ໃນຕອນເຊົ້າວັນທີ 19 ມີຖຸນາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີ ເປີດຂະບວນການແຂ່ງຂັນ ຮັກຊາດ ແລະ ພັດທະນາ ປີ 2021 -2025 ຂອງສະພາປະຊາຊົນແຂວງຜົ້ງສາລີ ໂດຍພາຍໃຕ້ການເປັນປະທານຂອງທ່ານ ທອງສີ ເສົາສຸລິພົມ ຮອງເລຂາ ພັກແຂວງ, ປະທານສະພາປະຊາຊົນແຂວງ; ມີ ບັນດາທ່ານຄະນະປະຈໍາສະພາປະຊາຊົນແຂວງ, ຮອງປະທານຄະນະກໍາມະການ, ເລຂາ, ຮອງເລຂາທິການ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ

ໃນພິທີ ໄດ້ຮັບຟັງທ່ານ ຄໍາດາ ໂສລະພົມ ປະທານຄະນະກໍາມະການຍຸຕິທໍາ ແລະ ປກຊ-ປກສ ສະເໜີຈຸດປະສົງ; ຜ່ານຂໍ້ຕົກລົງ ວ່າດ້ວຍການອານຸມັດເປີດກອງປະຊຸມຂະບວນແຂ່ງຂັນ ຮັກຊາດ ແລະ ພັດທະນາ ຂອງສະພາປະຊາຊົນແຂວງ; ແລະ ທ່ານ ຫຸມເພັງ ຈອມວິສານ ຮອງປະທານສະພາປະຊາຊົນແຂວງ ກໍ່ໄດ້ກ່າວເປີດພິທີ ຢ່າງເປັນທາງການ; ຈາກນັ້ນ, ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ຜ່ານບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ໄລຍະປີ 2016 – 2020 ແລະ ທິດທາງແຜນການ ໄລຍະປີ 2021 -2025 ຂອງສະພາປະຊາຊົນແຂວງ; ຜ່ານແຜນການເປີດຂໍ້ແຂ່ງຂັນ ຮັກຊາດ ແລະ ພັດທະນາ ພາຍໃຕ້ຄໍາຂວັນ “4 ເຂັ້ມແຂງ 3 ຮັບປະກັນ” ໄລຍະ 5 ປີ (2021 -2025) ຂອງສະພາປະຊາຊົນແຂວງ ພ້ອມກັນນັ້ນ, ບັນດາຜູ້ເຂົ້າຮ່ວມ ກໍ່ໄດ້ປະກອບຄໍາຄິດຄໍາເຫັນຕໍ່ແຜນການເປີດຂໍ້ແຂ່ງຂັນດັ່ງກ່າວ ເພື່ອເຮັດໃຫ້ມີເນື້ອໃນຄົບຖ້ວນ, ຖືກຕ້ອງ, ຮັດກຸມ ເພື່ອສາມາດຈັດຕັ້ງປະຕິບັດຕາມແຜນການທີ່ວາງໃວ້

ໃນໂອກາດດຽວກັນນີ້, ປະທານພິທີ ໄດ້ມີຄໍາເຫັນໂອ້ລົມຕື່ມ ເຊິ່ງກ່ອນອື່ນ ທ່ານໄດ້ສະແດງຄວາມຊົມເຊີຍ ຕໍ່ຄະນະຮັບຜິດຊອບກອງປະຊຸມ ທີ່ໄດ້ມີຄວາມພະຍາຍາມຫ້າງຫາກະກຽມ, ປະສານ ແລະ ຈັດກອງປະຊຸມຄັ້ງນີ້ ຊຶ່ງເປັນກອງປະຊຸມຄັ້ງທີ I ສໍາລັບສະພາປະຊາຊົນແຂວງ ແລະ ເພື່ອເຮັດໃຫ້ການຈັດຕັ້ງປະຕິບັດວຽກງານແຂ່ງຂັນຮັກຊາດ ແລະ ພັດທະນາ ຢູ່ແຂວງເຮົາ ໄດ້ຮັບການຈັດ ຕັ້ງປະຕິບັດ ບັນລຸຕາມຈຸດປະສົງ ແລະ ຄາດໝາຍວາງໄວ້ ທ່ານ ໄດ້ຮຽກຮ້ອງ ແລະ ເນັ້ນຕື່ມດັ່ງນີ້:

