(ສພຊ) ໃນວັນທີ 10 ທັນວາ 2023 ທີ່ນະຄອນຫຼວງບາງກອກ, ຣາຊະອານາຈັກໄທ, ທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ ແຫ່ງ ສປປລາວ ໄດ້ຮັບໃບປະກາດດຸດສະດີບັນດິດປະລິນຍາເອກກິດຕິມະສັກ ສາຂາ ການພັດທະນາສັງຄົມ ຂອງມະຫາວິທະຍາໄລຈຸລາລົງກອນ ຣາຊະວິທະຍາໄລ. ໃນພິທີມອບ-ຮັບດັ່ງກ່າວ, ສົມເດັດພະອາລິຍາວົງຄະຕະຍານ ສົມເດັດພະສັງຄະລາດສະກອນ ມະຫາສັງຄະປະຣິຍາຍົກ ແຫ່ງຣາຊະອານາຈັກໄທ ໄດ້ໃຫ້ກຽດ ມອບໃບປະກາດປະລິນຍາເອກກິດຕິມະສັກ ໃຫ້ທ່ານ ດຣ. ນາງ ວິພາວັນ ພົມວິຫານ ພາຍຫຼັງທີ່ໄດ້ຮັບໃບປະກາດດັ່ງກ່າວ ທ່ານ ດຸດສະດີບັນດິດໃໝ່ ໄດ້ສະແດງຄວາມຮູ້ສຶກປິຕິຍິນດີເປັນຢ່າງຍິ່ງ ທີ່ມະຫາວິທະຍາໄລ ໄດ້ຄົ້ນຄວ້າພິຈາລະນາ, ຄັດເລືອກພົນລະເມືອງລາວ ຜູ້ໜຶ່ງ ທີ່ໄດ້ສ້າງຜົນງານອັນພົ້ນເດັ່ນ ໃນການປະກອບສ່ວນຊ່ວຍເຫຼືອ, ພັດທະນາສັງຄົມ ແລະ ປະຊາຊົນລາວບັນດາເຜົ່າຜູ້ທີ່ດ້ອຍໂອກາດ ແລະທຸກຍາກ.

ໃນພິທີຮັບໃບປະລິນຍາກິດຕິມະສັກໃນຄັ້ງນີ້, ຍັງມີ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ທ່ານ ທັດນະຄອນ ທຳມະວົງ ປະທານບໍລິສັດ ລາວເວີນມະຫາຊົນ ທີ່ມາຈາກ ສປປລາວ ຮ່ວມກັນຮັບໃບປະລິນຍາດັ່ງກ່າວອີກດ້ວຍ.