ໂຄງການກໍ່ສ້າງລະບົບນໍ້າປະປາບ້ານຈອມທອງ ໄດ້ເລີ່ມລົງມືກໍ່ສ້າງແຕ່ວັນທີ 18 ພະຈິກ 2022 ເປັນຕົ້ນມາ ພາຍໃຕ້ເງື່ອນໄຂສັນຍາລະຫວ່າງພະແນກພະລັງງານ ແລະ ບໍ່ແຮ່ ກັບ ລັດວິສາຫະກິດນໍ້າປະປາແຂວງບໍລິຄຳໄຊ, ໂດຍມີມູນຄ່າ 3.081 ລ້ານກວ່າກີບ ຫຼື ເທົ່າກັບ 257.223 ໂດລາ, ກຳນົດໄລຍະເວລາກໍ່ສ້າງຕາມສັນຍາແມ່ນ 18 ເດືອນ ແຕ່ກໍ່ສ້າງແລ້ວກ່ອນກຳນົດ 4 ເດືອນ. ລະບົບໂຮງງານນໍ້າປະປາແຫ່ງນີ້ ສາມາດຜະລິດນໍ້າໄດ້ 240 ແມັດກ້ອນ/ວັນ, ແຕ່ໃນຕົວຈິງສາມາດຜະລິດນໍ້າໄດ້ບໍ່ຕໍ່າກວ່າ 350 ແມັດກ້ອນ/ວັນ ເກີນແຜນການ 46% ຄາດວ່າຈະສາມາດຕອບສະໜອງປະ ລິມານນໍ້າທີ່ສະອາດ-ປອດໄພໃຫ້ແກ່ປະຊາຊົນໄດ້ຊົມໃຊ້ຢ່າງພຽງພໍ ແລະ ຍັງມີເງື່ອນໄຂສາມາດຂະຫຍາຍໄປຫາເຂດພື້ນທີ່ອື່ນຕື່ມອີກ ຕາມຄວາມຕ້ອງການຂອງປະຊາຊົນມີຄວາມຮຽກຮ້ອງຕ້ອງການຊົມໃຊ້.

ໃນພິທີ, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມ ໂດຍໄດ້ຍົກໃຫ້ເຫັນຄວາມຈຳເປັນ ແລະ ຄວາມສຳຄັນໃນການມີລະບົບນໍ້າປະປາໃຊ້ໃນຄົວເຮືອນ ກໍຄືການທຳມາຫາກິນຂອງປະຊາຊົນໃນບ້ານຈອມທອງ ທີ່ຍັງຂາດເຂີນນໍ້າໃຊ້, ໃນໄລຍະຜ່ານມາ ທ່ານປະທານສະພາແຫ່ງຊາດ ໄດ້ມີການລະດົມທຶນຮອນຈາກຜູ້ພັດທະນາໄດ້ຈຳ ນວນໜຶ່ງ ເພື່ອສ້າງໃຫ້ມີໂຄງການ ເຊິ່ງເບື້ອງຕົ້ນແມ່ນໂຄງການເຈາະນໍ້າບາດານ, ແຕ່ໄລຍະຕໍ່ມາຈຶ່ງໄດ້ມີການສົມທົບທຶນຈາກບ້ວງກອງທຶນພັດທະນາຊຸມຊົນຂອງໂຄງການເຂື່ອນໄຟຟ້ານໍ້າເທີນ 1 ໃນມູນຄ່າ 3 ຕື້ກວ່າກີບ ເພື່ອສ້າງເປັນໂຄງ ການນໍ້າປະປາໃຫ້ແກ່ບ້ານດັ່ງກ່າວ, ລະບົບນໍ້າປະປາແຫ່ງນີ້ ຈະສາມາດປະກອບສ່ວນສ້າງເງື່ອນໄຂສະດວກກວ່າເກົ່າໃຫ້ແກ່ການທຳມາຫາກິນຂອງພໍ່ແມ່ປະຊາຊົນ ຈຳນວນ 364 ຄອບຄົວ ທີ່ມີຈຳນວນປະຊາຊົນ 1.896 ຄົນ, ເປັນການຍົກສູງຄຸນນະພາບຊີວິດຂອງປະຊາຊົນໃຫ້ນັບມື້ນັບດີຂຶ້ນ. ນອກຈາກນີ້, ໂຄງການດັ່ງກ່າວຍັງຈະເປັນການປະກອບສ່ວນຢ່າງຫຼວງຫຼາຍໃຫ້ແກ່ການຂະຫຍາຍຕົວທາງດ້ານເສດຖະກິດ-ສັງຄົມຂອງບ້ານຈອມທອງ ແລະ ບ້ານທາດພູວຽງ ເມືອງວຽງທອງ ເຊິ່ງແມ່ນບ້ານໜຶ່ງທີ່ນອນໃນບຸລິມະສິດສ້າງບ້ານໃຫຍ່ກາຍເປັນຕົວເມືອງນ້ອຍ ເພື່ອເປັນການສ້າງເງື່ອນໄຂໃນການບັນລຸເປົ້າໝາຍສະຫັດສະວັດເພື່ອການພັດທະນາ (MDGs) ໃນປີ 2025, ເຊື່ອໝັ້ນວ່າ ປະຊາຊົນບ້ານຈອມທອງຈະປົກປັກຮັກສາໂຄງການລະບົບນໍ້າປະປານີ້ໃຫ້ດີ ແລະ ສາມາດນໍາໃຊ້ໄດ້ຍາວນານ ເພື່ອໃຫ້ລູກຫຼານຂອງພວກເຮົານໍາໃຊ້ຕໍ່ໄປພາຍໜ້າ.

ໂອກາດນີ້, ທ່ານຮອງປະທານສະພາແຫ່ງຊາດ ຍັງໄດ້ນຳເອົາເຄື່ອງນຸ່ງຫົ່ມ ແລະ ອຸປະກອນການຮຽນຈຳນວນ ໜຶ່ງ ມອບໃຫ້ບ້ານຈອມທອງ ເພື່ອນຳໄປມອບຕໍ່ໃຫ້ຜູ້ທີ່ມີຄວາມຈຳເປັນ ແລະ ຂາດເຂີນ.

(ຂ່າວ-ພາບ: ກົງທະນູຄຳ ພິພັດເສລີ)