(ສພຊ) – ວັນທີ 25 ທັນວາຜ່ານມາ ທີ່ສະພາແຫ່ງຊາດ ໄດ້ມີພິທີມອບ-ຮັບ ແລະ ແຈກຢາຍລົດຖີບຈາກ ໂຄງການ “ນ້ຳໃຈຮັກລາວ” ໃຫ້ແກ່ນັກຮຽນໃນ ສປປລາວ ຈຳນວນ 1,000 ຄັນ ລວມມູນຄ່າ 495 ພັນຢວນ (ປະມານ 1.460 ຕື້ກີບ); ຕາງໜ້າກ່າວຮັບໂດຍສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ, ຕາງໜ້າກ່າວມອບໂດຍສະຫາຍ ນາງ ຫຼິນ ຢວນ (Lin yuan) ຕາງໜ້າມູນນິທິຈີນເພື່ອພັດທະນາຊົນນະບົດ ເຊິ່ງມີຕາງໜ້າຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທົ່ວປະເທດ, ຄະນະບໍລິຫານງານຄະນະສັນຕິພາບ ແລະ ສາມັກຄີຂອງລາວ, ພະນັກງານຈາກຄະນະພົວພັນຕ່າງປະເທດສູນກາງພັກ, ກະຊວງສຶກສາທິການ ແລະ ກິລາ, ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຄູອາຈານ ແລະ ນັກຮຽນມາຈາກບັນດາໂຮງຮຽນປະຖົມສົມບູນ ແລະ ໂຮງຮຽນມັນທະຍົມສົມບູນ ຂອງນະຄອນຫຼວງວຽງຈັນ ເຂົ້າຮ່ວມເປັນສັກຂີພະຍານ 150 ກວ່າຄົນ.

ສະຫາຍ ສົມມາດ ພົລເສນາ ໄດ້ສະແດງຄວາມຂອບໃຈຢ່າງຍິ່ງໄປຍັງພັກ, ລັດ ແລະ ປະຊາຊົນຈີນ ໂດຍສະເພາະແມ່ນມູນນິທິຈີນເພື່ອພັດທະນາຊົນນະບົດ ພ້ອມດ້ວຍບັນດາບໍລິສັດ ແລະ ພາກສ່ວນຕ່າງໆທີ່ກ່ຽວຂ້ອງຂອງ ສປຈີນ ທີ່ໃຫ້ການສະໜັບສະໜູນໃນຄັ້ງນີ້ ທັງໃຫ້ຄຳໝັ້ນສັນຍາວ່າຈະນຳເອົາລົດຖີບຈຳນວນດັ່ງກ່າວ ມອບຜ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ ໄປແຈກຢາຍໃຫ້ທົ່ວເຖິງນ້ອງນັກຮຽນທີ່ດ້ອຍໂອກາດຢູ່ເຂດຊົນນະບົດ ແລະ ຫ່າງໄກສອກຫຼີກ ໃນນະຄອນຫຼວງວຽງຈັນ ແລະ 17 ແຂວງທົ່ວປະເທດ ເພື່ອໃຫ້ກຳລັງໃຈ ແລະ ເປັນພາຫະນະອຳນວຍຄວາມສະດວກໃນການໄປໂຮງຮຽນຂອງນ້ອງໆນັກຮຽນ; ສະຫາຍຍັງກ່າວຕື່ມວ່າ: ໃນອະນາຄົດ ຈະສືບຕໍ່ລົງເລິກການຮ່ວມມື ແລະ ແລກປ່ຽນຖອດຖອນບົດຮຽນນຳ ສປຈີນ ໂດຍສະເພາະແມ່ນການພັດທະນາການສຶກສາຢູ່ເຂດຊົນນະບົດ ແລະ ການແກ້ໄຂຄວາມທຸກຍາກ.

ຕາງໜ້າກອງທຶນຈີນເພື່ອພັດທະນາຊົນນະບົດ ໄດ້ສະແດງເຈດຈຳນົງທີ່ຈະສືບຕໍ່ຊ່ວຍເຫຼືອອຸປະກອນການສຶກສາໃຫ້ແກ່ນັກຮຽນລາວໃນຕໍ່ໜ້າ ໂດຍສະເພາະແມ່ນລົດຖີບ, ຖົງປຶ້ມ, ບໍ່ນໍ້າສະອາດ ແລະ ຈະສົ່ງອາສາສະໝັກດ້ານກະສິກໍາ ເພື່ອມາຊ່ວຍເຫຼືອປະຊາຊົນລາວ.

(ນາງ ອາລິນ ສຸພິມມະປະດິດ)