ຕອນບ່າຍຂອງວັນອັງຄານທີ 19 ເມສາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ທ່ານ ສົມບູນ ມະນີ, ຫົວໜ້າພະແນກເຕັກໂນໂລຊີ ແລະ ການສື່ສານ ພ້ອມດ້ວຍບັນດາບໍລິສັດທີ່ໃຫ້ບໍລິການດ້ານໄປສະນີ ແລະ ໂທລະຄົມມະນາຄົມ ສາຂາແຂວງອຸດົມໄຊ  ແລະ ໂຮງງານປຸ່ງແຕ່ງຢາງພາລາ ຂອງບໍລິສັດ ຈົງອູ ໄດ້ມອບອຸປະກອນຮັບໃຊ້ຫ້ອງການ ໃຫ້ສະພາປະຊາຊົນແຂວງອຸດົມໄຊ ຕາງໜ້າຮັບໂດຍແມ່ນທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ ແລະ ຄະນະເລຂາທິການສະພາປະຊາຊົນແຂວງເຂົ້າຮ່ວມ.

ບັນດາອຸປະກອນທີ່ນໍຳມາມອບໃນຄັ້ງນີ້ປະກອບມີ: ຄັອມພິວເຕີ່ຕັ້ງໂຕະ 2 ຊຸດ, ລວມມູນຄ່າ 10.800.000 ກີບ. ຄັອມພິວດັ່ງກ່າວແມ່ນສະພາປະຊາຊົນແຂວງອຸດົມໄຊ ຈະໄດ້ນຳໄປມອບໃຫ້ແກ່ບັນດາຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງບັນດາເມືອງ.

ຫຼັງຈາກນັ້ນ ປະທານສະພາປະຊາຊົນແຂວງ ໄດ້ຕາງໜ້າຄະນະປະຈໍາສະພາປະຊາຊົນແຂວງ, ສະມາຊິກສະພາປະ ຊາຊົນແຂວງປະຈໍາເຂດເລືອກຕັ້ງເມືອງ, ໄດ້ສະແດງຄວາມຂອບໃຈມາຍັງພະແນກເຕັກໂນໂລຊີ ແລະການສື່ສານ ພ້ອມດ້ວຍບັນດາບໍລິສັດທີ່ໃຫ້ບໍລິການດ້ານໄປສະນີ ແລະ ໂທລະຄົມມະນາຄົມ ສາຂາແຂວງອຸດົມໄຊ ແລະ ບໍລິສັດ ຈົງອູ ທີ່ໄດ້ສະໜອງອຸປະ ກອນຮັບໃຊ້ທີ່ຈໍາເປັນໃຫ້ສະພາປະຊາຊົນແຂວງ ເພື່ອນໍາໄປມອບໃຫ້ບັນດາເມືອງ ແລະ ຈະນຳໃຊ້ເຂົ້າໃນວຽກງານຕົວຈິງໃຫ້ເກີດຜົນປະໂຍດໃຫ້ສູງສຸດ.

ຕອນທ້າຍທ່ານປະທານຍັງໄດ້ອອຍພອນມາຍັງບັນດາທ່ານ ແລະ ບັນດາບໍລິສັດ ເນື່ອງໃນໂອກາດບຸນປີໃໝ່ລາວນີ້ ຂໍອອຍພອນໄຊໃຫ້ທຸກທ່ານພ້ອມດ້ວຍຄະນະທິມງານ ຈົ່ງມີສຸຂະພາບເຂັ້ມແຂງແຮງກ້າ, ມີຄວາມຜາສຸກໃນຊີວິດສ່ວນຕົວຄອບຄົວ ແລະ ປະສົບຜົນສໍາເລັດໃນໜ້າທີ່ການງານທີ່ມີກຽດຂອງຕົນ.

(ພາບ, ຂ່າວ: ແສງພອນ ອິິນນະລົງ).