ພິທີຖະແຫຼງຂ່າວຜົນສຳເລັດກອງປະຊຸມສະ​ໄໝ​ສາມັນ ​ເທື່ອ​ທີ 04 ໃນຄັ້ງນີ້ໂດຍ ທ່ານ ພູທອນ ພຸດທະຂັນຕິ ກໍາມະການຄະນະ​ປະຈຳ​ສະພາ​ປະຊາຊົນ​ແຂວງ, ເລຂາທິການ​ສະພາ​ປະຊາຊົນ​ແຂວງ ​ຕ່າງ​ໜ້າ​ໃຫ້​ສະພາປະຊາຊົ​ນ​ແຂວງ​ ​ກ່ຽວກັບຜົນສໍາເລັດກອງ​ປະຊຸມ​ສະໄໝ​ສາມັນ​ ເທື່ອ​ທີ 04 ຂອງ​ສະພາ​ປະຊາຊົນ​ແຂວງ ຊຸດ​ທີ II ມາຍັງບັນດາພະນັກງານ-ລັດຖະກອນ, ທະຫານ-ຕໍາ​ຫຼວດ, ນັກສຶກສາປັນຍາຊົນ ຕະຫຼອດຮອດພໍ່ແມ່ ພີ່ນ້ອງ​ປະຊາຊົນ​ລາວ​ບັນດາ​ເຜົ່າ ​ທັງ​ຢູ່ພາຍ​ໃນ​ ແລະ ​ຕ່າງ​ປະ​ເທດ​ເວົ້າ​ລວມ, ເວົ້າສະ​ເພາະ ​ປະຊາຊົນ​ຊາວ​ແຂວງ​ສະຫວັນ​ນະ​ເຂດ ຮັບ​ຊາບ ກ່ຽວກັບ ​ຜົນສໍາເລັດຂອງ​ກອງ​ປະຊຸມ​ສະໄໝ​ສາມັນ​ ເທື່ອ​ທີ 04 ຂອງ​ສະພາ​ປະຊາຊົນ​ແຂວງ ຊຸດ​ທີ II ດັ່ງນີ້:

ກອງປະຊຸມສະ​ໄໝ​ສາມັນ ​ເທື່ອ​ທີ 04 ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນຕອນເຊົ້າຂອງວັນອັງຄານ, ວັນທີ 24 ມັງກອນ 2023 ທີ່ຫໍວັດທະນະທໍາ ໄກສອນພົມວິຫານ ແລະ ໄດ້ດໍາເນີນມາເຖິງຕອນ​​ແລງ ຂອງວັນ​ສຸກ, ວັນທີ 27 ມັງກອນ 2023, ໃຊ້​ເວລາ 04 ວັນ ຈຶ່ງໄດ້ອັດລົງດ້ວຍຜົນສໍາເລັດຢ່າງຈົບງາມ. ເຂົ້າຮ່ວມກອງປະຊຸມຄັ້ງນີ້ ມີສະມາຊິກສະພາປະຊາຊົນແຂວງ ທັງໝົດ 51 ທ່ານ, ຍິງ 16 ທ່ານ, ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ທີ່ປະຈໍາຢູ່​ສູນ​ກາງ 08 ທ່ານ, ຍິງ 01 ທ່ານ, ເປັນກຽດເຂົ້າຮ່ວມກອງປະຊຸມໂດຍທ່ານເຈົ້າແຂວງໆສະຫວັນນະເຂດ, ການນໍາຂອງແຂວງ, ຕາງໜ້າຄະນະປະຈໍາສະພາປະຊາຊົນແຂວງ, ພ້ອມບັນດາທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13, ສະມາຊິກສະພາປະຊາຊົນແຂວງ, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ອາດີດສະມາຊິກສະພາປະຊາຊົນແຂວງ ຊຸດທີ I, ອົງການກວດສອບປະຈໍາພາກກາງ,ອົງການກວດກາລັດແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ອົງການແນວລາວສ້າງຊາດແຂວງ, ອົງການຈັດຕັ້ງມະຫາຊົນ, ເຈົ້ານະຄອນໄກສອນພົມວິຫານ, ບັນດາທ່ານເຈົ້າເມືອງ, ຫົວໜ້າພະແນກການຕ່າງໆ, ຫົວໜ່ວຍທຸລະກິດ ແລະ ບັນດາທ່ານແຂກຖືກເຊີນ ເຂົ້າ​ຮ່ວມທັງ​ໝົດ 236 ທ່ານ, ຍິງ 61 ທ່ານ.

