ຕອນເຊົ້າຂອງວັນທີ 22 ກັນຍາ 2022 ທີ່ຫ້ອງປະຊຸມ ສະພາປະຊາຊົນແຂວງ ໄດ້ຈັດພິທີ ເຊື່ອມຊຶມ ເອກະສານຂອງພັກ, ກໍາມະບານ ແລະ ດໍາເນີນຊີວິດພັກປະຈໍາເດືອນ ກັນຍາ 2022 ໂດຍການເປັນປະທານ ຂອງ ສະຫາຍ ທອງຄານ ວັດສະດາກອນ ຄະນະປະຈໍາສະພາ, ເລຂາໜ່ວຍພັກສະພາປະຊາຊົນແຂວງ, ມີບັນດາສະຫາຍຄະນະປະຈໍາ, ຄະນະໜ່ວຍພັກ, ສະມາຊິກພັກສົມບູນ-ສໍາຮອງ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ.

ຈຸດປະສົງການຜັນຂະຫຍາຍບັນດາເອກະສານໃນຄັ້ງນີ້ ເພື່ອໃຫ້ສະມາຊິກພັກ ແລະ ພະນັກງານ-ລັດຖະກອນ ໄດ້ເຊື່ອມຊຶມ, ຮັບຮູ້ ແລະ ເຂົ້າໃຈ ບັນດາເນື້ອໃນສໍາຄັນຂອງແຕ່ລະເອກະສານ, ເຊິ່ງປະກອບມີເອກະສານ ຄື: ມະຕິ ຂອງຄະນະບໍລິຫານງານພັກແຂວງ ສະບັບເລກທີ 898/ຄບພຂ, ລົງວັນທີ 6 ກັນຍາ 2022 ວ່າດ້ວຍການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານຢູ່ ແຂວງອຸດົມໄຊ, ມູນເຊື້ອ ການກໍາເນີດ ແລະ ເຕີບໂຕຂະຫຍາຍຕົວຂອງສະຫະພັນກໍາມະບານແຂວງ ອຸດົມໄຊ ຄົບຮອບ 43 ປີ (11 ກັນຍາ 1979-11 ກັນຍາ 2022) ແລະ ບົດແນະນໍາ ວ່າດ້ວຍການຈັດຕັ້ງ 2 ວາລະແຫ່ງຊາດ ສະບັບເລກທີ 533/ສກຂ, ລົງວັນທີ 2 ສິງຫາ 2022.

ພາຍຫຼັງໄດ້ເຊື່ອມຊຶມເອກະສານດັ່ງກ່າວແລ້ວ ໄດ້ສືບຕໍ່ດໍາເນີນຊີວິດພັກ ປະຈໍາເດືອນ ກັນຍາ 2022, ໄດ້ສະຫຼຸບຕີລາຄາການນໍາພາຂອງໜ່ວຍພັກສະພາປະຊາຊົນແຂວງ ປະຈໍາເດືອນ ກັນຍາ ແລະ ທິດທາງແຜນການປະຈໍາເດືອນ ຕຸລາ 2022 ພ້ອມກັນນັ້ນ, ບັນດາສະມາຊິກພັກໄດ້ປະກອບຄໍາຄິດຄໍາເຫັນ ແລະ ຕໍານິສົ່ງຂ່າວເຊິ່ງກັນ ແລະ ກັນ ດ້ານອ່ອນ-ຂໍ້ຄົງຄ້າງ ພ້ອມທັງຊອກຫາວິທີແກ້ໄຂ ໃນຕໍ່ໜ້າໃຫ້ດີຂຶ້ນກວ່າເກົ່າ.

 ພາບ/ຂ່າວ: ສພຂ.