ໃຈກອງປະຊຸມໃຫຍ່ ຄັ້ງທີ V ຂອງໜ່ວຍພັກຮາກຖານສະພາປະຊາຊົນແຂວງຈໍາປາສັກ ໄດ້ດໍາເນີນ ແລະ ອັດລົງດ້ວຍຜົນສໍາເລັດຢ່າງຈົບງາມ ໃນວັນທີ 12 ທັນວາ 2023 ທີ່ຜ່ານມາ ຢູ່ທີ່ຫ້ອງປະຊຸມຂອງສະພາປະຊາຊົນແຂວງຈໍາປາສັກ ພາຍໃຕ້ການເປັນປະທານຂອງ ສະຫາຍ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຈໍາປາສັກ, ເຂົ້າເປັນຄະນະປະທານມີ ສະຫາຍ ສົມສີ ມະນີນິນ ກໍາມະການພັກແຂວງ, ເລຂາຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ, ຮອງປະທານສະພາປະຊາຊົນແຂວງ ແລະ ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງຈໍາປາສັກ ມີບັນດາສະຫາຍຄະນະໜ່ວຍພັກສະພາປະຊາຊົນແຂວງຈໍາປາສັກ ຊຸດທີ IV, ສະມາຊິກພັກສົມບູນ, ສະມາຊິກພັກສໍາຮອງ ພາຍໃນໜ່ວຍພັກຮາກຖານສະພາປະຊາຊົນແຂວງຈໍາປາສັກ ແລະ ບັນດາສະຫາຍແຂກຖືກເຊີນຕາງໜ້າຈາກຄະນະພັກບັນດາພະແນກການ-ກົມກອງອ້ອມຂ້າງແຂວງ ເຂົ້າຮ່ວມ.

ກອງປະຊຸມໄດ້ພ້ອມກັນພິຈາລະນາ ແລະ ຮັບຮອງເອົາບົດລາຍງານການເມືອງທັງສອງພາກ ແລະ ບົດສຳຫຼວດການນຳພາລວມຂອງຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ, ກອງປະຊຸມໄດ້ເປັນເອກະພາບຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ສ້າງຕັ້ງຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ ໃນໄລຍະ 05 ປີຜ່ານມາ, ພ້ອມນີ້ກອງປະຊຸມຍັງໄດ້ເປັນເອກະພາບ ຮັບຮອງເອົາທິດທາງລວມ ແລະ ທິດທາງວຽກງານຈຸດສຸມແຕ່ລະດ້ານ ນັບແຕ່ປີ 2023-2027.

ຈາກນັ້ນ, ຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 5 ສະຫາຍ ຍິງ 0 ສະຫາຍ, ເລືອກເອົາ 3 ສະຫາຍ. ຈາກນັ້ນ, ໄດ້ເປີດກອງປະຊຸມຄັ້ງປະຖົມມະລືກ ເຊິ່ງກອງປະຊຸມໄດ້ເລືອກເອົາ ສະຫາຍ ສົມສີ ມະນີນິນ ເປັນເລຂາຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ, ສະຫາຍ ປອ. ສົມສັກ ແສງສັກດາ ເປັນຮອງເລຂາຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ ແລະ ສະຫາຍ ອະນຸສັກ ຈັນທະປະເສີດ ເປັນປະທານກວດກາໜ່ວຍພັກຮາກຖານສະພາປະຊາຊົນແຂວງຈໍາປາສັກ.

ໃນຕອນທ້າຍ, ສະຫາຍ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຈໍາປາສັກ ປະທານກອງປະຊຸມ ໄດ້ມີຄໍາເຫັນໂອ້ລົມໃຫ້ທິດເຍືອງທາງໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ຂອງຄະນະໜ່ວຍພັກຮາກຖານສະພາປະຊາຊົນແຂວງຈໍາປາສັກ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳ-ນຳພາຂອງຄະນະພັກຊຸດເກົ່າ ທີ່ໄດ້ຊີ້ນຳ-ນຳພາພະນັກງານ, ສະມາຊິກພັກປະຕິບັດໜ້າທີ່ການເມືອງໄລຍະ 05 ປີ ຜ່ານມາ, ສະຫາຍໄດ້ຊົມເຊີຍສັນລະເສີນ ມາຍັງພະນັກງານ, ສະມາຊິກພັກ ໃນການປະຕິບັດໜ້າການເມືອງ ທີ່ສາມາດຍາດມາໄດ້ຜົນສຳເລັດໃນຫຼາຍດ້ານ, ພ້ອມກັນນັ້ນສະຫາຍຍັງໄດ້ສະແດງຄວາມເປັນຫ່ວງ ເປັນໃຍຕໍ່ດ້ານອ່ອນ ແລະ ຂໍ້ຄົງຄ້າງເຊິ່ງໄດ້ໃຫ້ທິດຊີ້ນຳ ແຕ່ລະດ້ານໃນທາງທີ່ສ້າງສັນ ເພື່ອໃຫ້ຄະນະໜ່ວຍພັກຊຸດໃໝ່ ສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກຄັ້ງນີ້ ໃຫ້ປາກົດຜົນເປັນຈິງ. ພ້ອມດຽວກັນ, ສະຫາຍຍັງໄດ້ຮຽກຮ້ອງໃຫ້ສະມາຊິກພັກ-ພະນັກງານ ຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບການເມືອງ ຂອງຕົນໃຫ້ສູງຂຶ້ນເລື້ອຍໆ ເຮັດໃຫ້ມະຕິກອງປະຊຸມໃຫຍ່ ຂອງຄະນະໜ່ວຍພັກຮາກຖານສະພາປະຊາຊົນແຂວງ ຄັ້ງທີ V ໄດ້ຮັບການຈັດຕັ້ງຜັນຂະຫຍາຍການເປັນແຜນງານ, ໂຄງການລະອຽດສ້າງໜ່ວຍພັກຮາກຖານສະພາປະຊາຊົນແຂວງໃຫ້ມີການພັດທະນາ, ຫັນປ່ຽນໃໝ່ຢ່າງເລິກເຊິ່ງ ປະຕິບັດຖືກຕ້ອງສອດຄ່ອງກັບລັດຖະທໍາມະນູນ ແລະ ກົດໝາຍ ເຮັດໃຫ້ພັກມີຄວາມເຂັ້ມແຂງ, ປອດໃສ, ໜັກແໜ້ນ.

(ພາບ-ຂ່າວ: ສົມວິຈິດ ໄຊມົນຕີ)

#ສະພາປະຊາຊົນແຂວງຈໍາປາສັກ

#ຜູ້ແທນປະຊາຊົນ