ໃນວັນທີ 30 ກັນຍາ 2024 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ຂອງໜ່ວຍພັກສະພາປະຊາຊົນແຂວງ, ພິທີມອບ-ຮັບໃບຍ້ອງຍໍຜູ້ມີຜົນງານດີເດັ່ນ ໃນການແຂ່ງຂັນ-ຍ້ອງຍໍຮັກຊາດ ແລະ ພັດທະນາ ແຂວງຜົ້ງສາລີ ປະຈໍາປີ 2023 ແລະ ມອບ-ຮັບຫຼຽນກາລະນຶກ 65 ປີ, ຫຼຽນຊາວໜຸ່ມຕະລຸມບອນ ໂດຍໃຫ້ກຽດເຂົ້າຮ່ວມເປັນປະທານ ຂອງສະຫາຍ ສົມຈິດ ຫັບລະກອນ ກໍາມະການປະຈໍາພັກແຂວງ, ຮອງປະທານ ສະພາປະຊາຊົນແຂວງ, ເຂົ້າຮ່ວມມີກໍາມະການພັກແຂວງ, ມີເລຂາ, ຮອງເລຂາ ແລະ ຄະນະໜ່ວຍພັກສະພາປະຊາຊົນແຂວງ, ຕາງໜ້າຈາກຄະນະຈັດຕັ້ງແຂວງ, ອົງການກວດກາພັກ-ລັດແຂວງ, ຄະນະໂຄສະນາອົບຮົມແຂວງ, ຄະນະບໍລິຫານງານຊາວໜຸ່ມແຂວງ ແລະ ສະມາຊິກພັກ ພາຍໃນສະພາປະຊາຊົນແຂວງ ເຂົ້າຮ່ວມ ຢ່າງພ້ອມພຽງ.
ໃນພິທີໄດ້ຮັບຟັງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ ຜ່ານບົດສະຫຼຸບການນໍາພາຂອງໜ່ວຍພັກສະພາປະຊາຊົນແຂວງ ປະຈໍາປີ 2023 ແລະ ທິດທາງແຜນການປະຈໍາປີ 2024; ຮັບຟັງຕາງໜ້າຄະນະຈັດຕັ້ງແຂວງ ຜ່ານມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍການອະນຸມັດມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2023 ສະບັບເລກທີ 477/ຄຈຂ, ລົງວັນທີ 20 ສິງຫາ 2024;. ຈາກນັ້ນ, ໄດ້ມີການມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ເຊິ່ງຕາງໜ້າຈາກຄະນະພັກຂັ້ນເທິງຂຶ້ນມອບໂດຍ ສະຫາຍ ສົມຈິດ ຫັບລະກອນ ກໍາມະການປະຈໍາພັກແຂວງ, ຮອງປະທານ ສະພາປະຊາຊົນແຂວງ ແລະ ຂຶ້ນຮັບໂດຍ ຄະນະໜ່ວຍພັກສະພາປະຊາຊົນແຂວງ;
ໃນໂອກາດດຽວກັນນີ້, ກໍ່ໄດ້ມີການມອບ-ຮັບໃບຍ້ອງຍໍຜູ້ມີຜົນງານດີເດັ່ນ ໃນການແຂ່ງຂັນຍ້ອງຍໍ, ຮັກຊາດ ແລະ ພັດທະນາປະຈໍາປີ 2023 ເຊິ່ງສະພາປະຊາຊົນແຂວງ ໄດ້ຮັບທັງໝົດ ຈໍານວນ 44 ທ່ານ, ຍິງ 17 ທ່ານ
ມອບ-ຮັບຫຼຽນກາລະນຶກ 65 ປີ, ຫຼຽນຊາວໜຸ່ມຕະລຸມບອນ ໃຫ້ແກ່ຄະນະນໍາສະພາປະຊາຊົນແຂວງຈໍານວນໜຶ່ງ ເຊິ່ງໃຫ້ກຽດຂຶ້ນມອບໂດຍ ສະຫາຍ ພອນສຸຈິດ ລີລາວົງ ກໍາມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງ ແລະ ຂຶ້ນຮັບໂດຍການນໍາສະພາປະຊາຊົນແຂວງ
