຍນອກຢ່າງກ້ວາງຂວາງມີແບບແຜນວິທີເຮັດວຽກ, ມີຄວາມຫ້າວຫັນ, ສູ້ຊົນ ແລະ ເຮັດສຳເລັດ ໜ້າທີ່ວຽກງານຕາມພັກ-ລັດມອບໝາຍໃຫ້ ພ້ອມທັງມີຄວາມຮັບຜິດຊອບສູງ ແລະ ມີຜົນງານດີເດັ່ນ ແລະ ໄດ້ຮັບຄວາມໄວ້ວາງໃຈຈາກການຈັດຕັ້ງ ມາຫາຊົນໃນສະໄໝສໍາຮອງເປັນເວລາຫຼາຍເດືອນ ຈິ່ງໄດ້ເລື່ອນຂື້ນເປັນສະມາຊິກພັກສົມບູນຢ່າງສົມກຽດ.

ໂອກາດນີ້, ສະຫາຍປະທານກອງປະຊຸມ ກໍ່ໄດ້ມີຄຳເຫັນໂອ້ລົມຕໍ່ສະມາຊິກພັກ ສົມບູນໃໝ່ ໂດຍໄດ້ເນັ້ນໃຫ້ສະມາຊິກພັກສົມບູນທຸກສະຫາຍຈົ່ງພ້ອມກັນເປັນເຈົ້າການປະຕິບັດ ແນວທາງນະໂຍບາຍ, ມະຕິ,ຄຳສັ່ງ, ກົດລະບຽບພັກ, ກົດໝາຍຂອງລັດຢ່າງເຂັ້ມງວດ ໂດຍສະເພາະປະຕິບັດຫນ້າທີ່ຕາມພາລະບົດບາດ, ສິດ, ໜ້າທີ່, ແລະ ຂໍ້ຫ້າມຂອງສະມາຊິກພັກຕັ້ງໜ້າຝຶກຝົນຫຼໍ່ຫຼອມຕົນເອງ ທາງດ້ານການເມືອງ-ແນວຄິດ ຄຸນສົມບັດສິນທຳປະຕິວັດ ມີຄວາມຈົ່ງຮັກພັກດີຕໍ່ປະຊາຊົນ ແລະ ປະເທດຊາດ ເພີ່ມທະວີຄວາມສາມັກຄີ ພ້ອມທັງເປັນແບບຢ່າງ ທີ່ດີໃຫ້ມາຫາຊົນສ້າງຄວາມສາມັກຄີພາຍໃນພັກ ຂອງຕົນໃຫ້ໜັກແໜ້ນເພື່ອສ້າງໃຫ້ໜ່ວຍພັກມີ ຄວາມປອດໃສ ເຂັ້ມແຂງ ແລະ ໜັກແໜ້ນ.