ໃນຕອນເຊົ້າຂອງວັນທີ 2 ມິຖຸນາ 2022 ທີ່ສະພາປະຊາຊົນແຂວງຄໍາມ່ວນ ໄດ້ຈັດພິທີເຊັນບົດບັນທຶກວ່າດ້ວຍການປະສານງານຮ່ວມລະຫວ່າງ ຄະນະກໍາມະການວັດທະນະທຳ-ສັງຄົມ ແລະ ບັນດາເຜົ່າສະພາປະຊາຊົນແຂວງ ກັບ ພາກສ່ວນທີ່ກ່ຽວຂ້ອງຂອງແຂວງຄື: ພະແນກແຮງງານ ແລະສະຫວັດດີການ-ສັງຄົມ, ພະແນກສາທາລະນະສຸກ, ພະແນກແຫຼງຂ່າວ-ວັດທະນະທຳ ແລະທ່ອງທ່ຽວ, ພະແນກສຶກສາທິການ ແລະ ກິລາ, ພະແນກພາຍໃນແຂວງ ໂດຍການໃຫ້ກຽດເຂົ້າຮ່ວມເປັນປະທານກອງປະຊຸມເພື່ອເປັນສັກຂິພິຍານໃນຄັ້ງນີ້ ໂດຍ ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍ ທ່ານ ນາງ ກ້ອນແກ້ວ ຫຼວງໄຊມຸງຄຸນ ປະທານ ຄະນະກຳມະການວັດທະນະທຳສັງຄົມ ແລະ ບັນດາເຜົ່າ ມີບັນດາທ່ານ ຄະນະປະຈໍາສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກກການ, ພ້ອມດ້ວຍແຂກຖືກເຊີນເຂົ້າຮ່ວມເປັນສັກຂີພິຍານ.

ຈຸດປະສົງຂອງການເຊັນບົດບັນທຶກໃນຄັ້ງນີ້ແມ່ນເພື່ອເຮັດໃຫ້ການປະສານງານລະຫວ່າງຄະນະກໍາມະການກັບພະແນກການທີ່ກ່ຽວຂ້ອງເຄື່ອນໄຫວຈັດຕັ້ງປະຕິບັດວຽກງານໃຫ້ມີປະສິດທິພາບ, ປະສິດທິຜົນຮັດກຸມ ແລະ ກຳນົດເວລາສາມາດຮັບປະກັນດ້ານເນື້ອໃນຖືກຕ້ອງສອດຂ້ອງ ແລະ ສະໜອງຂໍ້ມູນເຊິ່ງກັນ ແລະ ກັນໃຫ້ວ່ອງໄວ, ທັນການ, ຈະແຈ້ງ ແລະ ຮັບປະກັນຄວາມຖືກຕ້ອງຕາມຂັ້ນຕອນລະບຽບກົດໝາຍກໍານົດໄວ້.

ໂດຍ: ເອື້ອ ມະໂນສິງ