ໃນຕອນທ້າຍ, ປະທານພິທີໄດ້ມີຄໍາເຫັນໂອ້ລົມ ຕໍ່ພິທີຄັ້ງນີ້, ເຊິ່ງກ່ອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສຳເລັດ ທີ່ບັນດາສະຫາຍຄະນະໜ່ວຍພັກ ກໍ່ຄືສະມາຊິກພັກ ແລະ ພະນັກງານ-ລັດຖະກອນ ທີ່ຍາດມາໄດ້ ໃນຕະຫຼອດໄລຍະປີ 2023, ຈາກນັ້ນ, ສະຫາຍ ໄດ້ເນັ້ນຕື່ມບາງບັນຫາ ດັ່ງນີ້:
- ກ່ອນອື່ນໝົດ ຕ້ອງກຳແໜ້ນ ແລະ ເຊື່ອມຊືມ ເນື້ອໃນຂອງກົດລະບຽບຂອງພັກ ໃນແຕ່ລະສະໄໝຂອງກອງປະຊຸມໃຫຍ່ຂອງພັກ ແລະ ຮູ້ຜັນຂະຫຍາຍເຂົ້າໃນການນໍາພາຂອງໜ່ວຍພັກ;
- ສືບຕໍ່ປັບປຸງ ກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ເປັນແບບຢ່າງນຳໜ້າ ໃນການປະຕິບັດໜ້າທີ່ວຽກງານ, ມີລະບຽບວິໄນ, ມີແບບແຜນວິທີນຳພາ ທີ່ມີວິທະຍາສາດ, ປະດິດສ້າງ ແລະ ແທດເຖິງຕົວຈິງ;
- ເພີ່ມທະວີຜັນຂະຫຍາຍ, ເຜີຍແຜ່ແຜນການ ແລະ ຄາດໝາຍສູ້ຊົນຂອງໜ່ວຍພັກໃຫ້ສະມາຊິກພັກ, ອົງການຈັດຕັ້ງມະຫາຊົນ ແລະ ບັນດາຂະແໜງການຢູ່ພາຍໃນໃຫ້ຮັບຮູ້, ເຊື່ອມຊືມ, ກຳແໜ້ນ ແລະ ຫັນເປັນແຜນການປະຈຳເດືອນຂອງຕົນ;
- ເອົາໃຈໃສ່ໃນການຕິດຕາມ, ຊຸກຍູ້ ການສະຫຼຸບຕີລາຄາປະເມີນຜົນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍອີງໃສ່ແຜນການຄາດໝາຍສູ້ຊົນທີ່ໄດ້ວາງໄວ້;
- ສ້າງໃຫ້ໜ່ວຍພັກສາມາດເປັນແກນນຳ ໃນການຈັດຕັ້ງນຳພາ ປະຕິບັດໜ້າທີ່ການເມືອງຂອງຕົນໂດຍສະເພາະ ແມ່ນ ວຽກງານສະພາປະຊາຊົນແຂວງ ໄປສູ່ຄຸນນະພາບໃໝ່ ດ້ວຍພູມປັນຍາຂອງຄະນະພັກ, ສະມາຊິກພັກແຕ່ລະສະຫາຍ;
- ບັນດາສະຫາຍຄະນະໜ່ວຍພັກຕ້ອງສູມຄວາມພະຍາຍາມ ລົງເລີກເຮັດວຽກງານກວດກາ, ກວດການຈັດຕັ້ງປະຕິບັດໜ້າທີ່ວຽກງານຮອບດ້ານຂອງພາຍໃນພັກ, ພາຍໃນສະພາປະຊາຊົນແຂວງ ບົນພື້ນຖານມະຕິຂອງໜ່ວຍພັກ, ຕິດພັນກັບຄໍາຂວັນ 3 ເຂັ້ມແຂງ, 4 ຮັບປະກັນ ຂອງສະພາປະຊາຊົນແຂວງໃຫ້ກາຍເປັນພຶດຕິກຳຕົວຈີງ;
- ສະມາຊິກພັກແຕ່ລະສະຫາຍ ຕ້ອງເປັນເຈົ້າການໃນການພັດທະນາກົມກອງ ແລະ ພັດທະນາຕົນເອງດ້ວຍຄວາມເປັນແບບຢ່າງນຳໜ້າ ສົມກັບວ່າເປັນສະມາຊິກພັກ ປອດໃສ, ເຂັ້ມແຂງ, ໜັ້ກແໜ້ນ ກຽມພ້ອມເພື່ອປະກອບສ່ວນພາລະກິດທີ່ພັກ-ລັດ ໄດ້ມອບໝາຍ, ຖ້າສະມາຊິກພັກເຂັ້ມແຂງ, ມີລະບຽບວິໄນຂອງພັກ, ໜ່ວຍພັກກໍ່ກາຍເປັນໜ່ວຍພັກປອດໃສ ເຂັ້ມແຂງ ໜັ້ກແໜ້ນ ທີ່ມີຄຸນນະພາບ.
ພາບ-ຂ່າວ: ສຸນທອງ