ຕອນເຊົ້າຂອງວັນທີ 15 ສິງຫາ 2022 ນີ້ ຢູ່ທີ່ຫ້ອງປະຊຸມຂອງສະພາປະຊາຊົນແຂວງຫລວງນໍ້າທາ ໄດ້ຈັດພິທີປາຖະກະຖາວັນປະກາດໃຊ້ລັດຖະທຳມະນູນແຫ່ງ ສ ປປ ລາວ ຄົບຮອບ 31 ປີ ( 15 ສິງຫາ 1991 – 15 ສິງຫາ 2022 ), ວັນສ້າງຕັ້ງສານປະຊາຊົນແຫ່ງ ສ ປປ ລາວ ຄົບຮອບ 40 ປີ ( 15 ສິງຫາ 1982 – 15 ສິງຫາ 2022 ) ໂດຍການໃຫ້ກຽດປາຖະກະຖາຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນໍ້າທາ, ເຂົ້າຮ່ວມຮັບຟັງໃນພິທີຄັ້ງນີ້ມີ ບັນດາທ່ານ ສສຊ, ສສຂ, ຄະນະນຳຂົງເຂດນິຕິບັນຍັດ ແລະ ຕຸລາການ, ຜູ້ຕາງໜ້າຈາກຫ້ອງວ່າການແຂວງ, ຫົວໜ້າ, ຮອງຫົວໜ້າຂະແໜງ ຕະຫລອດຮອດພະນັກງານ – ລັດຖະກອນຈາກ 04 ຂົງເຂດເຂົ້າຮ່ວມທັງໝົດ 44 ທ່ານ, ຍິງ 17 ທ່ານ.
ໃນພິທີໄດ້ຮັບຟັງປະຫວັດຄວາມເປັນມາ ,ຄວາມໝາຍ ຄວາມສຳຄັນ ແລະ ຜົນການຈັດຕັ້ງປະຕິບັດລັດຖະທຳມະນູນແຫ່ງ ສ ປປ ລາວ ໃນໄລຍະ 31 ປີຜ່ານມາ ທັງນີ້ກໍເພື່ອເປັນການເພີ່ມທະວີການໂຄສະນາເຜີຍແຜ່, ສຶກສາອົມຮົມສະມາຊິກພັກ, ພະນັກງານ-ລັດຖະກອນ ໃນ 4 ຂົງເຂດ ໃຫ້ຮັບຮູ້, ເຂົ້າໃຈຢ່າງເລິກເຊີ່ງ ແລະ ທົ່ວເຖິງກ່ຽວກັບຄວາມໝາຍຄວາມສຳຄັນ ຂອງລັດຖະທຳມະນູນແຫ່ງ ສປປ ລາວ ແລະ ການຄຸ້ມຄອງລັດ ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ. ເຊີ່ງລັດຖະທຳມະນູນແຫ່ງ ສ ປປ ລາວ ແມ່ນກົດໝາຍພື້ນຖານຂອງຊາດ ຊຶ່ງເປັນການຫັນເອົາ ແນວທາງນະໂຍບາຍປ່ຽນແປງໃໝ່ ຢາ່ງຮອບດ້ານ ແລະ ມີຫຼ້ກການຂອງພັກປະຊາຊົນ ປະຕິວັດລາວ ມາເປັນກົດໝາຍພື້ນຖານ ຂອງລະບອບປະຊາທິປະໄຕ ປະຊາຊົນລາວ; ລັດຖະທຳມະນູນແຫ່ງ ສປປ ລາວ ໄດ້ຖືກຮັບຮອງເອົາໃນກອງປະຊຸມເທື່ອທີ່ VI ຂອງສະພາປະຊາຊົນສູງສຸດ ຊຸດທີ່ II ໃນປີ 1991 ແລະ ໄດ້ປະກາດໃຊ້ຢ່າງເປັນທາງການໃນວັນທີ່ 15 ສິງຫາ 1991; ລັດຖະທຳມະນູນແຫ່ງ ສປປ ລາວ ໄດ້ມີການປັບປຸງມາແລ້ວ 2 ຄັ້ງຄື: ຄັ້ງທີ່ 1: ປີ 2003 ກອງປະຊຸມສະໄໝສາມັນເທື່ອທີ່ 3 ຂອງສະພາແຫ່ງຊາດ ຊຸດທີ່ V ໄດ້ຮັບຮອງເອົາການປັບປຸງລັດຖະທຳມະນູນ ຊຶ່ງປະກອບມີ 11 ໝວດ 98 ມາດຕາ. ຄັ້ງທີ່ 2: ປີ 2015 ກອງປະຊຸມສະໄໝສາມັນເທື່ອທີ່ 10 ຂອງສະພາແຫ່ງຊາດ ຊຸດທີ່ VII ໄດ້ຮັບຮອງເອົາການປັບປຸງ ລັດຖະທຳມະນູນ ສະບັບດັ່ງກ່າວ ປະກອບມີ 14 ໝວດ, 119 ມາດຕາ ຊື່ງໄດ້ເຮັດໃຫ້ ລັດຖະທຳມະນູນ ມີເນື້ອໃນຄົບຖ້ວນ ແລະ ສົມບູນກວ່າເກົ່າ. ລັດຖະທຳມະນູນແຫ່ງ ສປປ ລາວ ມີຄວາມສຳຄັນເປັນຢ່າງຍິ່ງ ຕໍ່ຊີວິດການເມືອງຂອງປວງຊົນລາວທັງຊາດ, ເພາະໃນດ້ານທາດແທ້ກໍ່ແມ່ນການສ້າງສະຕິຊາດ ຄວາມເປັນເອກະພາບ ເປັນອັນໜຶ່ງອັນດຽວກັນ ພາຍໃຕ້ການນຳພາຂອງພັກ, ຮັບຮູ້ ແລະ ເດັດດ່ຽວການປົກປ້ອງການດຳລົງຄົງຕົວ ທີ່ບໍ່ຕັດແຍກອອກຈາກກັນໄດ້ຂອງປະຊາຊົນ ບັນດາເຜົ່າ, ເປັນພາຫະນະທີ່ສຳຄັນ ເພື່ອສຶກສາອົບຮົມປະຊາຊົນ ໃນການຍົກສູງນ້ຳໃຈຮັກຊາດ, ຮັກລະບອບປະຊາທິປະໄຕ ປະຊາຊົນລາວ, ເພີ່ມຄວາມສາມັກຄີປອງດອງ ທົ່ວປວງຊົນທັງຊາດ, ເຊີດຊູບົດບາດ ແລະ ຄວາມສາມາດເປັນເຈົ້າປະເທດຊາດ ຂອງປະຊາຊົນບັນດາເຜົ່າ ແລະ ໄດ້ກຳນົດແຈ້ງ ລະບອບການເມືອງ, ລະບອບເສດຖະກິດ-ສັງຄົມ, ກົງຈັກການຈັດຕັ້ງລັດ ປະຊາທິປະໄຕ ປະຊາຊົນ, ການປ້ອງກັນຊາດ-ປ້ອງກັນຄວາມສະຫງົບ, ສິດ ແລະ ພັນທະຂອງພົນລະເມືອງ, ພາສາ, ຕົວອັກສອນ, ເຄື່ອງໝາຍຊາດ, ເພງຊາດ, ວັນຊາດ, ສະກຸນເງິນ ແລະ ນະຄອນຫຼວງ; ລັດນຳໃຊ້ລັດຖະທຳມະນູນ ແລະ ກົດໝາຍ ເພື່ອຄຸ້ມຄອງຂົງເຂດຕ່າງໆ ຂອງຊີວິດສັງຄົມ, ແນໃສ່ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອບ ແລະ ສ້າງສິ່ງອຳນວຍຊຸກຍູ້ໃຫ້ເສດຖະກິດຂະຫຍາຍຕົວ ໄປຕາມເສັ້ນທາງສັງຄົມນິຍົມ ທີ່ພັກເຮົາໄດ້ກຳນົດໄວ້.