​ກອງປະຊຸມສະ​ໄໝ​ສາມັນ ​ເທື່ອ​ທີ 04 ຂອງສະພາປະຊາຊົນແຂວງ ຊຸດທີ II ເທື່ອ​ນີ້ ບັນດາ​ສະມາຊິກ​ສະພາ​ແຫ່ງ​ຊາດ ແລະ ສະມາ​ຊິກ​ສະພາ​ປະຊາຊົນ​ແຂວງ ໄດ້​ສຸມ​ທຸກ​ສະຕິ​ປັນຍາ​ເຂົ້າ​ໃນ​ການ​ຄົ້ນຄວ້າ ​ແລະ ປະກອບ​ຄໍາ​ຄິດ​ຄຳ​ເຫັນ​ຢ່າງ​ເລິກ​ເຊິ່ງ ​ໃນ​ຖານະ​ເປັນ​ຕົນ​ແທນ​ແຫ່ງ​ສິດ ​ແລະ ຜົນ​ປະ​ໂຫຍ​ດຂອງ​ປະຊາຊົນບັນດາ​ເຜົ່າ ​ຊາວ​ແຂວງ​ສະ​ຫວັນນະ​ເຂດ. ເຊິ່ງໃນກອງປະຊຸມໄດ້ຮັບຟັງການລາຍງານຈາກພາກສ່ວນຕ່າງໆ ດັ່ງນີ້:

1. ຮັບຟັງການ​ລາຍ​ງານ ຈາກທ່ານ​ເຈົ້າ​ແຂວງໆ​ສະຫວັນ​ນະ​ເຂດ ກ່ຽວ​ກັບ ສະພາບການຈັດຕັ້ງປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດຂອງແຂວງ ປະຈຳປີ 2022 ແລະ ທິດທາງແຜນ​ການ ປະຈໍາປີ 2023;
2. ຮັບຟັງການລາຍ​ງານ ​ຈາກຫົວໜ້າພະແນກແຜນການ ແລະ ການລົງທຶນແຂວງ ກ່ຽວ​ກັບ ການ​ຈັດຕັ້ງ​ປະຕິບັດແຜ​ນພັດທະນາ​ເສດຖະກິດ-ສັງຄົມ ປະຈຳປີ 2022 ແລະ ທິດທາງແຜນ​ການ ປະຈໍາປີ 2023;
3. ຮັບຟັງການລາຍ​ງານ ຈາກຮັກສາການຫົວໜ້າພະແນກການເງິນແຂວງ ກ່ຽວ​ກັບ ການ​ຈັດຕັ້ງ​ປະຕິບັດ​ແຜນງົບປະມານແຫ່ງລັດ ປະຈຳປີ 2022, ທິດທາງແຜນ​ການ ປະຈໍາປີ 2023 ແລະ ການຄຸ້ມຄອງຊັບສິນລັດພາຍໃນແຂວງ.
4. ຮັບຟັງການລາຍງານ ຈາກປະທານອົງການກວດສອບ ປະຈໍາພາກກາງ ກ່ຽວກັບ ຜົນຂອງການກວດກາຄືນ ແລະ ການສະຫຼຸບງົບປະມານຂາດຕົວ ປະຈໍາປີ 2021, ບົດສະຫຼຸບການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
5. ຮັບຟັງການລາຍງານ ຈາກປະທານອົງການກວດກາລັດແຂວງ ກ່ຽວກັບ ການຕິດຕາມກວດກາ ແກ້ໄຂຜົນການກວດສອບ ປີ 2021, ບົດສະຫຼຸບການເຄື່ອນໄຫວວຽກງານກວດກາ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
6. ຮັບຟັງການສະເໜີ ຈາກຫົວໜ້າກອງບັນຊາການ ປກສ ແຂວງ ກ່ຽວກັບ ການສ້າງຮ່າງຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການສະກັດກັ້ນ ແລະ ຕ້ານອັກຄີໄພ ພາຍໃນແຂວງສະຫວັນນະເຂດ.
7. ຮັບຟັງການສະເໜີ ຈາກຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ກ່ຽວກັບ ການສ້າງ ຮ່າງຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງຂີ້ເຫຍື້ອໃນທົ່ວແຂວງສະຫວັນນະເຂດ;
8. ຮັບຟັງການລາຍງານ ຈາກຫົວໜ້າອົງການໄອຍະການປະຊາຊົນແຂວງ ແລະ ປະທານສານປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
9. ຮັບຟັງການລາຍງານ ຈາກຮອງປະທານສະພາປະຊາຊົນແຂວງ ຊຸດທີ II ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
10. ຮັບຟັງການສະເໜີ ຈາກຄະນະປະຈໍາສະພາປະຊາຊົນແຂວງ ກ່ຽວກັບ ການສະ ເໜີແຕ່ງຕັ້ງ ຫົວໜ້າອົງການໄອຍະການປະຊາຊົນແຂວງ.

