ພາຍໃຕ້ຫົວຂໍ້ຂອງບົດນີ້ ມີເລື່ອງຈະມາເລົ່າໃຫ້ຟັງ ກ່ຽວກັບມູມໜຶ່ງຂອງສະໜາມຮົບ ຕ້ານການສໍ້ຫຼາດບັງຫຼວງ, ພວກໂກງບ້ານກິນເມືອງ ທີ່ມາໃນຄາບພະນັກງານຜູ້ຊົງກຽດຂອງລັດ ແລະ ນັກທຸລະກິດ ຢູ່ ສປຈີນ. ນອກນັ້ນກໍຈະຕໍ່ໃສ່ຂ່າວມະຍິກມະຍ່ອຍ ແຕ່ບໍ່ດ້ອຍບົດຮຽນຈາກຈີນເຊັ່ນກັນ.
ເປັນທີ່ຊາບກັນຢ່າງກວ້າງຂວາງແລ້ວວ່າ ໃນຊຸມປີຫຼັງໆມານີ້ ສະໜາມຮົບຕ້ານພະຍາດຟຸມເຟືອຍ ແລະ ໄພສໍ້ຫຼາດບັງຫຼວງຢູ່ ສປຈີນ ໄດ້ດຳເນີນໄປຢ່າງດຸເດືອດ ນັບແຕ່ຂັ້ນສູນກາງລົງຮອດຂອກແຄແຈຮົ້ວໃນຂັ້ນຮາກຖານ. ພາຍໃຕ້ຄຳຂວັນ “ຈະເປັນເສືອ ຫຼື ແມງວັນກໍບໍ່ໄວ້ໜ້າ” ຄຳຂວັນນີ້ມີຄວາມໝາຍວ່າ ບຸກຄົນ ຫຼື ພະນັກງານສໍ້ລາດບັງຫຼວງ ເຖິງຈະໃຫຍ່ຄັບຟ້າມີອຳນາດເໜືອເທວະດາ ຫຼື ຈະເປັນບຸກຄົນ ກໍຄືພະນັກງານ ທີ່ມີຖານະ ເຕ້ຍຕໍ່າຈຳດິນກໍຕາມ… ຖ້າພົວພັນກັບການສໍ້ລາດບັງຫຼວງແລ້ວ ກໍຈະບໍ່ໄວ້ໜ້າ. ດັ່ງນັ້ນ, ຈຶ່ງບໍ່ແປກທີ່ມີຂ່າວອອກມາອ່າວຖີ່ ກ່ຽວກັບການຕັດສິນຄະດີ ທຸດຈະລິດ-ສໍ້ລາດບັງຫຼວງ ທີ່ຜູ້ມີອຳນາດຂັ້ນສູງ ຈຳນວນບໍ່ໜ້ອຍ ໄດ້ຕົກຕັ່ງຍ້ອນເປັນແຖວ. ຈຸດໜຶ່ງທີ່ຢາກຍົກຂຶ້ນມາເປັນຕົວຢ່າງກໍຄື ສະໜາມຮົບຕ້ານການສໍ້ລາດບັງຫຼວງຢູ່ຈີນນັ້ນ ດຳເນີນໄປພ້ອມໆກັນ ທັງຢູ່ພາຍໃນ ແລະ ຢູ່ນອກປະເທດ ການປາບປາມພະຍາດສໍ້ລາດບັງຫຼວງ ແບບບໍ່ໄວ້ໜ້າຢູ່ຈີນນັ້ນ ໄດ້ກົດດັນໃຫ້ພວກສວຍໂອກາດ ໂກງບ້ານກິນເມືອງ ຈຳນວນໜຶ່ງເຕັ້ນໂຕນໂຍນໜີ ເພື່ອລົບຫຼີກຂະບວນຍຸຕິທຳ ແລະ ເພື່ອໄປສະເຫວີຍສຸກ ກັບກອງເງິນທີ່ປຸ້ນໄປຈາກປະຊາຊົນ. ແຕ່ແລ້ວຄວາມຝັນຫວານຂອງພວກເຂົາກໍພົບກັບທາງຕັນ. ເລີ່ມແຕ່ປີ 2015, ຄະນະກຳມາທິການປະສານງານຂັ້ນສູນກາງຂອງຈີນ ເພື່ອຕ້ານໄພສໍ້ລາດບັງຫຼວງ ໄດ້ຈັດຕັ້ງໂຄງການ ສະກາຍເນັດ (Sky Net) ຂຶ້ນ ໂດຍມີການປະສານກັບບັນດາປະເທດ ທີ່ພວກສໍ້ລາດບັງຫຼວງຈາກຈີນ ໃຊ້ເປັນທີ່ກຳບັງ-ເປັນບ່ອນຊຸກເຊື່ອງ ຊັບສິນທີ່ລັກຫອບໂຕນໄປຈາກປະເທດຊາດ. ໂຄງການ Sky Net ນີ້ມີເປົ້າໝາຍຕາມລ່າພວກສໍ້ລາດບັງຫຼວງທີ່ຫອບເງິນໂຕນໄປລີ້ຢູ່ຕ່າງປະເທດ ໂດຍສະເພາະແມ່ນເພື່ອນຳຈັບ ແລະ ລາກຄໍພວກເຂົາກັບຄືນມາຮັບໂທດຢູ່ປະເທດ ພ້ອມທັງເກັບກູ້ຄືນຊັບສິນເງິນຄຳ ທີ່ຖືກລັກລອບນຳໄປຊຸກເຊື່ອງຢູ່ຕ່າງປະເທດ. ເວົ້າສະເພາະໃນໄລຍະໃກ້ໆ ນີ້ ກໍມີຂ່າວອອກມາຈາກຈີນ ໃນຕົ້ນເດືອນມັງກອນ 2024 ນີ້ວ່າ ນັບແຕ່ເດືອນມັງກອນ ຫາ ເດືອນພະຈິກ 2023 ພາຍໃຕ້ໂຄງການ Sky Net, ທາງການຈີນໄດ້ເປີດກວ້າງການຮ່ວມມືກັບບັນດາປະເທດ, ອົງການຈັດຕັ້ງສາກົນ ໂດຍສະເພາະແມ່ນອົງການຕຳຫຼວດສາກົນ ຫຼື ອິນເຕີໂປນ (Interpol) ເພື່ອລ່າຈັບຜູ້ຕິດແຮ້ວຄະດີສໍ້ລາດບັງຫຼວງໃນຈີນ ແລ້ວໂຕນໜີໄປຫຼົບຫຼີກເງື້ອມມືກົດໝາຍຢູ່ຕ່າງປະເທດ. ຂ່າວບອກວ່າໃນໄລຍະດັ່ງກ່າວ (11 ເດືອນໃນປີ 2023) ທາງການຈີນສາມາດ ລາກຄໍພວກຕິດຄະດີສໍ້ລາດບັງຫຼວງກັບຄືນມາຮັບໂທດໄດ້ທັງໝົດ 1.278 ຄົນ ໃນນັ້ນເປັນອະດີດພະນັກງານລັດຂັ້ນສູງຈຳນວນ 140 ຄົນ ແລະ ພະນັກງານທີ່ເປັນໄມ້ມືອີກຈຳນວນ 48 ຄົນ.
ພະນັກງານຫົວໃສໃຈຄົດທີ່ກ່າວມາຂ້າງເທິງນີ້ ແມ່ນບຸກຄົນທີ່ອົງການຕຳຫຼວດສາກົນຕ້ອງການຕົວຫຼາຍທີ່ສຸດ. ຈຳນວນເງິນສໍ້ໂກງທີ່ເກັບກູ້ຄືນມາໄດ້ນັ້ນ ມີສູງເຖິງ 2,91 ຕື້ ຢວນ ຫຼື ເທົ່າ ກັບ 406,7 ລ້ານໂດລາສະຫະລັດ.
ຂ່າວບອກວ່າ ບັ້ນເຄື່ອນໄຫວພາຍໃຕ້ໂຄງການ Sky Net ໃນແຕ່ລະໄລຍະນັ້ນ ໄດ້ມີເປົ້າໝາຍສະເພາະເຊັ່ນ ການປະຕິບັດງານໃນປີ 2015 ນັ້ນ (ປີສ້າງຕັ້ງ Sky Net ) ແມ່ນເນັ້ນຈັບຕົວຜູ້ກະທຳຜິດ ຄືນມາຮັບໂທດຢູ່ປະເທດ. ສ່ວນການປະຕິບັດງານໃນປີ 2023 ນັ້ນ ເນັ້ນ 2 ຈຸດປະສົງຄື: ນຳໂຕພວກກະທຳຜິດກັບຄືນມາຮັບໂທດ ແລະ ເພື່ອເກັບກູ້ຄືນຊັບສິນທີ່ເສຍຫາຍຍ້ອນການສໍ້ລາດບັງຫຼວງ.
ເລື່ອງປິດທ້າຍທີ່ຢາກເວົ້າໃຫ້ຟັງຕື່ມນັ້ນກໍຄື ຂ່າວກ່ຽວກັບນະໂຍບາຍດີໆ ຂອງຈີນ ເພື່ອເອື້ອອຳນວຍຄວາມສະດວກ ໃຫ້ແກ່ນັກທ່ອງທ່ຽວ ຈາກສະຫະລັດອາເມລິກາ ທີ່ຕ້ອງການເຂົ້າໄປຈີນ ເຊິ່ງຂ່າວໄດ້ໃຫ້ລາຍລະອຽດວ່າ ສະຖານທູດ ແລະ ບັນດາກົງສູນໃຫຍ່ຂອງຈີນ ປະຈຳຢູ່ສະຫະລັດອາເມລິກາ ໄດ້ປັບປຸງເຮັດໃຫ້ການອອກ ວີຊາ ປະເພດທ່ອງທ່ຽວງ່າຍດາຍຂຶ້ນ, ຄືພົນລະເມືອງສະຫະລັດ ທີ່ຕ້ອງການເຂົ້າໄປທ່ຽວຈີນນັ້ນ ບໍ່ຈຳເປັນຕ້ອງແຈ້ງກ່ຽວກັບປີ້ຍົນໄປ-ກັບ, ໂຮງແຮມທີ່ຈະພັກເຊົາ, ລາຍການທ່ອງທ່ຽວ, ໜັງສືເຊື້ອເຊີນ ກໍຄືເອກະສານຢັ້ງຢືນຈາກສະຖານທູດຈີນຄືເມື່ອກ່ອນອີກຕໍ່ໄປ.