ແລະຍັງໄດ້ຮັບຟັງມູນເຊື້ອ 40 ປີຂອງສານປະຊາຊົນ ແຫ່ງ ສປປ ລາວ, ເຊິ່ງພາຍຫລັງສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນ, ພັກ ແລະ ລັດໄດ້ນຳພາປະຊາຊົນລາວທັງຊາດ ປະຕິບັດສອງໜ້າທີ່ຍຸດທະສາດ ຕິດພັນກັບການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍເທື່ອລະກ້າວ ໃນເບື້ອງຕົ້ນແມ່ນກະຊວງຍຸຕິທຳເຮັດໜ້າທີ່ຕົ້ນຕໍໃນການຈັດຕັ້ງປະຕິບັດກົດໝາຍເພື່ອປົກປັກຮັກສາຜົນປະໂຫຍດອັນຊອບທຳຂອງລັດ, ຂອງປະຊາຊົນ, ຮັບປະກັນຄວາມເປັນລະບຽບຮຽບຮ້ອຍ ແລະ ຄວາມຍຸຕິທຳໃນສັງຄົມ ໂດຍຖືເອົາຄຳສັ່ງເລກທີ 53/ນຍ ລົງວັນທີ 15 ຕຸລາ 1976 ຂອງສຳນັກງານນາຍົກລັດຖະມົນຕີກ່ຽວກັບການຈັບຕົວ, ການສືບສວນ-ສອບສວນ ແລະ ການຕັດສິນຜູ້ກະທຳຜິດເປັນບ່ອນອີງ, ໃນວັນທີ 4 ສິງຫາ 1976 ກອງປະຊຸມກົມການເມືອງສູນກາງພັກໄດ້ພິຈາລະນາແຕ່ງຕັ້ງຄະນະຄົ້ນຄວ້າວິຊາສະເພາະຂອງກະຊວງຍຸຕິທຳຂຶ້ນ ເພື່ອນຄົ້ນຄວ້າແຜນນະໂຍບາຍຢ່າງຮອບດ້ານຂອງກະຊວງຍຸຕິທຳ ຈາກການເຄື່ອນໄຫວວຽກງານດັ່ງກ່າວຈື່ງພາໃຫ້ມີການກຳເນີດສານປະຊາຊົນ ແລະ ເຕີບໃຫຍ່ຂະຫຍາຍຕົວຕາມແຕ່ລະໄລຍະຄື ໄລຍະແຫ່ງການກຳເນີດສານປະຊາຊົນ (1975-1982), ໄລຍະແຫ່ງການສ້າງຕັ້ງສານປະຊາຊົນ (1982-1989), ໄລຍະແຫ່ງການກໍ່ສ້າງ ແລະ ພັດທະນາລະບົບສານປະຊາຊົນ (1989-2003), ໄລຍະແຫ່ງການປັບປະປຸງ ແລະ ພັດທະນາລະບົບສານປະຊາຊົນ (2003-2009) ,ໄລຍະແຫ່ງການພັດທະນາລະບົບສານປະຊາຊົນ(2009 ເຖິງ ປະຈຸບັນ
ໃນຕອນທ້າຍພິທີຍັງມີການມອບໃບຍ້ອງຍໍຂອງທ່ານເຈົ້າແຂວງຫລວງນ້ຳທາ ໃຫ້ບຸກຄົນດີເດັ່ນ ປະຈຳປີ 2021 ແລະ ບຸກຄົນທີ່ມີຜົນງານດີເດັ່ນໃນການປະກອບສ່ວນເຫື່ອແຮງ, ສະຕິປັນຍາ ເພື່ອພັດທະນາແຂວງຫລວງນໍ້າທາ ເຊິ່ງສະພາປະຊາຊົນແຂວງມີທັງໝົດ 46 ທ່ານ, ຍິງ 18 ທ່ານ ແລະ ມອບໃບຢ້ອງຍໍຈາກປະທານສານປະຊາຊົນສູງສຸດ,ໃບຍ້ອງຍໍທ່ານເຈົ້າແຂວງ ໃຫ້ແກ່ສານປະຊາຊົນແຂວງຈຳນວນ 26 ທ່ານ, ຍິງ 11 ທ່ານ.
ພ້ອມດຽວກັນນັ້ນ ບໍລິສັດໄຊພະຈັນ ກໍ່ສ້າງ ຍັງໄດ້ມອບເຄື່ອງສຽງຈຳນວນ 05 ເຄື່ອງ ລວມມູນຄ່າ 10,000,000 ກີບ ໃຫ້ແກ່ສະພາປະຊາຊົນແຂວງ ເພື່ອໜູນໃຊ້ເຂົ້າໃນວຽກງານສະພາປະຊາຊົນແຂວງ ໂດຍໃຫ້ກຽດຮັບຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນໍ້າທາ ແລະ ໃຫ້ກຽດມອບຂອງທ່ານ ຄຳຜາຍ ໄຊພະຈັນ ສະມາຊິກສະພາປະຊາຊົນແຂວງ ຫົວໜ້າບໍລິສັດ ໄຊພະຈັນກໍ່ສ້າງ ແລະ ຍັງໄດ້ມອບຂັນລາງວັນ, ເງິນລາງວັນ ໃນການສ້າງຂະບວນການກິລາບານເຕະຊາຍ ເນື່ອງໃນ 2 ວັນສຳຄັນປະຫວັດສາດ ລວມທັງໝົດ 04 ທິມ, ລາງວັນທີ1 ໄດ້ແກ່ສານປະຊາຊົນແຂວງ, ທີ່2 ໄກ້ແກ່ ສະພາປະຊາຊົນແຂວງ ແລະ ທີ່ 3 ຮ່ວມໄດ້ແກ່ອົງການໄອຍະການແຂວງ ແລະ ພະແນກຍຸຕິທຳແຂວງ.