1. ຕ້ອງກໍາແໜ້ນຈຸດປະສົງ, ຄາດໝາຍ ແລະ ເນື້ອໃນຂໍ້ແຂ່ງຂັນຮັກຊາດ ແລະ ພັດທະນາຂອງສະພາປະຊາຊົນແຂວງ ໃຫ້ເລິກເຊິ່ງ ແລະ ຫັນເປັນແຜນການ, ​ໂຄງການ ແລະ ມອບໝາຍຄວາມຮັບຜິດຊອບ ໃຫ້ລະອຽດຈະແຈ້ງ ແລະ ໃຫ້ສາມາດກວດກາ ແລະ ກວດສອບໄດ້ ໂດຍກໍານົດຕົວເລກຄາດໝາຍແຕ່ລະດ້ານ, ແຕ່ລະເນື້ອໃນ ໃຫ້ລະອຽດຈະແຈ້ງ ແລະ ໃຫ້ບັນລຸຕາມ 4 ເຂັ້ມແຂງ ( ເຂັ້ມແຂງ ທາງດ້ານການເມືອງ-ແນວຄິດ, ເຂັ້ມແຂງ ທາງດ້ານແບບແຜນນໍາພາ, ເຂັ້ມແຂງ ທາງດ້ານວຽກງານວິຊາສະເພາະ, ເຂັ້ມແຂງ ທາງດ້ານການຮ່ວມມືກັບປະເທດໃກ້ຄຽງ); 3 ຮັບປະກັນ ( ຮັບປະກັນ ອຸດົມການຂອງ ພັກ, ຮັບປະກັນ ລະບຽບກົດໝາຍ, ຮັບປະກັນ ອົງການອຳນັດລັດຂັ້ນທ້ອງຖິ່ນ);
2. ສືບຕໍ່ ປຸກລະດົມພະນັກງານ-ລັດຖະກອນພາຍໃນສະພາປະຊາຊົນແຂວງ ພ້ອມກັນອອກແຮງແຂ່ງຂັນກັນຢ່າງຕັ້ງໜ້າໃນການສ້າງຂະບວນການແຂ່ງຂັນ-ຍ້ອງຍໍໃຫ້ຟົດຟື້ນແຂງແຮງ ພາຍໃຕ້ຄໍາຂັວນ : « ຮັກຊາດ ແລະ ພັດທະນາ »ຖືເອົາການແຂ່ງຂັນຈຸດໝາຍລວມ 4 ເນື້ອໃນ 4 ຄາດໝາຍ ແລະ ບັນດາຄາດ ໝາຍສູ້ຊົນທີ່ພັກ-ລັດ ວາງອອກຕິດພັນກັບການຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ;
3. ຄະນະປະຈໍາສະພາປະຊາຊົນແຂວງ, ຄະນະໜ່ວຍພັກສະພາປະຊາຊົນແຂວງ ຕ້ອງສືບຕໍ່ປ່ຽນແປງຕົນເອງ ຢ່າງບໍ່ຢຸດຢັ້ງ ຕາມຈິດໃຈ 4 ບຸກທະລຸ ເພື່ອຕອບສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນນະພາບການນໍາພາ ຂອງພັກ ກໍ່ຄືຂອງຄະນະພັກແຕ່ລະຂັ້ນໃນໄລຍະໃໝ່, ນໍາພາຈັດຕັ້ງຜັນຂະຫຍາຍວຽກງານແຂ່ງຂັນ, ຍ້ອງຍໍ, ຮັກຊາດ ແລະ ພັດທະນາ ຕາມ 4 ເຂັ້ມແຂງ 3 ຮັບປະກັນ ໃຫ້ປະກົດຜົນເປັນຈິງ;
4. ຄະນະຊີ້ນໍາວຽກງານແຂງຂັນຮັກຊາດ ແລະ ພັດທະນາ ສະພາປະຊາຊົນແຂວງ ຕ້ອງເພີ່ມທະວີການນໍາພາ-ຊີ້ນໍາ ໃຫ້ແຂງແຮງ ແລະ ແທດຕົວຈິງ ໂດຍຫັນເປັນແຜນການ, ໂຄງການ ແລະ ມອບໝາຍຄວາມຮັບຜິດຊອບຈັດຕັ້ງປະຕິບັດໃຫ້ລະອຽດຈະແຈ້ງ; ມີການປະສານງານ, ປະສານສົມທົບຢ່າງ ກົມກຽວລະຫວ່າງພາກສ່ວນກ່ຽວຂ້ອງ, ມີການຕິດຕາມກວດກາ, ຊຸກຍູ້ຂະບວນການແຂ່ງຂັນເປັນປົກກະຕິ, ທຸກການເລືອກເຟັ້ນຍ້ອງຍໍສັນລະເສີນ ບຸກຄົນ, ນິຕິບຸກຄົນ ແລະ ກົມກອງລວມໝູ່ທີ່ດີເດັ່ນ ຕ້ອງຕິດພັນກັບຂະບວນການແຂ່ງຂັນຂອງສະພາປະຊາຊົນແຂວງ ໃນ 4 ເຂັ້ມແຂງ 3 ຮັບປະກັນ ເພື່ອໃຫ້ການຍ້ອງຍໍຖືກຕາມລະບຽບການ, ຖືກຕາມເງື່ອນໄຂ-ມາດຕະຖານທີ່ກຳນົດໄວ້, ຍ້ອງຖືກຜູ້ທີ່ມີຜົນງານທີ່ດີເດັ່ນ ເພື່ອເປັນການກະຕຸກຊຸກຍູ້ການປະຕິບັດ ໜ້າທີ່ວຽກງານມີຜົນສໍາເລັດ ເປັນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ;
5. ຕ້ອງສຸມໃສ່ປັບປຸງແບບແຜນ ແລະ ວີທີການຈັດຕັ້ງປະຕິບັດ ໂດຍຕິດພັນກັບການແກ້ບັນຫາຕົວຈິງ ຢ່າງມີຈຸດສຸມ, ມີເປົ້າໝາຍ ແລະ ຄາດໝາຍລະອຽດ ພ້ອມທັງກໍານົດ ແລະ ປະຕິບັດບັນດາວິທີການ, ມາດຕະການ ທີ່ສອດຄ່ອງກັບຈຸດພິເສດຢູ່ແຕ່ລະບ່ອນຢ່າງເປັນເຈົ້າການ ແລະ ປະດິດສ້າງ, ຮັບປະກັນຂຸດຄົ້ນນຳໃຊ້ທຸກປັດໃຈດ້ານທຶນຮອນ, ແຮງງານ, ມູນເຊື້ອ ຂອງແຕ່ລະທ່ານ ແລະ ທ່າແຮງ ຂອງສະພາປະຊາຊົນແຂວງ ຢ່າງເປັນຂະບວນຟົດຟື້ນ;
6. ການຈັດຕັ້ງປະຕິບັດວຽກງານແຂ່ງຂັນຮັກຊາດ ແລະ ພັດທະນາ ໃຫ້ເປັນໜຶ່ງໃນບັນດາມາດຕະການກະຕຸ້ນ, ສົ່ງເສີມຂະບວນການກ້ວາງຂວາງ ແລະ ຂະຫຍາຍຕົວຢ່າງບໍ່ຢຸດຢັ້ງ;
7. ຕ້ອງຖືເອົາວຽກງານແຂ່ງຂັນຮັກຊາດ ແລະ ພັດທະນາ ເປັນວຽກຍຸດທະສາດ, ສອດຫ້ອຍເຂົ້າໃນການຈັດຕັ້ງປະຕິບັດວຽກງານ, ຕ້ອງໄດ້ເພີ່ມທະວີ ການນໍາພາ, ຊີ້ນໍາ, ບັນຊາ ແລະ ຕິດຕາມ, ກວດກາ ການຜັນຂະຫຍາຍ ເນື້ອໃນແຂງຂັນຮັກຊາດ ແລະ ພັດທະນາ ສາມາດເລືອກເອົາຜູ້ທີ່ມີຜົນງານເດັ່ນ ໃນແຕລະໄລຍະ;
8. ໃຫ້ພາກສ່ວນທີ່ເຮັດໜ້າທີ່ເປັນເສນາທິການ ໃຫ້ຄະນະປະຈໍາສະພາປະຊາຊົນແຂວງ ໃນວຽກງານແຂ່ງຂັນຮັກຊາດ ແລະ ພັດທະນາ ສ້າງຄວາມເຂັ້ມແຂງ, ຍົກສູງຄວາມຮັບຜິດຊອບ ແລະ ເອົາໃຈໃສ່ປະສານສົມທົບ ແລະ ຕິດຕາມຊຸກ, ກວດກາປະເມີນຜົນ ແລະ ລາຍງານໃຫ້ຂັ້ນເທິງໃນແຕ່ລະໄລຍະໃຫ້ເປັນປົກກະຕິຕໍ່ເນື່ອງ ແລະ ທັນເວລາ.

ຫຼັງຈາກນັ້ນ, ບັນດາຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ ໄດ້ຂຶ້ນລົງທະບຽນ ແລະ ຈັບມືເປີດແຂ່ງຂັນ ຢ່າງເປັນທາງການ

ພາບ-ຂ່າວ: ນັກຂ່າວສະພາປະຊາຊົນແຂວງ