ໃນຕອນບ່າຍຂອງວັນທີ 31 ມີນາ 2022 ຜ່ານມານີ້, ສະພາປະຊາຊົນແຂວງວຽງຈັນ ໄດ້ຈັດພິທີມອບລົດ-ຮັບສົ່ງຄົນເຈັບ, ໂທລະໂຄ່ງ ແລະ ອຸປະກອນປ້ອງກັນພະຍາດໂຄວິດ-19 ໃຫ້ໂຮງໝໍນ້ອຍຜາສັງ ບ້ານຜາຫຼວງ ເມືອງເຟືອງ, ບ້ານຂອນແກ່ນ, ເມືອງຫິນເຫີບ, ວິທະຍາໄລເຕັກນິກແຂວງວຽງຈັນ ແລະ 3 ໂຮງຮຽນຄື: ມສປາກແຈ້ງ, ປະຖົມເມືອງເກົ່າ ແລະ ປະຖົມໂນນສະຫວ່າງ

ໃຫ້ກຽດມອບໃນຄັ້ງນີ້ໂດຍ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ແລະ ຮັບໂດຍ ຕາງໜ້າຈາກໂຮງໝໍ ແລະ ໂຮງຮຽນດັ່ງກ່າວ, ເຂົ້າຮ່ວມເປັນສັກຂີພະຍານ  ມີບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ດຣ ແບ ດົງຮວນ ຊ່ຽວຊານ ສ.ເກົາຫຼີ ປະຈໍາພະແນກສາທາລະນະສຸກແຂວງວຽງຈັນ ພ້ອມດ້ວຍແຂກຖືກເຊີນ.

ດຣ ອິນປອນ ມະນີແສງ ກໍາມະການພັກແຂວງ, ຫົວໜ້າພະແນກສາທາລະນາສຸກ ທັງເປັນສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທ 10 ແຂວງວຽງຈັນ ໄດ້ກ່າວວ່າ: ອຸປະກອນທີ່ນໍາມາມອບໃນຄັ້ງນີ້ ແມ່ນສະພາປະຊາຊົນແຂວງ ໄດ້ລະດົມທຶນຈາກ ສ.ເກົາຫຼີ ໂດຍໄດ້ສົມທົບກັບ ທ່ານ ດຣ ແບ ດົງຮວນ ຊ່ຽວຊານ ສ. ເກົາຫຼີ ປະຈໍາຢູ່ພະແນກສາທາລະນະສຸກແຂວງວຽງຈັນ.

ເຊິ່ງການຊ່ວຍເຫຼືອໃນຄັ້ງນີ້ປະກອບມີ: ລົດຮັບ-ສົງ ຄົນເຈັບ ຈໍານວນ 1 ຄັນ ລວມມູນຄ່າ 20,000 ໂດລ່າສະຫະລັດ, ໂທລະໂຄ່ງ 2 ຊຸດ ລວມມູນຄ່າ 13 ລ້ານກວ່າກີບ ແລະ ເຈວລ້າງມື 20 ແກັດ ລວມມູນຄ່າ 21 ລ້ານກີບ

ສໍາລັດລົດຮັບ-ສົ່ງຄົນເຈັບ ແມ່ນມອບໃຫ້ໂຮງໝໍນ້ອຍຜາສັງ, ຊຸດໂທລະໂຄ່ງ ມອບໃຫ້ ບ້ານຜາຫຼວງ ເມືອງເຟືອງ ແລະ ອີກ 1 ຊຸດ ແມ່ນມອບໃຫ້ ບ້ານຂອນແກ່ນ ເມືອງຫິນເຫີບ , ເຈວລ້າງມືໄດ້ມອບໃຫ້ໂຮງຮຽນວິທະຍາໄລເຕັກນິກແຂວງວຽງຈັນ ຈໍານວນ 15 ແກັດ, ມສ ປາກແຈ້ງ 15 ແກັດ, ໂຮງຮຽນປະຖົມເມືອງເກົ່າ 10ແກັດ ແລະ ໂຮງຮຽນ ປະຖົມໂນນສະຫວ່າງ 10 ແກັດ

ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈ ຕໍ່ລັດຖະບານ ສ. ເກົາຫຼີ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້, ພ້ອມນັ້ນສະແດງຄວາມຂອບໃຈມາຍັງ ດຣ ແບ ດົງຮວນ ຊ່ຽວຊານ ສ. ເກົາຫຼີ ປະຈໍາຢູ່ພະແນກສາທາລະນະສຸກແຊວງວຽງຈັນ ທີ່ໄດ້ປະສານງານກັບລັດຖະບານ ສ. ເກົາຫຼີ ເຮັດໃຫ້ການຊ່ວຍເລື້ອໃນຄັ້ງນີ້ ໄດ້ຮັບຜົນສໍາເລັດ

ເພັດສະໝອນ ສຸວັນນະສານ