ຜ່ານການຮັບຟັງການລາຍງານຂ້າງເທິງແລ້ວ ບັນດາທ່ານ ສະມາຊິກສະພາປະຊາຊົນແຂວງ ແລະ ສະມາຊິກສະພາແຫ່ງຊາດ ໄດ້ສຸມໃສ່ທຸກສະຕິປັນຍາ ໃນການປະກອບຄໍາເຫັນຢ່າງກົງໄປກົງມາ ແລະ ໄດ້ພິຈາລະນາ, ຮັບຮອງ ເອົາບັນຫາສໍາຄັນພື້ນຖານຂອງແຂວງ ດັ່ງນີ້:

1. ໄດ້ພິຈາລະນາ, ຮັບຮອງເອົາບົດ​ລາຍ​ງານຂອງອົງການປົກຄອງແຂວງ ກ່ຽວ​ກັບ ການຈັດຕັ້ງປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດຂອງແຂວງ ປະຈຳປີ 2022 ແລະ ທິດທາງແຜນ​ການ ປະຈໍາປີ 2023;
2. ຮັບຮອງເອົາບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປີ 2021, ບົດສະຫຼຸບການເຄື່ອນໄຫວວຽກງານ ປີ 2022 ແລະ ທິດທາງແຜນການເຄື່ອນໄຫວ ປີ 2023 ຂອງອົງການກວດສອບປະຈໍາພາກກາງ;
3. ຮັບຮອງເອົາບົດລາຍງານ ຂອງອົງການກວດກາລັດແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
4. ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023 ຂອງອົງການໄອຍະການປະຊາຊົນແຂວງ;
5. ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວປະຈໍາປີ 2023 ຂອງສານປະຊາຊົນແຂວງ;

6. ພິຈາລະນາ, ຮັບຮອງເອົານິຕິກໍາຂອງອົງການປົກຄອງແຂວງ ຈໍານວນ 02 ສະບັບຄື:

+  ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການສະກັດກັ້ນ ແລະ ຕ້ານອັກຄີໄພ ພາຍໃນແຂວງສະຫວັນນະເຂດ;

+  ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງຂີ້ເຫຍື້ອໃນທົ່ວແຂວງສະຫວັນນະເຂດ.

7. ພິຈາລະນາ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວປະຈໍາປີ 2023 ຂອງສະພາປະຊາຊົນແຂວງ ຊຸດທີ II;

8. ກອງປະຊຸມໄດ້ລົງຄະແນນສຽງຮັບຮອງ ເອົາການເລືອກຕັ້ງ ທ່ານ ຄໍາແດງ ຂັນຕະມາລາ ວ່າການຫົວໜ້າອົງການໄອຍະການປະຊາຊົນແຂວງ ເປັນຫົວໜ້າອົງການໄອຍະການປະຊາຊົນແຂວງສະຫວັນນະເຂດ.

ກອງປະຊຸມໄດ້ຮຽກຮ້ອງມາຍັງບັນດາອົງການຈັດຕັ້ງພັກ-ລັດ, ແນວລາວສ້າງຊາດ​ແຂວງ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ກຳລັງປະກອບອາວຸດ, ພະນັກງານ-ລັດຖະ ກອນ ຕະຫຼອດຮອດປະຊາຊົນຊາວແຂວງສະຫວັນນະເຂດ ທຸກທົ່ວໜ້າ ຈົ່ງພ້ອມກັນເຊື່ອມຊຶມມະຕິກອງປະຊຸມຄັ້ງນີ້ ແລະ ນຳໄປຈັດຕັ້ງຜັນຂະຫຍາຍ ໃຫ້ມີປະສິດທິຜົນ, ປະກອບສ່ວນຢ່າງຕັ້ງໜ້າ ເຂົ້າໃນການປະຕິບັດສິດ ​ແລະ ພັນທະ​ຂອງ​ພົນລະ​ເມືອງ ​ກໍຄືໜ້າທີ່ວຽກງານຂອງຕົນ ​ເພື່ອ​ສ້າງໃຫ້ແຂວງສະຫວັນນະເຂດ ​ເປັນ​ແຂວງ​ທີ່ມີຄວາມສະຫງົບ, ຍຸຕິທຳ, ເສດຖະກິດສືບຕໍ່ຂະຫຍາຍ ຕົວ ແລະ ຊີວິດການເປັນຢູ່ຂອງປະຊາຊົນ ໄດ້ຮັບການສືບຕໍ່ປັບປຸງດີຂຶ້ນຢ່າງບໍ່ຢຸດຢັ້ງ.