ໃນຕອນເຊົ້າ ວັນທີ 11 ມັງກອນ 2024 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຂອງໜ່ວຍພັກສະພາປະຊາຊົນແຂວງ, ພິທີມອບ-ຮັບບັດສະມາຊິກພັກສົມບູນ ແລະ ມອບ-ຮັບໃບຍ້ອງຍໍຜູ້ມີຜົນງານດີເດັ່ນ ປະຈໍາປີ 2022 ໂດຍໃຫ້ກຽດເຂົ້າຮ່ວມເປັນປະທານ ຂອງສະຫາຍ ທອງສີ ເສົາສຸລິພົມ ຮອງເລຂາພັກແຂວງ, ປະທານ ສພຂ, ເຂົ້າຮ່ວມມີກໍາມະການປະຈໍາພັກແຂວງ, ມີເລຂາ, ຮອງເລຂາ ແລະ ຄະນະໜ່ວຍພັກສະພາປະຊາຊົນແຂວງ, ຕາງໜ້າຈາກຄະນະຈັດຕັ້ງແຂວງ, ອົງການກວດກາພັກ-ລັດແຂວງ, ຄະນະໂຄສະນາອົບຮົມແຂວງ ແລະ ສະມາຊິກພັກ ພາຍໃນສະພາປະຊາຊົນແຂວງ ເຂົ້າຮ່ວມ ຢ່າງພ້ອມພຽງ.
ໃນພິທີໄດ້ຮັບຟັງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ ຜ່ານບົດສະຫຼຸບການນໍາພາຂອງໜ່ວຍພັກສະພາປະຊາຊົນແຂວງ ປະຈໍາປີ 2022 ແລະ ທິດທາງແຜນການປະຈໍາປີ 2023; ຮັບຟັງຕາງໜ້າຄະນະຈັດຕັ້ງແຂວງ ຜ່ານມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍການອະນຸມັດມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ສະບັບເລກທີ 561/ຄພຂ, ລົງວັນທີ 29 ສິງຫາ 2023; ມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການມອບບັດສະມາຊິກພັກສົມບູນ ທີ່ຄົບມາດຖານ. ຈາກນັ້ນ, ໄດ້ມີການມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ເຊິ່ງຕາງໜ້າຈາກຄະນະພັກຂັ້ນເທິງຂຶ້ນມອບໂດຍ ສະຫາຍ ທອງສີ ເສົາສຸລິພົມ ຮອງເລຂາພັກແຂວງ, ປະທານ ສພຂ ແລະ ຂຶ້ນຮັບໂດຍ ຄະນະໜ່ວຍພັກສະພາປະຊາຊົນແຂວງ; ມອບ-ຮັບບັດສະມາຊິກພັກສົມບູນ ຕາງໜ້າຂຶ້ນມອບໂດຍ ສະຫາຍ ທອງສີ ເສົາສຸລິພົມ ຮອງເລຂາພັກແຂວງ, ປະທານ ສພຂ ແລະ ຂຶ້ນຮັບໂດຍສະມາຊິກພັກສົມບູນ ຈໍານວນ 15 ສະຫາຍ
ໃນໂອກາດດຽວກັນນີ້, ກໍ່ໄດ້ມີການມອບ-ຮັບໃບຍ້ອງຍໍຜູ້ມີຜົນງານດີເດັ່ນ ໃນການແຂ່ງຂັນຍ້ອງຍໍ, ຮັກຊາດ ແລະ ພັດທະນາປະຈໍາປີ 2022 ເຊິ່ງສະພາປະຊາຊົນແຂວງ ໄດ້ຮັບທັງໝົດ ຈໍານວນ 47 ທ່ານ, ຍິງ 21 ທ່ານ
ໃນຕອນທ້າຍ, ປະທານພິທີໄດ້ມີຄໍາເຫັນໂອ້ລົມ ຕໍ່ພິທີຄັ້ງນີ້, ເຊິ່ງກ່ອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສຳເລັດ ທີ່ບັນດາສະຫາຍຄະນະໜ່ວຍພັກ ກໍ່ຄືສະມາຊິກພັກຍາດມາໄດ້ ໃນຕະຫຼອດໄລຍະປີ 2022, ຈາກນັ້ນ, ສະຫາຍ ໄດ້ເນັ້ນຕື່ມບາງບັນຫາ ດັ່ງນີ້:
- ກ່ອນອື່ນໝົດກຳແໜ້ນ ແລະ ເຊື່ອມຊືມ ເນື້ອໃນຂອງກົດລະບຽບຂອງພັກໃນແຕ່ລະສະໄໝຂອງກອງປະຊຸມໃຫຍ່ຂອງພັກ ແລະ ຕີຄວາມໝາຍໃຫ້ຖືກຕ້ອງ;
