ເພື່ອເປັນການປະກອບບຸກຄາລາກອນເຂົ້າໃນກົງຈັກການຈັດຕັ້ງຂອງສະພາປະຊາຊົນແຂວງ ສະນັ້ນມາໃນວັນທີ 21 ກໍລະກົດ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດພິທີປະກາດແຕ່ງຕົ້ງຮອງເລຂາທິການ ສະພາປະຊາຊົນແຂວງຊຽງຂວາງ ຂຶ້ນໂດຍການ ເປັນປະທານ ຂອງທ່ານ ວຽງໄຊ ສີວິໄລ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ຕ່າງໜ້າຈາກບັນດາພະແນກການອ້ອມຂ້າງ, ຫົວໜ້າ-ຮອງຫົວໜ້າຂະ   ແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ.

ໃນພິທີໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານຢູ່ພາຍໃນສະພາປະຊາຊົນແຂວງ ຂອງຄະນະປະຈໍາສະພາປະຊາຊົນແຂວງ ສະບັບເລກທີ 85, ລົງວັນທີ 14 ກໍລະກົດ 2022 ເຊິ່ງເຫັນດີແຕ່ງຕັ້ງທ່ານ ຄໍາຫຼ້າ ແສງຄໍາຢອງ ຫົວໜ້າຂະແໜງວຽກງານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ9 ຂຶ້ນເປັນຮອງເລຂາທິການສະພາປະຊາຊົນແຂວງ, ໃນພິທີຍັງໄດ້ມອບ-ຮັບຂໍ້ຕົກລົງວ່າດ້ວຍການແຕ່ງຕັ້ງພະນັກງານຢູ່ພາຍໃນສະພາປະຊາຊົນແຂວງ ຂອງຄະນະປະຈໍາສະພາປະຊາຊົນແຂວງ.

ທ່ານ ວຽງໄຊສີ ວິໄລ ໂອ້ລົມຕໍ່ພິທີ ແລະ ມີຄໍາເຫັນຊີ້ນໍາຕໍ່ ພະນັກງານສະພາ​ປະຊາຊົນ​ແຂວງ ໂດຍສະເພາະແມ່ນຮອງເລຂາທິການສະພາປະຊາຊົນແຂວງຜູ້ໃໝ່ ​ຈົ່ງເອົາໃຈໃສ່ຝຶກຝົນຫຼໍ່ຫຼອມຕົນ, ຊອກຮູ້ຮໍ່າຮຽນ ດ້ວຍຫຼາກຫຼາຍວິທີ ເພື່ອໃຫ້ມີຄວາມຮູ້ຄວາມສາມາດມາພັດທະນາສະພາປະຊາຊົນແຂວງ, ຈົ່ງ​ຮັກ​ສາ​ຄວາມ​ສາມັກຄີ​ພາຍ​ໃນ ​ແລະ ພາຍ​ນອກ​ໃຫ້​ ແໜ້ນ​ແຟ້ນ ​ແລະ ​ເອົາ​ໃສ່​ປະຕິບັດໜ້າທີ່​ວຽກງານ​ຂອງ​ສະພາ​ປະຊາຊົນ​ແຂວງຕາມແຜນວຽກທີ່ວາງອອກ​ໃຫ້​ດີ​ຂື້ນ​ເລື່ອຍໆ.

ໃນພິທີ ທ່ານ ຄໍາຫຼ້າ ​ແສງ​ຄໍາ​ຢອງ ຮອງ​ເລຂາທິການ​ສະພາ​ປະຊາຊົນ​ແຂວງ ຜູ້​ໃໝ່ຂຶ້ນ​ກ່າວ​ຮັບໜ້າທີ່ ​ແລະ ​ໃຫ້​ຄໍາໝັ້ນສັນຍາ​ວ່າ​ຈະ​ເອົາ​ໃຈ​ໃສ່​ຄົ້ນຄວ້າ​ຮໍ່າ​ຮຽນ ​ແລະ ນໍາ​ເອົາ​ແບບ​ແຜນ​ວິທີ​ເຮັດ​ວຽກທີ່​ດີ​ມາ​ພັດທະນາ​ຕົນ​ເອງ, ​ເພີາມທະວີ​ເຕົ້າ​​ໂຮມ​ຄວາມ​ສາມັກຄີ​ພາຍ​ໃນ ​ແລະ ພາຍ​ນອກ​ໃຫ້​ແໜ້ນ​​ແຟ້ນ ​ແລະ ​ເອົາ​ໃຈ​ໃສ່​ປະຕິບັດໜ້າທີ່​ວຽກງານ​ທີ່​ການຈັດ​ຕັ້ງ​ມອບໝາຍ​ໃຫ້​ສໍາ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.

ສະພາ​ປະຊາຊົນ​ແຂວງ​ຊຽງຂວາງ

ຂ່າວ​​ໂດຍ: ນາງ ສຸກ​ສະຫວັນ ອິນທະ​​ແສງ