(ສ​ພ​ຊ) ເພື່ອ​ລະ​ນຶກ​ເຖິງ​ຜົນ​ງານ ແລະ ຄຸນ​ງາມ​ຄວາມ​ດີ​ຂອງ​ບັນ​ດາ​ທ່ານອະ​ດີດກ​ານນ​ຳ, ສະ​ມາ​ຊິກ​ສະ​ພາແຫ່ງຊາດ ແລະ ພະ​ນັກງານ-ລັດ​ຖະ​ກອນ ​ທ​ີ່​ເຄີຍ​ປະ​ຕິ​ບັດ​ໜ້າ​ທີ່​ວຽກ​ງານ​ຢູ່ ສ​ະ​ພາ​ປະ​ຊາ​ຊົນ​ສູງ​ສຸ​ດ ກໍຄືສະ​ພາ​ແຫ່ງ​ຊາ​ດ ທີ່ໄດ້​​ເສຍ​ຊີ​ວິດ​ໄປ​ແລ້ວນັ້ນ, ໃນຕອນເຊົ້າວັນ​ທີ 3 ທັນ​ວາ 2022 ຢູ່​ທີ່​ຫໍ​ສະ​ພາ​ແຫ່​ງ​ຊາດ ໄດ້​ມີພິທີໃສ່ບາດ ຖວາຍກອງບຸນ ແລະ ເຄື່ອງສັງຄະທານ ແດ່ພະສົງ 49 ອົງ ແລະ ຟັງອະນຸໂມທະນາກະຖາ, ຄາລະວະ ຮັບພອນ ຢາດນໍ້າ ອຸທິດສ່ວນບຸນກຸສົນ​ແດ່​ອະ​ດີດ​ການ​ນຳທີ່ລ່ວງລັບໄປແລ້ວ ໂດຍ​ການ​ເປັນ​ເຈົ້າ​ພາບ​ເຈົ້າ​ສັດ​ທາຂອງ​ສະ​ພາ​ແຫ່ງ​ຊາດ, ສູນກາງແນວລາວສ້າງຊາດ ແລະ ປະຊາຊົນລາວບັນດາເຜົ່າ ທີ່ມີຈິດໃຈໃສສັດທາ. ໃນພິ​ທີ​ຄັ້ງ​ນີ້ມີ ພຣະອາຈານໃຫຍ່ ມະຫາບຸນມາ ສິມມະພົມ ປະທານສູນກາງອົງການພຸດທະສາສະໜາສໍາພັນ ແຫ່ງ ສປປລາວ, ມີ​ບັນດາທ່ານອະດີດການນໍາຂັ້ນສູງ, ບັນ​ດາ​ທ່ານ​ການ​ນຳ​ພັກ​-ລັດ, ພຣະເຖຣະນຸເຖຣະ, ອົງ​ກາ​ນ​ຈັດ​ຕັ້ງ​ຕ່າງໆ, ສະ​ມາ​ຊິກ​ສະ​ພາ​ແຫ່ງ​ຊາດ, ແຂກ​ຖືກ​ເຊີນ, ພະ​ນັກ​ງານ-ລັດ​ຖະ​ກອນ, ບໍ​ລິ​ສັດ​ຕ່າງໆ ແລະ ມວນ​ຊົນ​ພາຍ​ໃນ​ນະ​ຄອນ​ຫຼວງວຽງ​ຈັນເຂົ້າ​ຮ່ວມ​ຢ່າງ​ຫຼວງ​ຫຼາຍ.

​ພິທີ​ອຸ​ທິດ​ສ່ວນ​ບຸນ​ກຸ​ສົນຄັ້ງນີ້ ​ປະ​ກອບ​ມີ​ກອງບຸນ ແລະ ກອງອັດຖະ ຈໍານວນ 31 ກອງ ເຊິ່ງອຸທິດເຖິງບັນດາທ່ານຄື: 1. ທ່ານ ປະທານ ໄກສອນ ພົມວິຫານ; 2. ທ່ານ ສຸພານຸວົງ; 3. ທ່ານ ໜູຮັກ ພູມສະຫວັນ; 4. ທ່ານ ສະໝານ ວິຍະເກດ; 5. ທ່ານ ສີສົມພອນ ລໍວັນໄຊ; 6. ທ່ານ ສີທົນ ກົມມະດຳ; 7. ທ່ານ ໄຟດ່າງ ລໍເບຼຍຢາວ; 8. ທ່ານ ຄຳສຸກ ແກ້ວລາ; 9. ທ່ານ ຄຳບູ່ ສຸນິໄຊ; 10. ທ່ານ ວົງເພັດ ໄຊເກີຢາຈົງຕົວ; 11. ທ່ານ ອຸ່ນເນື້ອ ພິມມະສອນ; 12. ທ່ານ ເຫຼື່ອມ ອິນສີຊຽງໃໝ່; 13. ທ່ານ ສຸວັນນະລາດ ໄຊຍະວົງ; 14. ທ່ານ ດຣ. ສົມພະວັນ ອິນທະວົງ; 15. ທ່ານ ໄຊ ເພັດລາສີ; 16. ທ່ານ ທິດມ່ວນ ສາວຈັນທະລາ; 17. ທ່ານ ນາງ ຄຳແພງ ບຸບຜາ; 18. ທ່ານ ສີເມີຍ ນາມລາຊາ; 19. ທ່ານ ດຣ. ຄຳລຽງ ພົນເສນາ; 20. ທ່ານ ເກຍຸນ ຍົດໄຊວິບູນ; 21. ທ່ານ ດຣ. ບົວສີ ລໍວັນໄຊ; 22. ທ່ານ ທອງສາ ປັນຍາສິດ; 23. ທ່ານ ພົວ. ໄຊສົມແພງ ສຸລິຍະວົງ; 24. ທ່ານ ສົມພອນ ຂະຫຍອງເອກ; 25. ທ່ານ ພົຕ. ບຸນທອນ ຈິດວິລະພົນ; 26. ທ່ານ ຄຳສິງ ໄຊຍະກອນ; 27. ທ່ານ ດວງດີ ອຸດທະຈັກ; 28. ທ່ານ ພົວ. ວິໄລ ດວງມະນີ; 29. ບັນດາທ່ານ ອະດີດສະມາຊິກສະພາແຫ່ງຊາດ; 30. ອະດີດພະນັກງານ-ລັດຖະກອນ; 31. ເຈົ້າຖິ່ນ ເຈົ້າຖານ, ເຈົ້າກຳນາຍເວນ, ເຈົ້າພໍ່ມະຫາທາ.