- ພາຍຫຼັງມີແຜນການຄາດໝາຍສູ້ຊົນຂອງໜ່ວຍພັກ ທີ່ໄດ້ຮັບຮອງຈາກຄະນະພັກຂັ້ ນເທິງແລ້ວຕ້ອງນຳເອົາແຜນດັ່ງກ່າວໄປຈັດຕັ້ງເຜີຍແຜ່ໃຫ້ສະມາຊິກພັກ, ອົງການຈັດຕັ້ງມະຫາຊົນ ແລະ ບັນດາຂະແໜງການຢູ່ພາຍໃນໃຫ້ຮັບຮູ້, ເຊື່ອມຊືມ, ກຳແໜ້ນ ແລະ ຫັນເປັນແຜນການປະຈຳເດືອນຂອງໜ່ວຍພັກຕົນ;
- ສ້າງໃຫ້ໜ່ວຍພັກສາມາດເປັນແກນນຳ ໃນການຈັດຕັ້ງນຳພາ ປະຕິບັດໜ້າທີ່ການເມືອງຂອງຕົນໂດຍສະເພາະ ແມ່ນ ວຽກງານສະພາປະຊາຊົນແຂວງ ໄປສູ່ຄຸນນະພາບໃໝ່ ດ້ວຍພູມປັນຍາຂອງຄະນະພັກ, ສະມາຊິກພັກແຕ່ລະສະຫາຍ;
- ສະມາຊິກພັກແຕ່ລະສະຫາຍ ຕ້ອງເປັນເຈົ້າການໃນການພັດທະນາກົມກອງ ແລະ ພັດທະນາຕົນເອງດ້ວຍຄວາມເປັນແບບຢ່າງນຳໜ້າ ສົມກັບວ່າເປັນສະມາຊິກພັກ ປອດໃສ, ເຂັ້ມແຂງ, ໜັ້ກແໜ້ນ ທີ່ມີຄຸນນະພາບ;
- ຕ້ອງໄດ້ເພີ່ມທະວີການກໍາແໜ້ນແນວທາງ, ນະໂຍບາຍ ຂອງພັກ-ລັດ, ມະຕິ, ຄໍາສັ່ງ, ນິຕິກຳຕ່າງໆຂອງຂັ້ນເທິງ ລວມທັງພາລະບົດບາດສິດໜ້າທີ່ຂອງສະພາປະຊາຊົນແຂວງ, ຄາດໝາຍສູ້ຊົນທີ່ຂັ້ນເທິງກໍ່ຄືຂັ້ນຂອງຕົນວາງອອກ,
- ໃນເງື່ອນໄຂຄວາມຮຽກຮ້ອງຕ້ອງການຂອງສະພາບການໃໝ່, ການນໍາແຕ່ລະຂັ້ນຕ້ອງໄດ້ພະຍາຍາມປະຕິບັດຄວາມເປັນແບບຢ່າງໃຫ້ດີ, ເປັນຕົ້ນແມ່ນການເປັນແບບຢ່າງໃນການປະຕິບັດໜ້າທີ່ການເມືອງ, ການວາງທັດສະນະມະຫາຊົນ, ຄຸນສົມບັດ, ສິນທໍາປະຕິວັດ, ການເຄື່ອນ ໄຫວພົວພັນສັງຄົມ, ການຝຶກຝົນຫຼໍ່ຫຼອມຕົນເອງ, ການສ້າງເສດຖະກິດຄອບຄົວ ແລະ ອື່ນໆ;
- ການຕີລາຄາແບ່ງປະເພດຄຸນນະພາບສະມາຊິກພັກ ເພື່ອຮັບບັດສະມາຊິກພັກ ຕິດພັນກັບການປັບປຸງພາຍໃນພັກ, ຈຸດປະສົງແມ່ນຍາກໃຫ້ສະມາຊິກພັກສົມບຸນທຸກສະຫາຍໄດ້ຮັບບັດ ແຕ່ຕ້ອງມີການສໍາຫຼວດກວດກາປະເມີນຜົນ ຕາມລະບຽບຫຼັກການກ່ອນ, ການຕິລາຄາຮັບບັດແມ່ນຄວາມຮັບຜິດຊອບໂດຍກົງຂອງສະຫາຍເລຂາໜ່ວຍພັກ ແລະ ຕ້ອງເຮັດປະຈໍາຢ່າງນ້ອຍ 3 ຄັ້ງຕໍ່ປີ;
- ສະເໜີໃຫ້ການນໍາສະພາປະຊາຊົນແຂວງ, ພະນັກງານຫຼັກແຫຼ່ງ ແລະ ພະນັກງານວິຊາການທຸກພາກສ່ວນ ສືບຕໍ່ເອົາໃຈໃສ່ປະຕິບັດໜ້າທີ່ໄດ້ຮັບການມອບໝາຍຈາກຂັ້ນເທິງ ດ້ວຍຄວາມຮັບຜິດຊອບສູງ ຫຼິກເວັ້ນແນວຄິດເອື່ອຍອີງ, ສົມທຽບຊັ່ງຊາ, ເອົາລັດເອົາປຽບ ເຊິ່ງຈະພາໄປເຖິງ ເສື່ອມເສຍບົດບາດການນໍາພາລວມຂອງຄະນະພັກ-ຄະນະນໍາ ຂອງສະພາປະຊາຊົນແຂວງ ແລະ ກ້າວໄປເຖິງພະນັກງານເສຍທາດຂາດຄຸນ ແລະ ອື່ນໆ. ເຊິ່ງໃນເງື່ອນໄຂໃໝ່ນີ້ຮຽກຮ້ອງໃຫ້ທຸກຄົນມີຄວາມບຸກບືນຕັ້ງໜ້າ, ສະແຫວງຫາຄວາມຮູ້ຄວາມສາມາດ ເພື່ອອຸທິດແກ່ການພັດທະນາຕົນເອງ ແລະ ກົມກອງໃຫ້ມີຄວາມຈະເລີນກ້າວໜ້າ;
ພາບ-ຂ່າວ: ສຸນທອງ