ຕອນບ່າຍ ຂອງວັນທີ 19 ກັນຍາ 2022 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີປະກາດການການຈັດຕັ້ງດໍາລົງຕໍາແໜງບໍລິຫານ ແລະ ມອບໃບຍ້ອງຍໍຜູ້ທີ່ມີຜົນງານດີນເດັ່ນໃນການແຂ່ງຂັນຮັກຊາດ ແລະ ພັດທະນາ ປະຈໍາປີ 2021 ຂອງສະພາປະຊາຊົນແຂວງຜົ້ງສາລີ ໂດຍການເປັນປະທານຂອງ ທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ ມີ ບັນດາທ່ານ ຄະນະປະຈໍາສະພາປະຊາຊົນແຂວງ, ຮອງປະທານຄະນະກໍາມະການສະພາປະຊາຊົນແຂວງ, ຮອງເລຂາທິການສະພາປະຊາຊົນແຂວງ ພ້ອມດ້ວຍພະນັກງານ-ລັດຖະກອນພາຍໃນ ສພຂ ເຂົ້າຮ່ວມ.
ພິທີຄັ້ງນີ້ໄດ້ຈັດເປັນ 2 ວາລະ ໂດຍວາລະທໍາອິດແມ່ນພິທິປະກາດການຈັດຕັ້ງດໍາລົງຕໍາແໜ່ງບໍລິຫານ ເຊິ່ງໃນພິທີໄດ້ຮັບຟັງ ທ່ານ ນາງ ພິມພາ ມະຫາວົງທັດ ຫົວໜ້າຂະແໜ່ງຈັດຕັ້ງ-ກວດກາ ຂຶ້ນຜ່ານ ຂໍ້ຕົກລົງວ່າດ້ວຍການແຕ່ງຕັ້ງ ຮອງເລຂາທິການສະພາປະຊາຊົນແຂວງ ສະບັບເລກທີ 645/ຄປຈຂ, ລົງວັນທີ 8 ກັນຍາ 2022; “ເຫັນດີແຕ່ງຕັ້ງທ່ານ ທອງຄໍາ ວິໄລຈິດ ຫົວໜ້າຂະແໜງ ຄົ້ນຄວ້າ-ສັງລວມ ແລະ ຂໍ້ມູນຂ່າວສານ ເປັນຮອງເລຂາທິການສະພາປະຊາຊົນແຂວງ ທັງເປັນເລຂານຸການປະທານຄະນະປະຈໍາສະພາປະຊາຊົນແຂວງ”; ຜ່ານ ຂໍ້ຕົກລົງວ່າດ້ວຍການແຕ່ງຕັ້ງ ຫົວໜ້າ, ຮອງຫົວໜ້າຂະແໜງພາຍໃນສະພາປະຊາຊົນແຂວງຜົ້ງສາລີ ສະບັບເລກທີ 646/ຄປຈຂ, ລົງວັນທີ 8 ກັນຍາ 2022; “ເຫັນດີແຕ່ງຕັ້ງຫົວໜ້າຂະແໜງ, ຮອງຫົວໜ້າຂະແໜງ ພາຍໃນສະພາປະຊາຊົນແຂວງ ຜົ້ງສາລີ ດັ່ງນີ້: u ທ່ານ ສຸຫວັນ ແສງຈັນສຸກ ຮອງຫົວໜ້າຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ ເປັນຫົວໜ້າຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ; v ທ່ານ ສຸວັນທາ ວັນນະວົງ ວ່າການແທນຫົວໜ້າຂະແໜງບໍລິຫານ-ການເງິນ ເປັນຮອງຫົວໜ້າຂະແໜງວັດທະນະທໍາ-ສັງຄົມ, ຄະນະກໍາມະການວັດທະນະທໍາ-ສັງຄົມ ແລະ ບັນເຜົ່າ; w ທ່ານ ຈອມແສງ ສິວົງສາ ວິຊາການຂະແໜງຈັດຕັ້ງ-ກວດກາ ເປັນຮອງຫົວໜ້າຂະແໜງຂະແໜງຈັດຕັ້ງ-ກວດກາ; x ທ່ານ ສົມໃຈ ສຸກສະຫວັນ ວິຊາການຂະແໜງບໍລິຫານ-ການເງິນ ເປັນຮອງຫົວໜ້າຂະແໜງບໍລິຫານ-ການເງິນ; y ທ່ານ ນາງ ສຸກສົມພອນ ແກ້ວແສງພະຈັນ ວິຊາການຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ ເປັນຮອງຫົວໜ້າຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ.”; ຮັບຟັງທ່ານ ທອງຄໍາ ວິໄລຈິດ ຂຶ້ນຜ່ານບົດບັນທຶກມອບ-ຮັບໜ້າທີ່ ລະຫວ່າງຫົວໜ້າຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ (ຜູ້ເກົ່າ ແລະ ຜູ້ໃໝ່); ຈາກນັ້ນ, ໄດ້ຈັດພິທີເຊັນບົດບັນທຶກມອບ-ຮັບໜ້າທີ່ ລະຫວ່າງຫົວໜ້າຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ (ຜູ້ເກົ່າ ແລະ ຜູ້ໃໝ່).
ວາລະທີ 2 ແມ່ນພິທີມອບໃບຍ້ອງຍໍຜູ້ທີ່ມີຜົນງານດີນເດັ່ນໃນການແຂ່ງຂັນຮັກຊາດ ແລະ ພັດທະນາ ປະຈໍາປີ 2021 ໃນພິທີໄດ້ຮັບຟັງ ທ່ານ ຄໍາມາ ສຸລິວົງ ຮອງເລຂາທິການສະພາປະຊາຊົນແຂວງ ຂຶ້ນຜ່ານຂໍ້ຕົກລົງ ຂອງເຈົ້າແຂວງ ວ່າດ້ວຍການຍ້ອງຍໍສັນລະເສີນໃຫ້ແກ່ກົມກອງ, ບຸນຄົນ ແລະ ບ້ານທີ່ມີຜົນງານດີເດັ່ນໃນການແຂ່ງຂັນຮັກຊາດ ແລະ ພັດທະນາ ປະຈໍາປີ 2021 ສະບັບເລກທີ 629/ຂຜລ, ວັນທີ 22 ກໍລະກົດ 2022; ເຊິ່ງໃນສະພາປະຊາຊົນແຂວງປະກອບມີ 35 ທ່ານ, ຍິງ 14 ທ່ານ; ຈາກນັ້ນ ໄດ້ຈັດພິທີມອບໃບຍ້ອງຍໍຢ່າງສົມກຽດ ໂດຍແບ່ງເປັນ 2 ຊຸດ, ຊຸດທໍາອິດປະກອບມີບັນດາທ່ານ ຄະນະປະຈໍາສະພາປະຊາຊົນແຂວງ ມອບໂດຍທ່ານ ສົມຈິດ ຫັບລະກອນ ຮອງປະທານຄະນະປະຈໍາສະພາປະຊາົຊນແຂວງ; ຊຸດທີ 2 ປະກອບມີຮອງປະທານຄະນະປະຈໍາສະພາປະຊາຊົນແຂວງ, ຮອງປະທານຄະນະກໍາມະການສະພາປະຊາຊົນແຂວງ, ຮອງເລຂາທິການສະພາປະຊາຊົນແຂວງ ແລະ ພະນັກງານ-ລັດຖະກອນ ມອບໂດຍທ່ານ ທອງສີ ເສົາສຸລິພົມ.
ໂອກາດດຽວກັນນີ້ ທ່ານ ທອງສີ ເສົາສຸລິພົມ ໄດ້ໂອລົມຕໍ່ພິທີ ດັ່ງກ່າວເຊິ່ງກ່ອນທ່ານກໍໄດ້ສະແດງຄວາມຍິນດີ,ຊົມເຊີຍ ຕໍ່ການຫ້າງຫາກະກຽມພິທີໃນຄັ້ງນີ້ ແລະ ທ່ານຍັງໄດ້ເໜັ້ນບັນຫາເປັນຕົ້ນ: ພາຍໃນຄະນະໜ່ວຍພັກ, ບັນດາຄະນະກຳມະການ, ຄະນະເລຂາທິການຕ້ອງມີການຕໍານິສົ່ງຂ່າວນໍາກັນ ເພື່ອພ້ອມກັນກ້າວໜ້າ ເພື່ອເຮັດສໍາເລັດໜ້າທີ່ການເມືອງທີ່ໄດ້ຮັບການມອບໝາຍ; ບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະໜ່ວຍພັກ, ຄະນະກຳມະການ ແລະ ຄະນະເລຂາທິການ ຕ້ອງມີຄວາມຮັບຜິດຊອບສູງຕໍ່ກັບການຄຸ້ມຄອງບັນຊາ, ຊີ້ນໍາ ແລະ ຈັດຕັ້ງປະຕິບັດວຽກງານຂອງໜ່ວຍພັກ, ຂະແໜງການພາຍໃນສະພາປະຊາຊົນແຂວງ. ໂດຍສະເພາະ ແມ່ນບັນດາທ່ານທີ່ຊີ້ນໍາແຕ່ລະຂະແໜງຕ້ອງກໍາແໜ້ນບັນດາໜ້າວຽກ, ນໍາພາວາງແຜນນໍາພາປະຕິບັດ, ນໍາພາສະຫຼຸບຖອດຖອນບົດຮຽນລາຍງານຂັ້ນເທິງຢ່າງເປັນປົກກະຕິ; ບັນດາສະຫາຍ ໃນຄະນະໜ່ວຍພັກ, ຄະນະເລຂາທິການສະພາປະຊາຊົນແຂວງ, ບັນດາຂະແໜງ ຕ້ອງໄດ້ແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ ບົນພື້ນຖານນັ້ນແຕ່ລະທ່ານຕ້ອງໄດ້ລົງເລີກ ບັນດາວຽກງານຢ່າງລະອຽດ ແລະ ໃຫ້ຖືວ່າເປັນນັກບໍລິຫານອົງການທີ່ມີຄວາມຮູ້ ຄວາມສາມາດ ເພື່ອນໍາພາເຮັດສໍາເລັດໜ້າທີ່ຢ່າງມີປະສິດຕິພາບສູງສຸດ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